阿摩司書 4章1節 到 4章13節   背景資料  上一筆  下一筆
Chit章經文m̄-nā談起北國以色列人民一邊tī伯特利敬拜上帝,另外一方面mā繼續犯罪,這說明了連祭司lóng只知影看tio̍h人民獻祭奉獻,卻m̄知阻止in犯罪ê行為,因為án-ne,上帝kā不接納in所獻ê祭,顛倒ê,是用koh khah嚴厲ê方式懲罰in。

    另外一方面,chit段經文特別提起撒馬利亞ê婦女mā是參與犯罪ê共犯。因為án-ne,上帝mā beh懲罰in。

    第1到3節,這是一段真值得注意ê經文;chia提起「巴珊ê母牛」;「巴珊」,是設tī加利利海ê東邊,有廣大ê草原,因為土地肥,草原豐富,因為án-ne,「巴珊」chit-ê名字ê意思就是teh指肥,連chit所在ê牛、羊lóng成長kah真肥壯。當時ê hiah-ê人siōng ài用「巴珊ê母牛」chit-ê詞句來形容一個婦人ê高貴、美麗、富有。現tī先知阿摩司kā它引用來形容chit種婦人,是teh指in乃是犯罪ê背後烏手。因為in ê財富乃是tùi「欺負弱者,壓迫sàn-chhiah人」得來ê,而且是貪得無厭,過奢侈ê生活。

    「鈎子」,這是亞述人用鈎子鈎tòa戰俘ê嘴唇á是鼻á,拖tio̍h in行(參考列王記下十九:28,歷代志下三十三:11)。上帝講撒馬利亞ê婦女會án-ne被亞述人款待當做懲罰ê方式,然後hông棄sak到城外死去。

    第4到5節,chit兩節是反諷ê講詞,先知阿摩司用chit種語句teh描述以色列人民犯罪ê情形。看起來kah-ná真敬虔ê款,m̄-koh實際上並不如此,雖然是「ta̍k工獻牲祭,每隔三工奉獻所得十分之一」,mā是枉然,因為ná lóng是虛假ê外表。

    「伯特利」,這是北國以色列宗教中心,tī chia有宏偉ê聖殿thang比得耶路撒冷ê聖殿。

    「吉甲」,是以色列人民記念上帝奇妙恩典ê一個宗教聖地。

    第6到8節,tùi第6節到第11節,先知阿摩司用特殊ê語句講出上帝對以色列人民,並m̄是tī in犯罪了後就馬上懲罰,á是發出受氣,上帝確實是一直teh期待tio̍h以色列人民會知影悔改,歸向祂。M̄-koh顯然地以色列人民是bē記得上帝ê話語,mā bē記得in kah上帝之間所立ê約à。因為án-ne先知阿摩司tī chia提出上帝kā嚴厲懲罰in,就是用饑荒、炕旱,而這是威脅tio̍h性命生存ê災難,m̄-koh,人心已惡質到極點,甚至是麻痺à。因為án-ne,即使是tī嚴重饑荒、炕旱ê情況下,人心á是僵硬、不悔改。

    第9到11節,Tī chit段經文中,先知阿摩司提出兩件歷史事件做教材:一是出埃及ê經驗,因為瘟疫一再出現,hō͘埃及人ê家禽、cheng-seⁿ lóng相繼死亡(參考出埃及記九:1—7)。先知阿摩司提出chit-ê歷史事件,是beh kā以色列人民講,當年因為瘟疫,hō͘埃及人受難、痛苦,m̄-koh卻保護了以色列人民ê性命、財產安全。Taⁿ卻顛倒,當年降臨在埃及人身上ê災難,會臨到以色列人民中。    二是tī第11節中所提起ê事件—所多瑪城kah蛾摩拉城毀滅ê事件。Chit兩個城因為棄sak上帝ê教示,墮落到連上帝ê使者mā tio̍h凌辱,結果上帝tùi天頂降落大火燒毀了chit兩個城市,只chhun羅得kah伊ê兩個cha-bó͘-kiáⁿ逃離出來。

    「Ē-sái講是lín猶原不歸向我」,chit句話貫穿了kui卷阿摩司書。先知阿摩司就是受差派來警告以色列人民ê使者,伊kā以色列人民講,ài in看見家己已經遠離上帝ê教示à。M̄-koh,先知阿摩司雖然是一再地苦勸以色列人民悔改,卻都無得tio̍h回應,án-ne chiah是siōng令上帝受氣ê所在。

    第12節,chia雖然無提起上帝ài怎樣處罰以色列人民,m̄-koh,卻提醒以色列人民tio̍h準備好勢向上帝「交帳」。「交帳」ê意思是teh指「面對上帝」。這表示上帝kā ài beh進行嚴厲ê審判ê意思。

    第13節,這是一首詩歌,tùi詩中看出先知阿摩司警告以色列人民,別認為上帝無可能做toh一kóa事,上帝既然ē-tàng造山、造風,必定ē-tàng hō͘日時轉變成做暗夜,無任何事ē-tàng難倒上帝!真可能當時ê以色列人民認為tī耶羅波安二世ê統治之下,國勢堅強、社會富裕、政治勢力堅定,tùi án-ne in認為:án-ne堅強ê國家,強猛ê軍事武力,有甚麼人ē-tàng奈何得了以色列國?甚麼人ē-tàng摧毀它?先知阿摩司beh表示ê是:一旦惹上帝受氣,人無論擁有甚麼都無用。因為真正統治全世界ê,是上帝。

重新查詢 專卷研經 阿摩司書系列
錯誤回報,請聯繫comm[@]fhl.net