這是有關證人ê條例，規定一定tio̍h ài有兩個人以上舉證chiah算成立。Chit段經文mā出現tī民數記第三十五章30節，以及申命記第十七章6節，表示上帝絕對m̄准做假見證，即使有兩個人以上做證，m̄-koh卻是做假證，採取ê懲罰就是「報復」ê方式──以眼還眼，以牙還牙，以手還手，以腳還腳。列王記上第廿一章記載以色列王亞哈ê bó͘王后耶洗碧，買收人做假見證，害死葡萄園主人the̍h伯。結果上帝差遣先知以利亞去譴責亞哈王，講狗tī tó位舐（chīⁿ)拿伯ê血，mā tio̍h tī hia舐亞哈ê血（參考列王記上廿一：19）。

第15到17節，這是teh指控訴案，一定tio̍h有兩個人以上舉證並願意出庭做證chiah算是有罪。M̄-koh若是發見兩個證人中間有一個做假證陷害別人，就一定tio̍h敬拜上帝ê場所，表示ài面對上帝chiù-chōa，hit時輪值ê審判官tio̍h詳細調查，看甚麼人做假證。

第18到21節，若查出有人確實做假證，這做假證ê人就beh承受本來被控告者應得ê罪。換句話講，若本來被控告者是傷害別人ê目睭，m̄-koh這是冤枉ê，做假見證ê人就beh付出目睭來當做懲罰。用chit種方式來嚇阻做假見證ê行為。