撒母耳記下 2章1節 到 2章11節   背景資料  上一筆  下一筆
Tùi第二章開始,一直到第五章3節,是記載大衛tùi洗革拉移轉到希伯崙稱王ê經過。大衛tùi原本只有tī猶大南部管理一個洗革拉城,變成tī希伯崙當全以色列民族ê王。

Chit段經文描述大衛王想tio̍h離開非利士人ê城市洗革拉。原因是chit pái ê戰役是非利士人大勝。即使大衛繼續留tī洗革拉城,mā bē受tio̍h尊重。顛倒,伊隨時可能會成做非利士人ê眼中釘,mā可能對伊hō͘取hō͘求,hō͘伊夾tī非利士人kah以色列人民中間oh得生存。

Koh講,大衛mā看tio̍h家己ê同胞會失去領導者,而過去伊一再phah贏非利士人,連非利士人嘴中mā講出「掃羅刣死千千;大衛刣死萬萬」chit句歌頌ê詩歌(參考撒母耳記上廿一:11、廿九:5)。因為án-ne,對伊來講,久長khiā起tī非利士人城市中,並m̄是上上之策。伊認為家己應該離開洗革拉城,tńg來到家己同胞ê城市去chiah是正確。就án-ne伊求問上帝,並且得tio̍h肯定ê答覆。作者透過chit種方式teh說明:大衛一切做tāi-chì,lóng是遵行上帝ê旨意。

第1到4節a句,tī料理掃羅kah約拿單往生ê事了後,大衛求問上帝kám bē-tàng上猶大ê一個城鎮,卻m̄是指明beh上tó一個城鎮。這表示伊是完全聽從上帝ê指引,並m̄是家己決定了後,chiah問是m̄是thang。當上帝回答講thang了後,伊chiah koh繼續問去tó位?得tio̍h ê回應是去「希伯崙」,是猶大南部siōng重要ê城市,mā是一個古老ê以色列人城鎮(參考創世記十三:18、廿三:2),是猶大支派所分配到ê土地(參考約書亞記十五:13)。Á大衛mā是屬tī猶大支族ê人,因為án-ne,到希伯崙等於是tńg來歸家己ê宗族。Án-ne,大衛隨時就帶家眷離開洗革拉城,進入猶大ê中心城邑希伯崙地區。因為大衛m̄-nā是帶家己ê家眷,mā帶家己ê部下去,這表示大衛目前已經有真chē兵力,chiah-ê兵力bat phah敗過強猛ê亞瑪力人。雖然大衛並無進駐希伯崙城內,m̄-koh伊kah部下、家眷lóng已經來到希伯崙ê附近城鎮tòa落來。這mā表示此後希伯崙chit-ê猶大ê重要城鎮,m̄免koh再擔心有外族人來進攻、掠奪。當大衛搬到希伯崙,猶大人馬上就「膏立大衛作猶大ê王」,m̄-koh tio̍h注意ê是:chit時膏立大衛為「猶大ê王」,並m̄是全以色列十二支派共同ê動作,卻是只有猶大支派,極加有附近西緬支派ê參與(參考士師記一:3)。其它ê支派lóng是繼續擁護掃羅ê kiáⁿ他施波設。因為他施波設有大將軍押尼珥擁護tio̍h,表示伊握有軍事權柄。M̄-koh這mā已經teh暗示:猶大支派kah來自便雅憫傳承ê掃羅家族,以及北方以色列伊支派之間,已經出現某種程度上ê嫌隙。

第4節b句到7節,chit段經文thang看出大衛ê聰明,伊知影怎樣籠絡猶大以外其他支派。這tùi伊teh處理掃羅kah約拿單ê後事thang看出來。伊beh hō͘其他支派ê人知影,伊對掃羅確實是尊崇、禮遇有加。當伊聽tio̍h「基列ê雅比人埋葬了掃羅」,就派使者去kah雅比人講鼓勵、肯定ê話,同時mā hō͘ in知影大衛已經成做掃羅王位ê繼承者。大衛祈願信實ê上帝永遠愛護tio̍h雅比人。伊mā應允會好款待in,希望用chit種方式得tio̍h雅比城人ê信賴,會轉而支持伊繼承掃羅ê王位。若是ē-tàng得tio̍h雅比城人ê支持,對大衛來講,會加添真chē力量。特別是chit-ê城ê人,比起基伊拉城ê人是koh khah有義氣。

第8到11節,tùi chit段經文thang看tio̍h掃羅軍隊ê元帥押尼珥,帶掃羅ê kiáⁿ他施波設tī戰況危急ê時chūn逃過約旦河到「瑪哈念」去避難。Kā chit段經文koh再比較第三章7到11節,就thang看出他施波設是一個軟弱ê領袖,而押尼珥chiah是真正有實力ê軍事將領。統治ê範圍包括有:「亞冊」、「耶斯列」、「以法蓮」,「便雅憫」等地帶,chia講「事實上是全以色列」,chit句話真清楚說明,大家繼續承認掃羅ê kiáⁿ他施波設ê合法性。雖然是有元帥押尼珥tī背後操控tio̍h,m̄-koh外表上則屬tī「正統」。Á他施波設當以色列ê王ê時chūn,年紀是「四十歲」,m̄-koh卻伊統治ê時期只有短短「兩年」時間而已。Chia ê「兩年」,真可能是對照大衛tī希伯崙當猶大王ê最後兩年chiah-tio̍h。

重新查詢 專卷研經 撒母耳記下系列
錯誤回報,請聯繫comm[@]fhl.net