使徒保羅是一個被聖神充滿ê傳道者，伊m̄-nā傳講耶穌koh活ê信息有力，而且有醫病、趕鬼ê能力。

第11到12節，chia講使徒保羅身上充滿tio̍h聖神ê能力，因為án-ne，有人「Kā伊用過ê手巾á是圍裙the̍h去khǹg tī病人身上，ē-sái疾病消除」，也ē-tàng hō͘邪靈tùi人身上驅離出去，這ná親像耶穌身上充滿能力，只要摸tio̍h伊外袍ê一角，所有摸tio̍h ê人lóng得醫仝款（參考馬可福音六：56）。

第13到16節，有人看見使徒保羅有chit種奇特ê聖神同在之能力，就跟tòe學習mā想用耶穌ê名趕鬼，而做chit款tāi-chì ê竟然「是猶太祭司長士基瓦ê七個kiáⁿ」。M̄-koh並無效果，因為in ê心並m̄是真正beh信耶穌，卻是想假借耶穌ê名行騙人ê事。因為án-ne，in m̄-nā趕bē出鬼，反tńg hō͘ 鬼攻擊得koh khah厲害。使徒保羅並m̄是家己有甚麼能力，卻是因為聖神tī伊ê身上作工。換句話講，人無法度命令聖神作甚麼，卻是聖神tī人ê身上作工，以見證上帝ê疼。如果人亂使用上帝ê名義，結局會hō͘上帝所審判ê。士基瓦ê七個kiáⁿ因為亂使用耶穌ê名，結果m̄-nā無趕出邪靈，反tńg被邪靈所攻擊就是一個例。

第17到20節，結果士基瓦七個kiáⁿ ê事件，以弗所城ê人lóng知影，大家趕緊kā所拜ê偶像神明，kah in過去所做違反信仰ê事，lóng坦白承認，並且kā真chē行邪術ê冊lóng the̍h出來燒毀，單單chiah-ê冊ê價錢就高達「五萬銀幣」，這數目若以當時一工工資是一塊銀幣來換算，ē-sái講是一筆龐大ê錢。