但以理書 11章21節 到 11章45節   背景資料  上一筆  下一筆
前段部分teh紹介希臘統治者安提阿哥四世竄起ê經過,後段部分teh紹介伊ê政權會毀滅ê原因。

歷史是一面鏡子,自古以來,人類siōng殘酷ê行為,就是想透過戰爭解決國家、民族之間ê爭端,mā想用武力ê方式,hō͘對方降服。M̄-koh從來無一個國家、民族,是用武力ē-tàng hō͘對方心服口服,反tńg kan-taⁿ會加添仇恨而已。

	第21節,chia講「有一個邪惡ê人」,chit-ê人就是teh指安提阿哥四世。伊tī聽tio̍h兄哥西流古四世(Seleucus IV Philiopator)被刣死後,趕緊tùi羅馬趕tńg來。無想tio̍h伊ê財政大臣希流多路(Heliodorus)深驚安提阿哥四世tńg來奪取王權,就án-ne夥同部下設計beh kā它刣死,想beh擁護西流古四世尚且年輕ê kiáⁿ繼位,án-ne伊就ē-tàng成做輔佐國王ê大臣掌控大權。M̄-koh卻無想tio̍h chit時安提阿哥四世tú好tùi羅馬趕tńg來。伊表示ē-tàng輔佐家己ê姪á,然後就「乘人不備」刣死了姪á,奪取了「政權」。

	第22到24節,安提阿哥四世是一個真有心思謀略ê人,伊想tio̍h原本忠於兄哥西流古四世ê舊臣會不安kah不滿,因為án-ne積極地佈局,以ta̍k個擊破ê方式,甚至包括「上帝ê大祭司在內」,chit位大祭司就是teh指阿尼亞三世(Onias ṲI),因為伊並無聽從安提阿哥四世ê指揮,堅持不配合推動巴勒斯坦地區希臘化政策而被廢除大祭司ê職務,而安提阿哥四世接受阿尼亞三世ê兄弟耶孫(Jason)ê o͘-se hō͘耶孫繼承大祭司ê職務(參考九:26)。另外一方面,伊mā積極giú lóng埃及,因為當時埃及王室ê政權bē穩,亟需kah希臘修好,安提阿哥四世就利用chit-ê機會kah埃及外交訂定ê安全協防關係,巧真有技巧來 巧奪取了真chē原本屬tī埃及ê巴勒斯坦地區,就是第24節所提起ê「siōng富庶ê省份」。Mā因為án-ne,造成以色列人民koh khah大ê傷害。

    第25到28節,表面上安提阿哥四世是kah埃及聯盟,m̄-koh並m̄是甚麼安全聯盟,卻是為tio̍h beh養精蓄銳,準備tī有機會ê時去攻打。主前170年伊出兵埃及,以雄厚ê軍隊入侵埃及,埃及軍隊死亡慘重,國王多利買六世逃亡。安提阿哥四世就án-ne kā埃及納入了伊管轄ê範圍。Tī主前169年,伊帶勝利ê軍隊班師回朝路經耶路撒冷ê時chūn,開入城裡到聖殿去搜刮了所有ê財寶,掠奪了聖殿中所有ê金器、銀器,並且屠殺了真chē維護聖殿神聖ê祭司、法利賽人,這就是第28節所提起ê內容(thang參考次經—馬加比傳上一:20—25)。

第29到30節,安提阿哥四世頂pái chiah大敗埃及,mā搜刮了耶路撒冷聖殿所有ê寶貴器物,taⁿ koh kā koh一pái出兵埃及。主前168年,伊koh一pái帶兵出征埃及。無想tio̍h chit pái羅馬帝國決定出兵幫助埃及。Chia提起「基提人ê艦隊」指ê就是羅馬人。Mā tùi chia thang看tio̍h主前168年代,羅馬ê海軍已經ē-tàng真有效率運載大軍對敵希臘軍隊,並且開始進入歐洲ê其它地區。當安提阿哥四世chit pái因羅馬軍隊而折tńg去ê時,伊聽取一kóa幕僚ê建議,認為tio̍h beh徹底改變猶太人ê宗教信仰,chiah ē-tàng hō͘猶太人kah伊族人完全混合,增加伊統治ê能力。

第31節,安提阿哥四世派軍「褻瀆聖殿」,所謂「毀滅性ê thang憎ê物」chit句話(參考八:13—14、九:27節),指ê就是安提阿哥四世故意進入耶路撒冷聖殿,kā豬tī聖殿裡刣死,並且kā豬血hiù tī至聖所ê祭壇ê四個角,然後kā豬獻祭tī祭壇上。伊放縱部隊四界掠奪、強暴婦女等等惡質行踏lóng hō͘人髮指。M̄-nā禁止猶太人進入聖殿獻祭,甚至iáu tī聖殿ê至聖所內khiā立宙斯ê神像,然後koh強迫猶太人一定tio̍h向宙斯神像獻祭,hō͘ in ê心靈受創甚重。

第32到35節,chit段經文中提起有kóa猶太人「忠心跟tòe上帝」,in「起來反抗」。Mā有「民間明智ê眾領袖會教導平民,hō͘ in明白」,chia所提起ê「民間明智領袖」,就是teh指馬加比家族,後來in率領以色列人民起來反抗。Mā因為chit種反抗,付出ê傷亡代價mā非常高,有ê「戰死、被火燒死、被搶奪,á是俘虜」,mā有ê村落、家族被「屠殺」,mā有「明智ê領袖會hō͘殺害」等,chiah-ê lóng是為tio̍h抵抗安提阿哥四世而付出慘痛ê代價。作者強調chiah-ê帶頭起來反抗安提阿哥四世ê人是犧牲,m̄-koh in英勇ê作為就成做「洗盪」人民心靈siōng好ê效果,hō͘人民tī信仰上thang「純潔」,走chhōe上帝ê幫助、帶領。

    第36到39節,安提阿哥四世傲慢ê態度猖狂到家己認為「比任何神明偉大,甚至高過萬神之神—上帝」。伊去「拜祖先無拜過ê ná守護堡壘ê戰神」,mā利用「信奉異教神明ê軍隊防守伊ê堡壘」,然後用犒賞厚祿ê方式買收順服伊ê軍隊指揮官。   
                                                                                                                          
第40到41節,但以理書ê作者持守tio̍h一個明確ê思路:狂傲ê人結局會hō͘上帝所殲滅。Chia提起埃及koh一pái出兵來攻打安提阿哥四世,而且是傾巢而出。安提阿哥四世為tio̍h beh對付埃及ê大軍,kui氣將軍隊帶入巴勒斯坦,利用過境耶路撒冷ê時chūn,koh一pái掠奪耶路撒冷,chit pái ê路過所造成ê耶路撒冷城之損傷,大大超過以前ê任何一個時刻。有「成千上萬ê人」被安提阿哥四世所刣。主要原因就是伊koh一pái進入聖殿搜刮一切財物、器皿。M̄-koh chia提起「以東、摩押、亞捫」等三個族群ê人ē-tàng逃脫。

第42到45節,埃及並無戰勝,m̄-koh,真chē「珍藏ê金銀財寶kah其他貴重ê物件」lóng hông掠奪而去。安提阿哥mā聽tio̍h真chē「tùi東方kah北方」傳來對敵伊ê軍事行動,hō͘伊koh khah受氣,就tī大受氣之下「刣盡滅絕真chē人」,tùi chia thang看出伊手段ê殘忍。M̄-koh上帝決定beh除掉伊。Tī主前163年,安提阿哥四世忽然間生了一場不明ê病,結果死tī伊征戰途中ê波斯塔貝城(Tabae)。

重新查詢 專卷研經 但以理書系列
錯誤回報,請聯繫comm[@]fhl.net