Tùi chit章開始直到第三十四章止，ē-sái講是摩西最後ê遺言。Tī chit段篇幅中ê第三十二到三十三章，lóng是用詩歌ê型態寫出來。

摩西清楚家己tī世間ê時間已經近了，因為án-ne對全體以色列人民講出最後ê勸勉，tī chit-ê勸勉中，siōng主要是宣示約書亞kā繼承伊領導以色列人民進入迦南應允之地。

第1到2節，真明顯看出摩西已經有120歲。Chit-ê數字mā有真chiok厚ê象徵性意味tī其中。因為以色列人民共計有十二支派。Á 120歲mā是創世記ê作者認為這是上帝hō͘人siōng長ê年歲（參考創世記六：3）。Án-ne，thang kā摩西ê一生分做三個階段：(1)tī埃及王宮長大（參考使徒行傳七：23）；(2)逃離埃及後，寄居tī米甸丈人葉特羅家四十年，chit時tú-tio̍h上帝，然後被揀選並差遣去埃及chhōa以色列人民出來（參考出埃及記七：7，使徒行傳七：30）；(3)然後帶領以色列人民tī曠野漂流四十年時間，準備進入迦南應允之地，最後tī 120歲ê時往生（參考申命記一：3、三十四：7）。伊真清楚家己並無得tio̍h上帝應允進入迦南地。

第3到6節，摩西先提醒以色列人民，上帝立約書亞繼承伊來領導in，上帝會帶領in繼續前進並進入迦南地。伊ài以色列人民會記得一定會kā迦南地人民隔離出來。

第7到8節，chit兩節是koh一pái公開宣告約書亞就是領導者，ē-sái講是任命儀式之一。特別是tī民數記第廿七章bat詳細記載公開任命約書亞為繼承者ê經過，chia已經是第三pái記載有關約書亞被任命為繼承者ê記事（參考民數記廿七：18—23，申命記一：38）。