Chit段經文講tio̍h兩件事，一是冤家而且有暴力ê行為。另外一個是市場規律。

第11到12節，tī當時ê人觀念中，男性ê生殖器，m̄-nā是用來延續性命力，iáu表示性命ê尊嚴（參考創世記第廿四章，亞伯拉罕差遣伊ê老奴僕去哈蘭kā以撒娶bó͘ ê故事，伊ài老奴僕kā手hē tī亞伯拉罕ê生殖器頂面chiù-chōa，表示願意用性命ê氣力、尊嚴作保證ê意思）。因為án-ne，tī相罵中間，婦人用手掠別人ê生殖器，表示beh kā hit人斷絕繁衍後代ê能力，而且踐踏了hit人ê性命尊嚴，chit種動作絕無法度被允准。

第13到16節，用誠實ê態度經商kah tī司法工作上，被看做是替上帝行公義ê責任。商，不厭詐，tī chia摩西是嚴格禁止chit種不誠實ê行為。另外一方面，公正ê法碼mā teh表示司法審判ê意思，若是無公正ê司法，會hō͘弱勢者被欺壓。先知阿摩司ê時代，以色列人民因為犯chit種錯誤，被嚴詞譴責，甚至認為是kah亡國有密切ê關係（參考阿摩司書五：10—24）。