Tùi第1節開始一直到第21節，是使徒保羅第一pái自我告白，tùi伊出世到遇tio̍h koh活ê耶穌帶hō͘伊性命改變。

第1到5節，是使徒保羅ê自我紹介。Siōng特別ê是伊用母語─希伯來語對大家講話，hō͘眾人感覺tio̍h使徒保羅kah-ná家己人仝款。

第3節，使徒保羅講tio̍h家己ê身家資料背景；伊出世tī「基利家ê大數」，成長「tī耶路撒冷」，tī經學教師ê領袖「迦瑪列門下受教」，而且受嚴格ê訓練。迦瑪列是猶太人出名ê經學教師，tī猶太人社會中非常有影響力（參考五：33—39），是經學教師兩大門派中屬tī自由派（to̍h是Hillel，另外有保守派是Shammai）ê領導者。

第4到5節，使徒保羅一屑á 都無畏講家己bat用嚴厲手段迫害基督徒，搜捕到ê m̄是處死，就是kā它關tī監獄中。