但以理書 10章1節 到 11章1節   背景資料  上一筆  下一筆
但以理書tùi第十章到第十二章lóng是kah異象有關,而且chiah-ê異象ê信息是直接tùi上帝來ê啟示。Á第十章ná親像踏話頭,第十一章則有關啟示ê內容,而第十二章是有關這啟示ê結語,同時mā是但以理chit本經冊ê結論—上帝chiah是真正性命之主。

	頭前已經有提起過,但以理書並m̄是beh寫歷史,卻是藉用歷史背景寫作者hit時代ê事件,chit-ê認bat真重要。另外一點,雖然是藉用歷史背景,作者mā無照歷史年代ê順序編排,而chit點通常mā lóng是聖經作者歡喜ê筆法,因為án-ne chiah bē teh迫害ê時代,被當時ê統治者發現而遇tio̍h迫害á是殺害。

    第1節,「塞魯士做波斯王ê第三年」,塞魯士是波斯帝國ê開國皇帝,伊tī主前538年phah敗巴比倫帝國,並且取代了巴比倫帝國統治下ê所有地區。因為án-ne,chia講「第三年」,應該是teh指主前535年。Chia講但以理看見異象,致使伊「真oh了解」。

第2到3節,因為異象真令但以理驚恐,ná親像伊過去看tio̍h ê異象仝款,mā是深感恐慌kah不安(參考七:15、28)。伊悲傷了「三個禮拜」ê時間,用一種靈修ê方式,食真簡單ê食物,無整理儀容,表示心內ê哀傷。

第4到6節,chia ê「正月」,是teh指以色列人民ê「亞筆月」,是teh指Pôaⁿ過節ê節日。但以理koh一pái看tio̍h ê異象,chit-ê異象顯然無像是一般人,比較khah接近天使ê模樣。「細麻紗」,這是當時siōng真貴、高級ê布料,而其中siōng出名ê產品就是埃及手工織品。身上ná親像「寶石發光,面孔像sìh-nà發亮」等,chiah-ê記載lóng是teh說明天使代表上帝來臨。

第7到10節,chia並無記載kah但以理同在同齊ê人到底有幾個人,á是chiah-ê人是甚麼人?只記載講看見異象ê人,只有但以理一個人,其他ê人可能是因為發現但以理teh看見異象了後「面色大變」,lóng因為án-ne而「lóng非常恐慌,逃走bih起來」。但以理看tio̍h異象了後,是「坦覆 (thán-phak)tī土腳,會失去知覺」。M̄-koh,就tī chit-ê時chūn,chit-ê異象中ê天使忽然用手扶tio̍h但以理。M̄-koh伊á是感覺驚惶而「全pi̍h-pi̍h-chhoah」。

第11節,chit節thang對照第九章23節,天使加百列bat kā但以理講,上帝垂聽伊ê祈禱。Chit位受上帝差派來ê天使mā是講因為「上帝非常歡喜」但以理,因為án-ne,現在beh傳達上帝ê信息hō͘伊。

第12節,「mài驚」,chit句話不時出現tī天使對人講ê話(參考路加福音一:30、二:10,馬太福音廿八:5,馬可福音十六:6)。Chia講但以理一開始祈禱,因為伊真「謙卑」,所以上帝垂聽伊ê祈禱,chit對但以理來講是一個真大ê鼓勵。

第13到14節,真奇怪ê一節,並無啥容易明白為甚麼上帝ê天使會tú-tio̍h「波斯ê護國天使攔阻」伊,而且是tī「天使長米迦勒」幫助下,chiah ē-tàng來到但以理chia。原來古早時聖經作者有chit種觀點,認為每一個人ê身上lóng有一位天使teh保護tio̍h,mā同時teh記錄tio̍h人生活中ê各種言行舉止(參考馬太福音十八:10)。仝款ê,tī每一個民族、國家內,mā lóng有上帝派ê守護天使(參考約書亞記五:14,撒迦利亞書一:7—12)。M̄-koh上帝特別恩待以色列民族,差派天使長米迦勒做以色列人民ê守護天使。因為án-ne,當chiah-ê民族á是國家tú-tio̍h了危險ê時,chiah-ê守護ê天使就有責任起來保護伊守護ê對象。

Chia講波斯ê守護天使無想beh hō͘加百列去傳達這美好ê消息,為tio̍h án-ne,hō͘ chit位但以理ê天使費盡了長到三個禮拜ê時間kah伊爭鬥,後來得tio̍h守護以色列ê天使長米迦勒幫助chiah ē-tàng解脫。

    第15到17節,但以理對chit位天使講,看tio̍h異象ê時已經驚惶到講不出話來,現在是天使摸了牠ê嘴唇,chiah開啟了伊講話ê能力。M̄-koh伊á是有表示家己ê軟弱無力。

    第18節,chit位天使聽了後,koh一pái伸手「扶」但以理,hō͘伊「恢復了氣力」,加添了伊ê氣力。

第19節,chit位天使koh一pái用鼓勵ê話hō͘但以理知影,上帝確實「非常歡喜」伊,ài伊「堅強」起來。就tī chit時chūn,但以理kā天使講,伊ê氣力恢復à,thang kā上帝ê信息傳hō͘伊。

第20到第十一章1節,chit位天使kā但以理講,伊帶來上帝ê信息hō͘伊,並且講beh kā chit寫tī「真理冊」上ê信息啟示hō͘但以理明白。所謂「真理冊」,指ê就是「性命冊」上ê事,這性命冊是記載人類ê所行所講。這mā thang講是上帝ê「計畫冊」。續落來,chit位天使kā但以理講,伊tio̍h趕緊tńg去「kah波斯ê護國天使作戰」,續落來就是「希臘ê護國天使beh出現」,表示波斯帝國kā結束伊統治時代,換做是希臘帝國來臨。M̄-koh天使長米迦勒會繼續守護tio̍h以色列民族。

重新查詢 專卷研經 但以理書系列
錯誤回報,請聯繫comm[@]fhl.net