有戰爭就有俘虜，chit段經文講tio̍h怎樣處理想beh娶女性俘虜做bó͘ ê問題。古代社會女性地位甚低，戰俘koh khah免講。Chia提起ê女性戰俘，就是phah敗仗國家、民族ê女性被掠去做奴隸，m̄-koh若想納做妻妾，就應該注意ê事項。

Chit段經文mā ē-tàng看出以色列人民是thang kah外族人通婚ê。特別是tī所羅門王身上看tio̍h koh khah chē外邦妻細姨。

第10到13節，因為對方是外族人，mā m̄是迦南cha-bó͘-gín-á，若想beh娶伊做bó͘，需要舉行一種特別ê潔淨禮，就是透過剃掉頭毛、剪指kah、換上衫褲，表示伊kah過去無仝款，已經變成以色列人民之一份子。Chia講beh「為伊父母舉哀一個月」，意思是teh指伊kah原來ê家族切斷了關係。其實，當俘虜就是án-ne，因為伊差不多無法度koh再tńg來後頭厝省親。加上宗教禮儀上ê關係，若是tńg去省親，等於是接觸「無清氣」ê人，chit對夫家來講是相當麻煩ê事。因為án-ne，娶女戰俘，等於hō͘女戰俘kah娘家ê關係「死」去仝款，為tio̍h án-ne舉哀mā teh表示關係ê切斷，因為這cha-bó͘-gín-á已經完全歸化成以色列人à。

第14節，這是保障女性俘虜變成妻細姨了後siōng重要ê條例，mā就是當伊被主人納做妻妾了後，就beh尊重伊是一個自由人，á無法度koh再當做俘虜á是奴隸看待。因為伊已經被正式娶過門，是以色列人民ê新婦。