撒母耳記下 8章9節 到 8章18節   背景資料  上一筆  下一筆
Chit段經文是kā大衛作以色列王了後ê所有戰績做一個簡短ê結語。雖然是輕描淡寫,m̄-koh作者用「上主hō͘大衛所向無敵,到處得勝」,chit句話講出上帝kah伊同在所得tio̍h ê祝福。

第9到10節,tī瑣巴北pêng有一個小國叫「哈馬」ê,伊ê王叫「陀以」,聽講大衛phah敗瑣巴ê事件,伊擔心大衛會乘勝追擊,引兵北驅直入其國境,因為án-ne,為tio̍h表示伊願意順服,免得戰爭造成koh khah大ê損傷。伊派出家己ê kiáⁿ「約蘭」當特使,帶貴重ê金、銀、銅等製成之禮物去當獻禮hō͘大衛。古代中東社會,若是派家己ê kiáⁿ當特使去kah有對敵關係ê對象講和,有兩種含意:一表示誠意kah順服,二表示即使因為án-ne而一定tio̍h留落來kiáⁿ當「人質」mā願意。

第11到12節,大衛kā所有擄獲ê戰利品、進貢品等「lóng獻hō͘上主,做敬拜ê路用」,表示大衛對上帝ê忠心,以及說明大衛確實真清楚,chiah-ê tī伊身上所得tio̍h ê勝利戰績,並m̄是伊ê,卻是上帝ê幫助chiah得tio̍h ê。因為án-ne,kā siōng好ê禮物獻hō͘上帝,等於是teh表明伊順服上帝。Chia特別記落來被大衛phah敗ê國家、族群,包括有「以東、摩押、亞捫、非利士、亞瑪力」等。這差不多涵蓋了所有tī巴勒斯坦ê大族。因為án-ne,mā thang講kui個巴勒斯坦地區lóng tī大衛統治之下à。

第13到14節,chit兩節記載大衛征服了以東人,並且派駐軍隊進入以東,表示以東完全在大衛ê統治之下。因為tī鹽谷有chē kah「一萬八千」ê以東人被大衛軍隊所殺害,mā因為án-ne hō͘ chit-ê山區ê民族就án-ne跋一下peh bē起來。M̄-koh在列王紀上第十一章14到22節記載tī大衛統治時代,以東王室ê人bat逃到埃及,並且利用埃及成立「流亡政府」,並m̄是完全lóng「順服」tī以色列ê統治。Á tī大衛往生後,所羅門統治時代,以東一直是一個不安定ê地區。一直到主前845年猶大約蘭王執政時代,以東chiah chhōe-tio̍h機會脫離猶大ê統治(參考列王記下八:20)。Tùi被大衛phah敗到脫離猶大統治來獨立,時間經過大約有160年時間。可見大衛tī敗了以東,而且大屠殺chiah-ni̍h chē以東人,iáu會派軍隊「駐軍」tī以東境內,就thang明白kah以東境內局勢一直不安定有關。其實,以東人是以掃ê後代,mā是非常強猛ê狩獵民族。

第15到18節,chit段經文ē-sái講是為大衛王朝一份簡單ê「內閣」名單。作者特別強調講大衛「秉公行義」治理以色列國。最後一句話寫tio̍h:「大衛ê眾kiáⁿ lóng作祭司。」chit句話比較正確ê講法應該是「官員」,而且高級官員。照歷代志上作者ê寫法是:「大衛ê眾kiáⁿ tī王ê左右擔任重要職務。」

重新查詢 專卷研經 撒母耳記下系列
錯誤回報,請聯繫comm[@]fhl.net