使徒行傳 13章1節 到 13章12節   背景資料  上一筆  下一筆
十四章是使徒保羅kah巴拿巴第一pái傳道旅行ê記錄。這是初代教會第一pái差派人出去傳福音,而且值得注意ê是差派in出去傳福音ê,是tú成立無jōa久ê安提阿教會,卻m̄是耶路撒冷教會。

第1節,chit節提起「安提阿教會中,有幾位先知kah教師」。所謂先知,就是teh傳達上帝信息ê人。Á教師,是teh指指導人認bat上帝ê話ê老師。親像使徒保羅kah巴拿巴就是教師。Chit節提起五個人ê名,m̄-koh都無說明這五名ài做甚麼事,真有可能是講這五個人就是當時安提阿教會ê領導團。「安提阿」,這是敘利亞省內ê一個大都市,是羅馬帝國統治區內第三個大城,當時人口已經高達五十萬人,商業非常發達。

第2到3節,早期教會mā已經有「禁食祈禱」ê信仰生活。這五個人為tio̍h差派ê事工,特別舉行「禁食祈禱」。Mā thang看出對chit-ê tāi-chì ê頂真kah重視。當in得tio̍h聖神啟示了後,決定差派保羅kah巴拿巴兩人去傳福音,因為án-ne為in禁食祈禱外,mā「hō͘ in按手」祝福,了後就「派遣in出去」傳福音。

第4到5節,chia講in來到塞浦路斯島東邊一個「撒拉米」ê城市,這是希臘人ê城市,m̄-koh有bē少猶太人khiā起tī chia,約翰‧馬可mā去協助in。第一pái ê旅行傳道就是tùi第4節開始,到第十四章28節結束。

第6到12節,in一陣tùi塞浦路斯島siōng東邊ê「撒拉米」,「行遍全島,一直到à帕弗」,這是siōng西邊ê城市。Tī帕弗tú-tio̍h一個名叫「巴‧耶穌ê術士」,chit-ê人「自稱是先知」。其實,無人會自稱是先知。會án-ne自稱ê人,必定是會斂財ê假先知。伊因為認為家己kah總督關係良好,想beh獨自傳福音hō͘總督,其實,用意是想beh斂財,因為án-ne,當伊聽tio̍h總督邀請掃羅kah巴拿巴,想beh「聽上帝ê道」ê時,伊就想辦法beh阻止chit項事工,結果遇tio̍h被聖神充滿ê掃羅譴責,致使目睭失明。這tú好kah掃羅早期迫害教會ê情形仝款,因為hit時伊mā是努力teh阻止人信耶穌。

第9節,chia講掃羅改稱做保羅。掃羅是希伯來話,mā是耶路撒冷教會對伊ê稱呼。保羅是希臘語ê稱謂,是外邦人教會對伊ê稱呼。

第10到11節,使徒保羅詛咒巴‧耶穌,hō͘伊目睭chheⁿ-mê。這tú好說明使徒保羅有特殊ê能力,而這能力是來自聖神ê充滿。

第12節,chit節講總督親目chiu金金看見所發生ê事,就信了耶穌,「成做信徒」。

重新查詢 專卷研經 使徒行傳系列
錯誤回報,請聯繫comm[@]fhl.net