因為彼得kah哥尼流ê見面，是上帝親自安排ê。Mā因為án-ne，聖神就親自降臨tī所有聚會ê人中間，in一面注意聽彼得傳講ê信息，一面領受聖神ê充滿，感動in ê心靈。

第45到46節，使徒行傳作者路加一再表示聖神是目睭看會tio̍h ê（參考路加福音三：22，使徒行傳二：3）。Chia講聖神顯示出來ê，就是哥尼流厝裡ê人lóng會講「靈語」，並且mā會「頌讚上帝ê偉大」。Koh講，第45節mā提供另外一個真重要ê認bat：聖神mā會降臨tī外邦人ê身上，因為in mā聽信福音。聖神是伴跟tòe上帝ê福音事工，m̄是伴跟tòe族群，koh khah bē跟tòe人ê私慾、利益。為福音事工做見證ê人，á是喜愛注意聽福音信息ê人，lóng會得tio̍h聖神ê啟示、引chhōa。

第47到48節，koh一pái看tio̍h早期教會非常重要ê信仰行動：奉主耶穌ê名為人行洗禮。彼得tī哥尼流厝裡ê經驗，mā是後來使徒保羅tī腓立比tú-tio̍h呂底亞所經歷ê。