使徒行傳 17章16節 到 17章34節   背景資料  上一筆  下一筆
「雅典」,這是當代歐洲社會ê思想中心,mā是kui個希臘文化思想ê重鎮。Tī in眼光中,猶太人明明是就是「未開化」ê草芥民族。因為án-ne,當in看tio̍h使徒保羅傳福音ê時,當地人ê反應是「這行江湖ê teh烏白講kóa甚麼」、「伊kah-ná teh傳講外國ê鬼神」等,chit種話mā是表明in非常看bē起使徒保羅kah西拉等人所傳講ê福音。Ē-sái講是聖神teh做工ê時,即使tī人看起來真「低賤」ê事,mā是真高貴。

第18節,chia提起「伊壁鳩魯派kah斯多亞派ê哲學家」,這兩派lóng是當時雅典哲學界ê主流。前者創立tī主前306年,主張宇宙萬物lóng是由「永恆ê原子」所組成,m̄是上帝創造ê。人tio̍h努力tùi上帝管轄ê驚惶中脫離出來。M̄相信有神,主張信仰會hō͘人迷信、驚惶,而結婚會hō͘人失去自由,因為án-ne反對婚姻關係。後者,是由哲諾(Zeno)chit-ê人所創。伊因tī「斯多亞」教冊,因為án-ne,就用chit-ê名稱說明伊ê思想主張:認為理性chiah是一切ê中心。神明是世界ê靈魂,充滿tī kui個宇宙中,有泛神論ê傾向。人tio̍h努力工作,來減少慾望,因為慾望kan-taⁿ會帶hō͘人koh khah chē ê煩惱。

第19到21節,當in聽使徒保羅所傳講ê信息了後,開始感覺興趣,想beh了解koh khah chē,就帶伊到「亞略‧巴古ê議會上」,hō͘伊繼續見證福音ê信息。有人對使徒保羅所傳講ê信息感覺「非常奇異」,因為án-ne in想beh「知影究竟是甚麼意思」。

第22到31節,chit段經文記載是使徒保羅ê講道詞。Thang分做三點來看:(1)上帝是創造ê上帝,宇宙萬物ê主(第24節)。(2)上帝就tī咱中間,kah咱同在,咱是上帝ê子女(第29節)。(3)上帝希望人棄sak罪惡( 第30節),án-ne chiah有koh活ê ǹg望(第31節)。結果有人接受使徒保羅傳講ê信息。

第32到34節,雖然有人反對,mā有人看bē起使徒保羅所傳ê福音信息,m̄-koh iáu是有人聽mā信了,koh khah可貴ê是,受tio̍h感動而加入見證福音ê同工,chia特別紹介有「亞略巴古ê議員杜尼修,koh有一個名叫大馬哩ê婦人,kah另外一kóa人」。M̄-thang放棄傳講福音信息ê機會,無論tī甚麼所在,只要傳講,必定會有人聽,因為傳福音ê工作就是聖神ê工作。

重新查詢 專卷研經 使徒行傳系列
錯誤回報,請聯繫comm[@]fhl.net