Chit段經文中特別紹介大衛身邊三個重要ê軍事武kā，撒母耳記作者kā它稱做「三巨頭」。Chit段描述chit三位重要軍事將領ê事蹟，mā同時記載tī歷代志上第十一章10到19節中。對照兩處經文來看，就會發見差別非常大，m̄-nā是勇士ê名有別，就連記事ê內容mā差別真大。撒母耳記ê記事比較完整，作者詳細寫出「三巨頭」ê名kah事蹟。M̄-koh歷代志作者只有寫兩個，第二個只寫出名，無寫出伊ê事蹟，無標明第三個勇士ê名，m̄-koh卻有第三個勇士ê事蹟。真可能，歷代志作者是kā第三個戰役kah第二個混合編輯做伙了，mā就是kā第三個勇士沙瑪ê事蹟，lóng歸併tī以利亞撒ê事蹟中。不過，後半段記載有關大衛m̄ lim三勇士冒tio̍h性命危險去取水ê事跡，雖然文字上有kóa許差別，m̄-koh kui個過程來講，是大同小異。

第8到12節，chit段經文記載三個勇士ê事蹟。Tio̍h注意ê，是chia所提供ê名，往往m̄是代表一個單獨ê個人，卻是chit-ê人領導之下ê部隊。因為án-ne，大衛身邊應該有兩種特別部隊，一是編制khah小ê，另外一個是比較大ê。chit-má所提起ê三個勇士，應該是屬tī比較小，類似「突擊部隊」ê組織型態。

第一位勇士是「伊革捫人約設‧巴設」，是chit三個「巨頭」ê首領，意思是先鋒。Tī歷代志提供ê名是「哈革摩尼宗族ê雅朔班」。伊是一個真有力量ê勇士，thang「用矛鑿死八百人」。

第二個「亞合族人朵多ê kiáⁿ以利亞撒」，這kah歷代志所提供ê名仝款。Chit-ê「亞合族」就是便雅憫支派ê「亞何亞」kiáⁿ孫（參考歷代志上八：4）。有一pái「以色列人後退了」，tī歷代志koh khah清楚寫明chit句話ê意思是「以色列人逃走」，這是phah敗仗ê現象。M̄-koh這支隊伍並無後退，繼續堅守tio̍h據點，直到phah敗非利士人為止。M̄-koh in phah贏ê時，「只剝光敵人屍體上ê盔甲」，意思是以色列人民卸下非利士軍人身上ê武裝做戰利品。

第三個是「亞基ê kiáⁿ沙瑪」，ná親像第二個仝款，當以色列戰敗，真chē人teh逃竄ê時chūn，沙瑪一屑á 都無kiu-kiu，伊khiā tī非利士人ê面前，勇敢抵擋到最後，結果伊mā獲勝à。Ná親像作者所強調ê，若m̄是有上帝ê幫助，一定會輸得真慘。M̄-koh因為有上帝ê幫助，tī siōng艱困ê戰況下，以色列人iáu ē-tàng反敗為勝。

Chia講非利士人是聚集tī「扁豆田裡」，這表示以色列人若輸了chit pái ê戰爭，可能就會引發糧荒。就ná親像今á日為tio̍h保護糧食ê穩定，一定tio̍h無顧一切奮戰到底仝款。

第13到17節，這是另外一段記事，tī歷代志上第十一章15到19節mā有記載。照撒母耳記ê寫法，chit段mā可能是tī增加頭前紹介過ê三位勇士ê事蹟。對照chit兩段經文ê記事來看，會發見大部分記載是仝款。

「收割ê時chūn」ê chit場戰役，真可能是發生tī大衛teh逃避掃羅王追殺ê時chūn（參考撒母耳記上廿二：1—4），如果是發生teh逃避掃羅追殺ê時期，án-ne，chit時ê大衛，伊ê指揮中心，就是設立tī亞杜蘭洞ê所在。M̄-koh mā有可能是發生tī大衛tú執政ê初期（參考五：17—18），若發生tī伊執政ê時，he就是大衛tú取落來耶路撒冷初期，非利士人無希望以色列所有支派聯合起來成做一完整ê王國，就án-ne聚集軍隊tī利乏音谷ê所在，準備ài攻打大衛，hō͘伊來一個下馬威。Á「收割ê時chūn」ê chit句話，thang續落去tī第11節提起ê非利士人攻打以色列，有一個重要ê用意，就是kah糧食ê需求kah控制有密切關係。Chit場兩軍對峙，是kah保護á是搶奪糧食有關。

Chit時chūn「一陣非利士人佔了伯利恆」，已經侵入以色列人民siōng重要ê糧倉。就tī chit時chūn，有三個勇士真勇敢地無顧性命危險，闖過非利士人ê營區伯利恆城門邊ê井裡取水tńg來，beh hō͘大衛解除思鄉之痛。這mā表示出兩種意義：一是in bē了解大衛並m̄是真正想伯利恆ê水，卻是想beh收復chit-ê城。二是in有能力闖入非利士人佔領ê城，表示防守上有破痕。「大衛不lim」，因為ná水是三位勇士冒tio̍h性命危險chiah取到ê故鄉之水，mā ē-sái講是siōng珍貴ê水，伊beh kā chit-ê siōng珍貴ê水奉獻hō͘上帝。表示siōng好ê、siōng珍貴ê奉獻hō͘上帝。Koh khah重要ê，大衛kā它「當祭物獻hō͘上主」，這表示大衛tī出兵chìn前舉行祭典，向上帝祈求，伊向上帝chiù-chōa一定會攻落伯利恆。