提摩太後書 1章1節 到 1章18節   背景資料  下一筆
使徒保羅寫hō͘提摩太ê書信,thang確定ê是伊人當時是羅馬帝國ê囚犯,tī訴訟期間,伊利用làng縫時間寫第一封書信hō͘提摩太,交帶伊留tī以弗所教會協助牧養事工。後來,伊koh繼續寫這另外一封書信hō͘提摩太,而chit封書信mā是最後ê一封書信,有點á ná親像遺冊仝款。使徒保羅寫chit-ê書信主要是因為教會內出現無正確ê信仰認知,伊一定tio̍h出面澄清,不beh hō͘信仰誤謬繼續惡化而危kah kui個教會,因為án-ne,伊特別提醒提摩太,對以弗所教會ê信徒所犯之錯誤信仰認知,一定會嚴厲指責。而且對tī教會內部有人用侮辱ê話譏諷伊,講伊是政府ê囚犯等事,則ài提摩太m̄免感覺見笑,因為伊是為tio̍h傳福音ê緣故chiah受難。使徒保羅期待勉勵提摩太,為tio̍h福音一定會堅守hit-ê「健全ê信息」,絕無法度妥協。

第1節,使徒保羅寫phoe lóng會先自我紹介,這mā是新約聖經時代ê羅馬人寫phoe之格式,除了發信人ê自我紹介,mā有受信人ê名,以及踏話頭ê請安語句等。使徒保羅tī phoe一開始隨時提起家己就是「奉上帝ê旨意」作耶穌基督ê「使徒」,這tī伊其它ê書信中一再出現。

Chit句「奉上帝ê旨意」,意思已經包含家己被囚禁tī監獄ê苦難在內。M̄是事事順利chiah是「奉上帝ê旨意」,卻是做一個人tú-tio̍h困境á是陷入苦難ê時,mā有上帝ê旨意在內面。

「藉tio̍h耶穌基督所應允ê新性命」,chit句話teh表明:當一般人看死刑犯是一種侮辱ê時,使徒保羅卻講tī耶穌基督ê福音中,性命是全新ê,m̄是沉淪ê(參考哥林多後書五:17)。原因是耶穌基督已經koh活,帶hō͘信ê人是koh活ê性命,是永恆ê性命。

第2節,tī前書伊講提摩太是「信仰上ê真kiáⁿ」,tī後書chia是用「親愛ê」。雖然用詞上有差別,其實lóng teh表明使徒保羅對提摩太真信任,mā有真大ê期待,伊kā提摩太當做親生ê kiáⁿ仝款。

第3到5節,chit段經文ē-sái講是使徒保羅對提摩太ê鼓勵,包括有:
一是伊日夜無停為提摩太祈禱。

二是想起提摩太kah伊分別ê時流出真誠ê目屎真感動。Tī提摩太前書
第一章3節,使徒保羅kah提摩太分開而流目屎,是因為伊beh去馬其頓,所以吩咐提摩太繼續留tī以弗所教會負責牧養ê工作。M̄-koh mā有可能是因為後來使徒保羅koh一pái被關進羅馬監獄ê時,提摩太有去看伊,chit時chūn ê分離hō͘ in有ná父子分開一般ê艱苦心。

三是傳承自頂一代ê美好信仰內涵。Chia使徒保羅hō͘咱看tio̍h一份珍貴ê資料,就是提摩太ê外祖母羅綺、老母友妮基,母女兩人tī信仰上lóng有真美好ê見證,而提摩太mā傳承chit份美好ê信仰品德。

第6到7節,chia使徒保羅koh一pái重述一pái tī前書第四章14節已經提過ê,tī伊為提摩太按手,差派伊為同工ê時,提摩太已經擁有聖神ê恩賜。Chit種恩賜有下列幾點:

一是有火熱ê心。火熱ê心用tī傳福音ê事工上ê時,就是隨時隨地lóng tī為傳福音設想,bē被環境ê困難所挫敗,mā bē餒志。

二是不懍neh。Chit句話對早期教會ê信徒來講,是一門真大ê考驗,因為ài面對羅馬政府掠ê危險,mā ài面對家己猶太同胞ê威脅。不懍neh,是因為聖神就是上帝ê氣力。

三是充滿力量。這是teh指性命充滿聖神力量ê人,必定會勇敢見證福音,hō͘人感受tio̍h伊ê性命充滿活力,m̄-nā ē-tàng忍受困難,mā ē-tàng承擔苦難,而且bē kah惡勢力妥協。

四是充滿疼心。這應該是本身是一個傳道者應該有ê基本要件。無夠額ê疼心,tī傳福音ê事工上必定會抱怨連連。

五是充滿自制。使徒保羅bat講一個tī信仰上成熟ê信徒,會結出美好ê信仰果子,其中有一項果子就是節制(參考加拉太書五:23)。Mā就是知影滿足,mā知影怎樣過頂真ê生活。

第8到9節,使徒保羅kā提摩太講,m̄-thang因為傳福音tú-tio̍h迫害á是苦難,就感覺見笑,認為上帝無祝福kah帶領,而是beh會因為為福音受tio̍h ê苦難,當做是teh分擔耶穌基督ê苦難仝款。Mā tùi chit節看tio̍h chit時伊已經被關入監獄中,一定受tio̍h攻擊講he是一間見笑ê事,m̄-koh伊ài提摩太有「為福音分擔苦難」ê看法。伊講上帝呼召一個人,並m̄是因為伊真優秀,chit點對提摩太來講有特別ê意義,因為伊當時tī以哥念、路司得兩地是人人o-ló ê對象。Mā可能伊會認為家己就是有chit種條件,chiah會hō͘ 上帝透過使徒保羅所揀選。M̄-koh使徒保羅提醒伊tio̍h注意:上帝呼召一個人來成做祂ê同工,是因為祂ê計畫kah恩典,並m̄是根據人ê條件,chit點認bat是非常重要ê。

第10到12節,chit節就是teh解釋第九節,上帝揀選人來成做福音ê同工,siōng主要ê目的,就是beh藉tio̍h耶穌基督ê死kah koh活,彰顯上帝拯救ê大愛。因為耶穌基督就是福音ê本身(參考馬可福音一:1)。基督教福音ê中心,就是teh見證耶穌基督ê死kah koh活。M̄-koh傳chit種耶穌基督koh活ê福音會tú-tio̍h苦難,並無因為án-ne有任何失志、餒志,因為知影「主koh來ê日子」,就ē-tàng坦然無驚惶交付上帝「付託」伊ê使命。

使徒保羅tī chia用「付託」chit-ê詞,意思是teh指kā siōng貴重ê物件交hō͘一個thang信任ê對象代替管理。因為án-ne,thang án-ne瞭解:福音並m̄是某一個人所有ê專利品,是主人ê。主人kā福音「付託」hō͘信任ê奴僕代管。「付託」ê另外一面,就是beh忠實、不欺騙,chit點是非常重要ê。

第14到15節,提摩太是使徒保羅siōng得意ê門生,因為án-ne,伊對提摩太ê期待mā非常高,伊要求提摩太忠實地「堅守」伊tùi使徒保羅領受「hit-ê健全ê信息」,並且是用「疼心」kah「信心」持守tio̍h。使徒保羅tī chia特別強調,m̄是人有力量做福音ê事工,是聖神tī人ê心內中,án-ne chiah ē-tàng「持守」tòa上帝所「付託」ê使命。

第15到18節,使徒保羅Tī chit段經文中,提起「腓吉路kah烏摩其尼」,chit兩個人是甚麼人?甚麼背景?只有名tī chia出現,其它資料都無。真可惜,無法度知影。Á「阿尼色弗」,真可能是使徒保羅tī以弗所傳福音ê時,得tio̍h ê果子,伊ê全家lóng歸屬耶穌基督ê名,並且iáu積極參與使徒保羅傳福音ê事工。當使徒保羅被掠ê時,一定有真chē人驚受tio̍h連累開始bih起來,mā有bē少人開始藉這攻擊使徒保羅,m̄-koh阿尼色弗卻m̄是án-ne;伊是勇敢地走到羅馬去探監,這對伊來講是一件真危險ê事,m̄-koh伊m̄驚因為án-ne會受tio̍h連累。M̄-nā án-ne,使徒保羅講阿尼色弗iáu帶hō͘伊真chē鼓勵。伊mā tī chia祝福阿尼色弗。

重新查詢 專卷研經 提摩太後書系列
錯誤回報,請聯繫comm[@]fhl.net