帖撒羅尼迦後書 3章1節 到 3章18節   背景資料  上一筆
Chit章使徒保羅ài帖撒羅尼迦教會信徒為伊kah其他同工代禱。Koh講,使徒保羅mā勸勉帖撒羅尼迦教會ê信徒ài認真工作,thang做美好ê見證。

第1到2節,使徒保羅請帖撒羅尼迦ê信徒為伊kah其他同工tī傳福音ê事工上代禱,thang hō͘福音ê信息ē-tàng真緊傳開來。伊特別提起祈禱中記念in,thang「脫離邪惡ê人」,這是teh指hiah-ê專門teh扯使徒保羅後腿ê猶太人,時常tī使徒保羅傳福音ê所在,煽動當地ê人民起來反對使徒保羅,hō͘伊kah眾同工tī傳福音ê事工上倍加辛苦。「並m̄是人人lóng信tùi主」,chit句話mā出現tī羅馬書第十章16節。

第3到4節,chia講「主是信實ê」,chit句話mā是kui本聖經teh見證「上帝是信實」ê信息。即使人m̄信,á是故意m̄-bat上帝,上帝iáu是信實(參考羅馬書三:2—3)。上帝ê「信實」指ê就是祂永遠bē變ê疼。祂已經應允ê事,必定會照應允實現,即使人改變了心意,上帝iáu是仝款不減輕對人ê疼(參考申命記七:9,詩篇一○○:5,哥林多前書一:9)。

第5節,伊mā祝福帖撒羅尼迦教會ê信徒,tī信心kah耐心上koh khah成長,體驗koh khah深切。

第6到10節,chit段經文清楚指出帖撒羅尼迦教會ê問題,就是tī信徒中間有人只知影講東講西,kui工游手好閒,不作工,卻想beh kah別人分享辛苦工作所得tio̍h ê食物。使徒保羅對基督徒ê生活態度要求真頂真,ná親像伊tī羅馬書第十二章1到2節所講ê,beh成做聖潔ê人,像活活ê祭品,kah一般人有無仝等等,chiah-ê lóng是伊對信徒ê要求。Tī伊ê觀念裡,基督徒應該有koh khah高ê標準過世間ê生活。伊ài chiah-ê閒閒無tāi-chì ê人,向伊kah其他同工學習,因為in tī帖撒羅尼迦ê時,mā是「辛苦勞碌,日夜工作」飼家己,然後koh利用時間認真傳福音,in留落來chit-ê hō͘該教會信徒thang做學習ê模樣。

「m̄做工ê人bē-tàng食飯」,這是一句猶太人ê俚語。主要是根據創世記第三章17到19節,上帝對人ê要求,ài人辛勞工作,而且汗流滿面chiah食得飽。真可能帖撒羅尼迦教會已經學習耶路撒冷教會「愛筵」ê聚會,有kóa人就利用chit種機會,專門享受食飯,而另外一方面卻bih tī背後講kóa對信仰無造就ê話。

第11到15節,使徒保羅勸勉chiah-ê終日無所事事ê會友,tio̍h親手做工來維持生活ê需要,而且bē-tàng tī教會中亂放話,用現代ê語言表達就是「八卦」,伊ài chit種人安靜落來。如果chit種苦勸iáu是m̄聽,伊主張siōng好ê方式就是kā伊區隔出來,mài kah伊做伙,主要是為tio̍h hō͘ chiah-ê人「感覺慚愧」,希望用chit種方式ē-tàng達tio̍h類似懲罰ê效果,hō͘ chit種游手好閒ê人知所警惕並改過。

第16到18節,chit段經文mā是使徒保羅書信ê特色,除了祝福信徒外,mā表示chit封書信是伊親筆所寫ê。M̄-koh有可能是由別人代筆,然後由伊親自簽名。

「保羅祝lín好」chit句話thang看哥林多前書第十六章21節、歌羅西書第四章18節,lóng仝款ê寫法。

重新查詢 專卷研經 帖撒羅尼迦後書系列
錯誤回報,請聯繫comm[@]fhl.net