撒母耳記下 9章1節 到 9章13節   背景資料  上一筆  下一筆
Tùi第九章到第二十章26節,chit段經文kah列王記上第一到二章,ē-sái講是大衛ê宮廷史。有關大衛宮廷內ê記事,因為牽涉tio̍h大衛個人kah家庭內ê問題,因為án-ne,屬tī宮廷正史ê歷代志作者有可能收藏了chiah-ê資料,m̄-koh卻無法度寫tī宮廷正史中。因為án-ne,有一種講法,認為chiah-ê資料可能是出tī歷代志史料ê作者,提供給撒母耳記作者(á是編者)。另外一方面,mā真可能是出tī先知拿單ê手稿資料,因為拿單mā寫大衛史(參考歷代志上廿九:29)。

Chit章ē-sái講是teh回應撒母耳記上第二十章14到16節、42節,有關約拿單kah大衛之間「生死之交」ê約定(參考撒母耳記上十八:3)。作者主要teh說明大衛確實是照kah約拿單ê約定執行,伊照顧了約拿單ê kiáⁿ米非波設,並且hō͘ in極大ê溫情。其實,咱mā thang理解:古代政權ê 替換lóng會有一個現象,就是對前代政權kiáⁿ孫盡可能「趕盡刣絕」,免得該政權ê kiáⁿ孫家族á是擁護者,趁機會復仇、顛覆。因為án-ne,作者有意藉tio̍h chit章史料凸顯大衛高尚ê人格情操,是一個信守諾言ê君王。

Thang講是為大衛錦上添花ê一章,除了頭前講伊秉公行義之外,chia koh講伊好款待掃羅ê家族。Siōng主要ê目的是teh說明大衛是一個尊崇上帝ê君王,因為án-ne,伊學習上帝以仁慈對待beh殺害伊ê掃羅家族。另外一方面,mā teh說明大衛是一個有智慧ê君王,伊án-ne好款待掃羅ê家族,對安撫北方ê眾領袖有收編ê作用,hō͘ in知影,真心誠意歸順大衛,會受tio̍h妥善ê照顧,甚至連伊ê家族kiáⁿ孫lóng ē-tàng受tio̍h庇護kah禮遇。同時,作者tī chia mā是beh說明,大衛是一個重視契約ê君王。伊bat kah好友約拿單(掃羅ê kiáⁿ)共同立落來真重要ê誓約,約拿單ài大衛「頭尾用仝款ê忠誠」對待伊ê全家(撒母耳記上二十:14—16)。chit-má大衛確實án-ne履行了kah約拿單之間所立ê約。不過後來,chit位受tio̍h大衛照顧ê約拿單kiáⁿ米非波設,卻是心懷不軌ê背叛了大衛(參考十九:24—30)。

第1到5節,tī大衛穩定了國家政局了後,伊開始關心起掃羅家族,因為án-ne,詢問幕僚是m̄是iáu有掃羅ê kiáⁿ孫活着?伊特別指出「如果有ê話」,伊tio̍h履行對約拿單ê應允(參考撒母耳記上二十:14—16、42),卻m̄是掃羅全部家族ê人。Chit種應允mā是teh表明伊是一個守約ê君王,chit點tī以色列文化,特別tī宗教信仰上,hō͘人認為是siōng重要ê基礎。M̄-koh大衛會án-ne詢問,mā teh表示掃羅ê家族差不多已經沒落到無人問津à。Chit時chūn,伊ê幕僚有人提起thang問掃羅厝裡有一個奴僕名叫「洗巴」ê(參考十九:17)。洗巴kā大衛講約拿單iáu有一個kiáⁿ「兩腿殘廢」(參考四:4)。Tòa tī瑪吉ê厝裡。大衛就án-ne隨時派人去接約拿單ê kiáⁿ米非波設來見伊。

第6到8節,大衛為tio̍h beh表示伊是一個信守諾言ê君王,因為án-ne,伊特別提起beh因為米非波設ê老父「約拿單ê緣故好款待」伊。這是因為約拿單確實有恩tī大衛,而且kah大衛之間訂有「生死之交」ê性命ê約。大衛對米非波設所講ê踏話頭是「mài驚」。米非波設當然會驚惶,因為古代政權替換,新任國王殺害對方ê kiáⁿ孫是普遍常見ê事,甚至hō͘人認為是「正常」(參考列王記上十五:25—30)。因為án-ne,thang想像會tio̍h,當米非波設聽tio̍h大衛王chhōe伊,而且kā伊帶入宮ê時,伊ê第一個反應就是跪tī大衛面前,非常驚惶kah不安ê表情完全顯露。M̄-koh大衛hō͘米非波設有特權,視伊ná親像王室家族中ê一員。而且iáu beh kā米非波設ê阿公「掃羅ê土地」lóng iáu hō͘米非波設。Án-ne,掃羅ê家族至少thang家己種作土地得tio̍h食物,m̄免óa靠別人施捨過日子,thang有尊嚴ê生存落去。大衛án-ne做,其實mā有政治層面上ê另外一種考量,就是hō͘北方支族ê人,看見大衛ê寬闊心胸,而因為án-ne會koh khah心服口服ê接受大衛ê領導。M̄-koh mā另外有一種講法,認為大衛hō͘米非波設進入王宮khiā起,成做王室家族ê一員,是beh kā它「軟禁」、「監視」,來預防伊ê族人,á是北方族群思變。Chit種情形tī古代中東社會,並m̄是無,ná親像列王記下第廿五章27到30節記載,巴比倫王以未‧米羅達就是好款待猶大王約雅斤,hō͘伊「終生kah巴比倫王同桌進餐」。M̄-koh即使是án-ne,至少大衛chit種決定,一定會造成北方族群á是掃羅遺臣感覺非常ê驚kah gāng去,in即使想beh思變,恐驚lóng會真oh chhōe-tio̍h ē-tàng出腳手ê點。米非波設一聽tio̍h大衛王對伊án-ne款待,hō͘伊感覺自已無法度承受大衛chit種厚愛,因為án-ne,伊真謙卑ê講家己「不如一條死狗」。Tī猶太人ê文化中,「狗」一向被形容是低賤ê動物(參考馬可福音七:27,路加福音十六:21)。因為án-ne,「死狗」表示非常lah-sap、死有chhun辜ê意思。

第9到10節,大衛真清楚知影,若是無親自對掃羅ê厝臣總管洗巴下命令,米非波設可能無法度hō͘洗巴聽命tī伊。因為án-ne,伊命令洗巴一定tio̍h為主人米非波設ê家族「種作田地」,並且ài kā收成lóng hō͘米非波設ê厝內人。若是洗巴違抗chit種命令,等於就是違背大衛ê命令仝款,後果會非常嚴重。Tī chia作者特別註明講洗巴有「十五個kiáⁿ,二十個奴僕」,這顯示原本掃羅所有ê產業bē少,包括洗巴ê kiáⁿ kah hiah-ê僕人,mā lóng tī chit pái大衛ê命令中,歸屬米非波設擁有(第12節)。有可能當掃羅kah伊ê四個kiáⁿ lóng往生後,洗巴就無koh服事米非波設,而且ná親像頭前敘述過ê,伊kā掃羅ê產業全部佔為己有。Taⁿ大衛kā它全部轉移點交hō͘米非波設。

第11到13節,洗巴只有ē-tàng應允照大衛王ê命令「一一去辦」,而大衛hō͘「米非波設不時kah王同席用飯」,用chit種方式向掃羅家族kah大衛家族ê成員表示:米非波設ná親像王室家族ê成員仝款,thang自由出入宮廷而無受限制。米非波設因為大衛chit項政策性ê決定,伊差不多就是tòa tī王宮裡,m̄-koh這並無表示伊有參與國家大事ê權利。

重新查詢 專卷研經 撒母耳記下系列
錯誤回報,請聯繫comm[@]fhl.net