Chit段經文講述有一個聰明ê cha-bó͘人，為家己所khiā起ê「亞伯‧伯‧瑪迦」城鎮解圍ê經過，mā結束loh示巴叛亂ê事件。

第14到15節，chit句「示巴行遍以色列各支族ê地區」，表明示巴ê叛亂運動，確實真辛苦mā真孤獨。真無簡單chiah，伊chhōe-tio̍h一個歇腳ê所在，chit-ê城名叫「亞伯‧伯‧瑪迦」，這是設tī以色列北部ê邊界，tī但ê北邊。「比基利」宗族ê人跟tòe示巴，這宗族除了chia出現之外，其它經文m̄-bat出現過。In被示巴遊說成功，跟tòe伊進入亞伯‧伯‧瑪迦城。約押ê部隊趕到chia城，mā開始進行攻城ê工事，包括築土壘，kah挖地洞等。

第16到19節，當約押kah亞比篩圍攻chit座城ê時，hit-ê城有一個既聰明koh有智慧ê cha-bó͘人，為tio̍h beh拯救了整座城免tú-tio̍h被屠刣ê厄運，伊出面tī城牆頂表示beh kah約押講話，因為居民lóng看tio̍h約押ê軍隊已經teh進行攻城ê築防工事，而示巴所帶來ê人力、兵員顯然無夠額來捍衛hit-ê城ê安全。伊用講故事ê方式對約押講，hit-ê城ê居民一向是siōng和平、siōng忠chiâⁿ ê城，mā因為hông稱做「偉大ê城」。伊問約押為甚麼beh毀滅hit-ê城？伊提醒約押摧毀hit-ê城，等於是「消滅上主ê產業」，mā等於teh摧毀上帝賞賜ê恩典，án-ne kan-taⁿ會引起koh khah chē ê不滿。婦人已經teh暗示約押，摧毀hit-ê城，對約押kah大衛一點á利益mā無，是得不償失ê愚戇策略。

第20到22節，約押聽了後，隨時表示絕對bē摧毀hit-ê城，只要kā bih起來tī城內比基利ê kiáⁿ示巴交出來，就會下令撤軍。Á這婦人一聽，隨時表示會kā示巴ê頭tùi牆上丟落去hō͘約押。這聰明ê cha-bó͘人tńg去向城內ê居民獻策，城裡ê居民chiâⁿ實kā示巴ê頭砍落來丟hō͘約押。Á約押mā照約束率領軍隊tńg去。解救了hit-ê城被圍困ê危機。

第23到26節，這是一份新ê內閣官員名單，kah頂pái ê內閣官員名單相差無大（參考八：15—18）。因為頂pái押沙龍叛變致使宮廷人事lóng變。chit-má大衛重掌政權，重新整頓領導中心mā是必要ê工作。M̄-koh khah重要ê是，撒母耳記ê作者就是用內閣名單來表明大衛ê政權已經穩固落來，無koh有內憂外患ê問題出現。

約押koh一pái當全以色列「軍隊ê元帥」。

「比拿雅」則取代了以太成做大衛身邊ê「侍衛長」。

「亞多蘭」，負責有關勞工ê事務。Chit種「強徵」人民來當勞工，ē-sái講是大衛時代siōng無好ê國家政策。這mā是後來為甚麼北部十支派ê人，會派出耶羅波安代表去向所羅門ê kiáⁿ羅波安，要求減輕稅賦ê原因（參考歷代志下十：3—4），chia所指ê「稅」，其實就是包括了「勞力稅」在內。M̄-koh chit種「稅」是siōng無好ê稅賦，因為這等於是kā真重ê負擔加諸tī人民ê身上，chit種作法只有tī奴隸ê身上看會tio̍h，m̄-koh大衛、所羅門、羅波安等卻lóng kā它khǹg tī家己ê同胞身上，結果是加速人民ê生活陷入困苦中。

「約沙法作史官」，伊mā是繼續原本ê官位（參考八：16）。

「示法是王室書記」，原本tī撒母耳記下第八章17節記載ê是「西萊雅」，chit-má名改寫做「示法」。其實是仝一個人。

撒督kah亞比亞他lóng是祭司，職位無變。「以拉」當祭司，chit-ê「祭司」一詞，mā thang當做「領袖」解釋。