申命記 28章1節 到 28章14節   背景資料  上一筆  下一筆
第廿八章1到14節是kah第15到68節相對照;前段落是肯定ê,因為遵照上帝ê旨意、誡命去行,上帝會賜一切福氣hō͘以色列人民。顛倒,如果in違背上帝ê旨意、誡命ê時,會嚴重到連hō͘人販賣做奴隸lóng bē有人買(第68節)。換句話講,只有死路一條,這是相當嚴肅ê警告,ná親像摩西tī最後以「生死福禍」pái tī以色列人民面前,hō͘ in家己選擇仝款(參考申命記三十:15—20)。先知以賽亞mā用chit種話來形容遵守誡命kah背叛之間ê差別:「Lín 若甘心遵thàn,就會得tio̍h 地上ê 好物thang食。(全民版)」(以賽亞書一:19)

Chit段經文是屬tī祝福ê部分。

第1到2節,「聽從上帝」這是所有誡命ê基礎。因為上帝是以色列人民生存ê基礎,是上帝帶領in離開奴隸之地,而且賞賜hō͘ in肥ê土地thang自由khiā起、生活。因為án-ne,立約就是teh表明承認上帝是in性命ê主宰。

第3到6節,chia先講tio̍h上帝ê賜福有城鎮、田園,這表示土地ê意思。續落來是人口增加,表示力量增強,mā連帶ê是五穀豐收、牲畜繁生,續落來就是「平安」,表示無生活á是性命ê giâu疑。

第7節,chit節回應第6節ê「平安」,表示有上帝眷顧、保守,即使有敵人來侵犯,上帝mā會替in擊退chiah-ê來侵犯ê敵人,hō͘ in落荒á逃。

第8節,chit節回應了第3到6節所提起ê。

第9到10節,這是典型ê立約之語,表示以色列人民若遵行上帝ê命令、誡命、律法,就表示in真是上帝揀選ê子民。因為是上帝ê子民,hō͘想beh欺負in ê人看tio̍h lóng會驚惶。因為上帝是神聖bē-tàng侵犯ê神。

第11到12節,只要是確實遵行上帝ê旨意、命令,上帝一定會賜福hō͘ in充滿性命力量,m̄-nā kiáⁿ孫延綿,而且糧食夠額,永遠bē缺乏。Iáu thang幫助鄰國夠額有chhun。Án-ne,就bē成做他國ê奴隸(向別國借糧食ê意思)。

第13到14節,忠實tī上帝,遵守祂ê誡命,siōng基本ê態度,就是不棄sak上帝,去拜偶像神明。

重新查詢 專卷研經 申命記系列
錯誤回報,請聯繫comm[@]fhl.net