撒母耳記下 19章15節 到 19章39節   背景資料  上一筆  下一筆
Chit段經文teh描述大衛決定tńg去耶路撒冷重掌政權途中,tú-tio̍h迎接伊ê人ê姿態。Tī chit段經文中,特別提起屬tī便雅憫支派mā是掃羅ê親人而且bat侮辱過伊ê示每,伊帶「一千」便雅憫支派ê人同齊來,聲勢確實真浩大。Koh來就是洗巴,伊是米非波設ê奴僕,mā是掃羅ê家僕。伊帶領家己ê十五個gín-á kah二十個奴僕lóng來見大衛。Koh來就是掃羅ê孫á、約拿單ê kiáⁿ米非波設。以上三位lóng是屬tī掃羅ê家族,tùi chia可見掃羅ê家族對大衛確實有bē少敵意。另外一位是tī伊避難ê時,提供豐富物資hō͘伊kah部屬ê巴西萊等人。

第15到17節,「猶大人到吉甲」來歡迎大衛tńg來耶路撒冷,這m̄是出tīin主動,卻是大衛親自派祭司撒督kah亞比亞他兩人去向in提醒了後,in chiah決定表明全心支持ê態度。Á「示每」tī大衛逃離落難ê時bat極盡所ē-tàng地侮辱大衛,包括對大衛咒罵、丟石塊kah土(參考十六:5—6、13)。chit-má,伊看tio̍h大衛ê軍隊已經敉平了押沙龍ê叛變,重掌政權,隨時趕緊出來迎接大衛,這真正是牆頭草ê典型人物。伊帶便雅憫支派「一千人」來迎接大衛,真有可能是走chhōe庇護ê一種手段,beh hō͘大衛知影,伊有「千人」為後盾,mā teh顯示伊有地方角頭ê角色。「洗巴」,chit位原本是掃羅家族ê奴僕,bat被大衛命令一定tio̍h歸還掃羅所有財產hō͘約拿單ê kiáⁿ米非波設。伊帶「十五個kiáⁿ kah二十個奴僕同齊來迎接大衛。

第18到23節,當示每坦覆 (thán-phak)tī大衛面前,並且承認家己過去所犯侮辱大衛ê 錯誤 ê時,大衛身邊將軍亞比篩認為應該隨時處死示每,m̄-koh大衛m̄-nā赦免示每,而且iáu當面責難亞比篩kah約押,認為無需要in ê意見。其實是意有所指,暗指tī押沙龍被殺害ê事件上,約押公然抗命之外,koh khah tī事件了後,iáu語帶恐嚇ài大衛隨時班師回朝。大衛ê chit句「我chit-má是以色列ê王」,真清楚teh說明:若是無伊ê允准,任何人lóng bē-tàng有違背伊命令ê舉動。大衛大概意識tio̍h,約押á是亞比篩真可能會chhōe機會殺害示每。因為án-ne,伊公開宣示無任何一個人會hō͘處死殺害。大衛án-ne講是真有心機ê,伊清楚知影示每所帶來ê便雅憫支族「一千人」,就是teh表明示每有能力帶領便雅憫支派ê人。Á便雅憫支派雖tī以色列支族中是siōng弱小ê一個支派,m̄-koh卻是siōng有戰鬥力ê一個支派,又koh是過去掃羅王朝ê kiáⁿ孫。如果大衛chit-má出手打擊示每,真可能會hō͘便雅憫支派ê人感覺不安,chit對大衛來講並m̄是一件好事。M̄-koh這並無表示大衛就真正赦免示每。當所羅門繼承王位chìn前,伊就特別交帶所羅門,講示每bat侮辱過伊,因為án-ne,大衛ài所羅門mài hō͘示每「逍遙法外」,一定會「想法子」kā示每「處死」(參考列王記上二:8—9)。後來所羅門穩定政權了後,果然án-ne做(參考列王記上二:46)。

第24到25節,大衛好朋友約拿單ê kiáⁿ米非波設,tī大衛逃離耶路撒冷王宮了後,伊就m̄-bat「洗過腳、修過鬍鬚、洗過衫褲」等,這tī以色列人民ê風俗,是一種表示一種極大哀傷ê狀態,有時是厝裡teh辦理喪事ê時chiah有ê款。這teh表示大衛ê受難,伊mā tòe受難。伊會án-ne用chit種態度表明哀傷,是kah大衛好款待伊有關,mā用chit種方式來表明伊對大衛ê忠心(參考九:11b—13),而伊用chit種無修整ê儀容出現tī大衛面前,就是一種siōng好ê證明,tú好說明洗巴講白賊、造謠誣陷米非波設參與政變ê事,完全是子虛烏有ê事。大衛一看見伊,就先問伊為甚麼無跟tòe逃離耶路撒冷。其實,眾人lóng知米非波設是跛腳ê人,若伊kah大衛離宮出走,對大衛來講反tńg是thiám贅、負擔。因為án-ne,chit句問話並m̄是大衛ê本意,大衛chit句話ê意思是teh指米非波設怎樣會kah押沙龍同齊背叛伊。

第26到28節,米非波設聽tio̍h大衛án-ne質問,心中必定有真chē無奈。Chit段經文mā講米非波設已經知影洗巴tī大衛面前奏了伊一摺,因為án-ne,米非波設有必要說明家己已經tú-tio̍h到冤屈ê實況。伊hō͘大衛知影家己被奴僕洗巴出賣,伊mā相信大衛所做ê每件事,lóng有上帝ê指示,bē冤屈別人。因為án-ne,米非波設願意隨在大衛處置伊ê事,伊清楚知影家己ê處境。過去王朝替換,特別是tī完全無相仝ê朝代替換下,前代ê kiáⁿ孫真可能lóng會遇tio̍h滅族ê運命。M̄-koh大衛卻因為kah米非波設ê老父約拿單之間有「生死之交」ê約定,m̄-nā無殺害米非波設kah伊ê全家,iáu hō͘伊有榮譽進入王宮,而且ē-tàng kah大衛同桌共席。因為án-ne,chit-má伊深知家己被家僕誣陷,伊並無想beh koh奢求大衛hō͘伊tńg來復到以前有hit種風光ê宮廷生活。這mā thang看出米非波設雖然是一個「殘廢」ê人,m̄-koh卻是一個真識實務ê人。伊知影當大衛問伊為甚麼無跟tòe出宮ê時,就已經知影大衛對伊有真深ê成見à。

第29到30節,大衛清楚了實況了後,卻mā陷入困境中,因為tī大衛逃離王宮,陷入siōng困境ê時,bat有洗巴ê資助(參考十六:1)。因為án-ne,chit-má伊知影洗巴講白賊,hō͘伊對米非波設有真大ê誤解,這hō͘伊感覺非常困擾,因為án-ne,伊無想beh koh聽有關洗巴欺騙ê事,因為hit種會hō͘伊感覺見笑,mā同時顯露出伊並m̄是真正「親像上帝ê天使仝款」。因為án-ne,伊mā接納米非波設ê講詞,並且kā原本已經答應全數hō͘洗巴ê財產,重新分配一半iáu hō͘米非波設。大衛chit種決定,tú好講出伊特有ê個性,就是感情用事ê成分比理智ê chē。Á米非波設真聰明,伊深知家己ê狀況,因為án-ne,teh對大衛表明忠心之外,伊表示財產ê事,並m̄是伊ê心思所念。因為án-ne,伊認為thang kā所有財產hō͘洗巴,伊只要大衛平安tńg到王宮就hō͘伊安心了,chit種態度,tú好說明米非波設確實是對大衛忠心ê人,tú親像伊ê老父約拿單仝款。

第31到33節,這是大衛tú-tio̍h第三位bat幫助過伊ê「基列人巴西萊」,伊來迎接大衛tńg來耶路撒冷。伊ē-sái講是大衛ê恩人。chit-má大衛重掌政權,大衛邀請chit位年老ê財主去耶路撒冷,大衛beh照顧伊ê晚年。這mā說明大衛是一個真有感情ê君王。

第34到37節,chit段經文是巴西萊懇辭了大衛ê邀請。伊講家己所chhun落來ê日子無chē,無想beh koh過hit種榮華富貴ê生活。而且年紀mā大了,lim食真有限,伊iáu有臭耳lâng ê問題。伊講只希望陪大衛行一小段路就心滿意足,這是非常chán ê一種態度。伊kan-taⁿ求大衛照「妥當ê」方式對待伊ê kiáⁿ金罕。

第38到39節,大衛hō͘巴西萊明確ê應允,一定會好好á好款待巴西萊ê kiáⁿ,後來mā交帶伊kiáⁿ所羅門一定會án-ne做(參考列王記上二:7)。

重新查詢 專卷研經 撒母耳記下系列
錯誤回報,請聯繫comm[@]fhl.net