Chit段經文是大衛tī聽tio̍h先知拿單傳出上帝hō͘ in伊應允ê話了後深受感動，隨時進入khǹg約櫃ê聖幕中，用祈禱講出chit段伊心中感恩ê話。Chit段經文mā同時記載tī歷代志上第十七章16到27節。

第18到21節，大衛進入聖幕，因為內面khǹg tio̍h約櫃，表示上帝臨在ê所在，因為án-ne chia用「到上主面前」chit-ê詞。面對tio̍h上帝，大衛知影tio̍h謙卑落來，伊講家己「真無配得」、「家族mā不配」，因為大衛原本是一個顧羊人，hō͘ 上帝指示先知撒母耳膏立伊作以色列人民ê王。雖然上帝知影伊真有限koh軟弱，m̄-koh上帝iáu是beh揀選伊、眷顧伊，hō͘伊清楚知影上帝án-ne做，就是beh教導伊，hō͘伊成做一個好ê「牧者」帶領以色列人民。 

第22到24節，chit段經文mā是大衛ê信仰告白，伊表明對上帝ê認bat：獨一無二ê上帝，是無thang比並ê上帝。Tī chia，大衛用siōng簡單ê詞句講出上帝tī以色列歷史中，所行siōng重要ê事件—出埃及、入曠野、進迦南地。伊講這是上帝tī以色列民族身上所做「偉大奇異ê事」。第24節，chit節是回應第14節上帝對大衛ê應允，說明上帝kah祂ê子民kah立ê約，是立「永遠ê約」（參考創世記九：16、十七：7、13，民數記廿五：12，撒母耳記下廿三：5，耶利米書三十二：40）。Koh講，「永遠」，chit-ê詞一再出現tī第25節、第26節（兩pái）、第28節、29節等等。Chit-ê詞mā說明上帝是永恆ê，tī祂ê內面等於得tio̍h永恆ê性命仝款，而這「永恆ê性命」mā是耶穌tī約翰福音中教導ê中心主題。

第25到27節，tī chit段經文中，大衛祈求上帝實現所應允ê諾言。伊會án-ne chit種祈求，並m̄是伊m̄相信上帝親自透過先知拿單對伊所講ê話，卻是因為上帝ê應允大過伊所ē-tàng承受ê重。因為án-ne，伊用祈禱懇求上帝實現chiah-ê應允。Á chit種祈求，mā tú好顯示出人ê軟弱kah有限，對tī上帝ê恩典lóng是抱tio̍h懷疑kah不安ê心。Mā有另外一種看法，認為大衛ân-ân掠tiâu上帝ê應允m̄放，透過祈禱向上帝表明一定會得tio̍h上帝所應允beh hō͘伊kah伊ê kiáⁿ孫ê福氣。第26節ê chit句「上主—萬軍ê統帥是以色列ê上帝」，表示上帝就是以色列ê帶領者、統治者、指揮官。Á這tùi過去上帝幫助大衛phah敗非利士人、亞瑪力人等戰役thang看出，只要有上帝ê應允出兵，必定會phah贏。大衛表示伊會án-ne祈禱，是根據上帝對伊ê應允。大衛ê意思是表明家己並無貪婪，á是過份ê祈求。卻是因為有上帝ê應允在先前，伊chiah敢án-ne祈求上帝實現所應允ê一切。

第28到29節，大衛講上帝對伊所應允ê是非常「奇妙」ê。因為這是一般人oh得tú-tio̍h ê奇異恩典。Chia大衛用「至koân」kah「獨獨」，除了表明chit位拯救以色列人出埃及ê創造者，是獨一ê上帝外，mā teh說明上帝有獨有特殊ê作為。(b)「永遠信守你ê諾言」，真清楚，強調上帝是「信實」ê神。Teh祈禱ê最後，大衛koh一pái為伊ê後代祈求上帝繼續施恩。