申命記 31章14節 到 31章29節   背景資料  上一筆  下一筆
有一種講法,認為chit段經文是編者後來附加上去ê。不過mā tùi chit段經文中知影上帝早已經看出以色列人民tī經歷了迦南富裕ê物質生活後,會曉背叛上帝去拜偶像神明(參考第16、20、27、29節),後來mā證明上帝ê預言確實是應驗ā。上帝beh hō͘以色列人民知影,祂是照kah以色列人民ê祖先所立ê約去行,m̄-koh,以色列人民並無遵守kah上帝之間所立ê約。申命記作者真可能就是tùi巴比倫奴隸之地tńg去了後,重新編撰此經冊,目的就是beh提醒以色列人民mài重蹈覆轍。

第14到15節,chit兩節thang續接第1到8節對約書亞ê任命。表示任命約書亞ê事,是上帝親自按立ê。這thang確立約書亞ê領導權威。

第16到18節,chit段經文描述以色列人民teh進入迦南應允之地,原本thang享受美好ê生活,m̄-koh卻tú-tio̍h極大苦難,原因是in後來棄sak上帝去拜偶像神明;摩西是一個強勢ê領導者,m̄-koh伊死後,人民就開始棄sak上帝。其實,chit種講法mā是teh強化第6節所提起,ài約書亞有堅忍kah毅力, mài hō͘人民放肆,mài驚頑劣ê以色列人民。照士師記第二章10節ê記載,以色列人民tī約書亞kah伊hit一代祖先lóng往生後,就開始背叛上帝。

第19到22節,chit段經文就是為第三十二到三十三章之詩歌作序言。該兩章詩歌主要teh說明上帝確實守約,m̄-koh以色列人民卻無。Á chiah-ê詩歌為tio̍h是beh hō͘ in tī暗唸、吟唱ê時,保持清醒之心,mài真正棄sak上帝伊去,若無,災難會降臨到in ê身上。Mài認為上帝m̄知,上帝真清楚人ê心思意念。

第23節,koh一pái強化對約書亞領導權ê肯定。

第24到29節,上帝ài摩西kā所有以色列人民ê領導者帶到聖幕上帝ê面前,kā伊寫好ê詩歌kah上帝ê誡命交hō͘利未祭司好thang保存。Chiah-ê律法規章kah摩西ê詩歌,就khǹg tī約櫃ê兩旁。約櫃內面放tio̍h十誡。Án-ne,以色列人民lóng知影chiah-ê律法規章是kah十誡仝款重要,並提醒in嚴格遵守ê重要性。若無,上帝絕對bē寬待,一定會嚴懲。利未祭司,in就是約ê守護者,當別人lóng棄sakê時chūn,in就beh用性命守護tio̍h。

重新查詢 專卷研經 申命記系列
錯誤回報,請聯繫comm[@]fhl.net