申命記 3章1節 到 3章11節   背景資料  上一筆  下一筆
Chit章thang分做三個段落,就是第1到11節,講tio̍h以色列人民攻打巴珊地區。第二段是第12到22節,關係以色列人民tī約旦河東岸ê活動。第三段tùi第23到29節,講tio̍h摩西無法度進入應允之地迦南。

Chit段經文ē-sái講是差不多全部重複敘述民數記第廿一章33到35節。唯一差別是民數記用「以色列人」,chia用「咱」,是用摩西講古ê方式說明歷史經過ê腳跡。

Chit段mā kah前段第二章26到37節相關,以色列人民為tio̍h beh前進迦南地,先tú-tio̍h希實本國王ê拒絕。後來koh tú-tio̍h巴珊國王噩ê阻擋,伊iáu帶兵來攻打以色列人民。結果in ê遭遇kah希實本所tú-tio̍h ê結果仝款。

第1到2節,chia講上帝決定kā巴珊chit地區ê土地、城市等lóng交hō͘以色列人民。作者beh表達一個基本觀念:m̄是以色列人民有甚麼能力thang phah贏,卻是上帝teh決定歷史ê行向。

第3到7節,chit段講述以色列人民攻打巴珊,一路勢如破竹,所到ê所在,城池就淪陷,以色列人民大獲全勝,共計佔領了六十座城。特別是chiah-ê城池lóng有真好ê防禦設施,á以色列人民對待chiah-ê城池ê手段,ná親像對待希實本仝款。

第8到10節,chit段說明以色列人民已經佔領了約旦河東岸整片地區,mā為呂便kah迦得chit兩支派ê人留落來一記thang khiā起、m̄去約旦河西岸迦南地分配土地ê伏筆。

第11節,chit節特別提起巴珊王噩,伊ê棺材是用石頭打造ê。Chit節主要teh說明以色列人民確實是phah敗巴珊,chiah有辦法連國王ê棺材lóng詳細辨認,而且明確記落來棺材長到四公尺、寬兩公尺,hiah-ni̍h大ê棺材所暗示ê是chit-ê民族是一個巨人族,án-ne mā回應了hiah-ê去窺探ê人tńg來ê報告,確實是相當大ê人種,hō͘ in真驚惶。M̄-koh,作者koh khah beh表達ê是,即使是chiah-ni̍h大ê人,只要是上帝親自帶領出戰,就m̄免驚。

重新查詢 專卷研經 申命記系列
錯誤回報,請聯繫comm[@]fhl.net