撒母耳記下 14章1節 到 14章24節   背景資料  上一筆  下一筆
Chit章teh描述大衛tī經過三年悲傷ê沉澱了後,開始想起押沙龍。原因是大衛ê第二kiáⁿ基利押chit時已經無tī。M̄-koh大衛身邊大將約押koh khah是真會察言觀色ê幕僚,伊深知大衛ê軟弱,因為án-ne,當押沙龍出走三年了後,伊認為大衛一定tio̍h處理王位繼承ê問題,卻一直無動靜,就án-ne伊想出一個辦法hō͘大衛kah押沙龍chit對父子ē-tàng「和好」。

Chit段是記載約押決定提醒大衛一定tio̍h思考王位繼承ê問題。Á chit段經文mā講出約押tī大衛幕僚團中特殊ê地位,伊m̄-nā是一個常勝將軍,而且一個手段殘酷ê軍人(參考列王記上十一:16—17)。Mā因為伊對大衛ê厝事kah私事了解真chē,大衛tī晚年往生chìn前,特別交帶繼承王位ê所羅門一定bē-tàng hō͘約押「善終」(參考列王記上二:6)。M̄-koh即使是án-ne,大衛犯罪ê事,iáu是hō͘一一記錄落來,並無因為約押替伊掩蓋(khàm)了罪行,而hō͘大衛ê惡行被遮蓋起來。因為上帝鑒察人tī暗中所做ê一切。

Kā chit段經文比較第十二章有關先知拿單講ê譬喻故事,就會發見譬喻方式真類似。先知拿單是宮廷先知,而約押則以色列siōng具影響力ê軍隊統帥。伊kah大衛ê親近關係,tùi chit件事thang看出。

第1到3節,chia特別提起「洗璐雅ê kiáⁿ約押」,chit種用詞有一個用意,beh表明chit時約押扮演ê角色,就是大衛ê「外甥」,beh向大衛進言ê是「家事」,卻m̄是國王kah將軍之間ê國事。約押知影tī無人敢向大衛提起王位繼承ê問題,伊決定想辦法hō͘大衛採取行動。大衛tī國家大事ê決斷上真有魄力,m̄-koh對家務事卻往往顯得非常懦弱。Ná親像伊對暗嫩所犯ê罪行,只是「非常受氣」,卻無懲罰伊ê行動。就án-ne約押去chhōe一個「提哥亞」聰明ê婦人去見大衛王,chia所講ê「聰明」,意思是真會「講故事」、「講譬喻」,ná親像先知拿單仝款。約押ài chit-ê婦女用穿喪服、不梳頭chit種特殊ê打扮來引起大衛ê注意。Chit種方式所beh表達ê意義,是chit-ê寡婦一直無親人來娶伊入門,照顧伊(參考申命記二十五:5—10)。約押並且交帶這婦人講「Kā我kā你講ê話對王講」,伊所講ê話記載tī第5到7節。

第4到8節,因為chit-ê提哥亞ê婦人是穿插守寡衫褲,而且無梳頭毛,這表示伊一直生活tī困苦中間。Chit-ê婦人請求大衛幫助伊ê時,大衛無拒絕伊。Tùi第5到7節ê記載thang清楚約押kā chit位婦女講tio̍h對大衛講ê話ê內容。主要有下列幾點:(a)伊是一個「sàn-chhiah寡婦」,丈夫已經死去,m̄-koh kiáⁿ卻無種作能力。(b)「其中一個刣死了另外一個」,明顯是刣人者會hōng判處死刑(參考出埃及記廿一:12)。Á chit-ê cha-bó͘人ê話真具隱喻,teh暗示大衛ê兩個kiáⁿ,其中一個被刣死,而刣人ê押沙龍一定tio̍h判處死刑。(c)這婦人表示,若是照摩西律法ê規定,伊kā失去繼承產業ê最後希望。伊講出非常重要ê一點,就是如果全lóng照律法規定去行,並無一定公道,mā有可能因為án-ne而成做近親繼承伊丈夫留落來ê產業(參考民數記廿七:11)。即使是án-ne,mā kā造成近親之間彼此爭奪財產ê結果。大衛聽完了後,決定beh替這婦人處理chit件家務事。其實約押ài這婦人編造chit段故事,主要是teh暗示大衛,伊若koh再m̄ hō͘押沙龍tńg來宮,真可能造成王室內亂,大衛ê眾kiáⁿ會為tio̍h爭奪王位來彼此殘殺得koh khah嚴重。Á後來mā證明約押ê顧慮是事實,因為大衛ê眾細kiáⁿ就是為tio̍h爭奪王位,而彼此殘殺。

第9到11節,這婦人koh對大衛表示,這是伊厝裡ê事,無希望因為án-ne hō͘國王受tio̍h無妄之災。大衛表示伊ē-tàng hō͘婦人m̄免因為chit件事而操心,伊ài chit-ê婦人安心離開。並且表示beh庇護chit-ê婦人免受親人、厝邊ê攪擾。Chit-ê婦人koh進一步講,希望大衛「向上主」祈禱,意思是beh大衛以上帝ê名chiù-chōa,「免得報血仇ê人繼續殺戮」,這真清楚說明tī大衛無裁決chìn前,chit件「報血仇」ê行動iáu是會繼續存在。因為án-ne,伊擔心連伊「kan-taⁿ存ê kiáⁿ mā刣死」,這會hō͘伊陷入性命ê夢魘。大衛chiâⁿ實用上帝ê名chiù-chōa。

第12到17節,大衛顯然iáu聽m̄-bat這婦人想beh講述ê意義。因為án-ne,這婦人chiah會要求繼續說明。Á大衛真正mā聽m̄-bat,所以同意這婦人ê請求。Chit-ê婦人就進一步說明她beh講ê譬喻,是直接對大衛講ê,chit種態度顯然真唐突。因為一個婦女beh見國王,已經m̄是一件容易ê tāi-chì,taⁿ卻teh講述譬喻了後,直接道出國王ê問題,這一定需要冒tio̍h性命危險。伊直接指出大衛應該ē-tàng hō͘押沙龍tńg來,伊ê意思是:只要大衛王首肯,押沙龍就ē-tàng被接納,重頭tńg來王宮。這婦人主要teh說明:若是國王無特赦押沙龍,就算伊tńg來到耶路撒冷,mā會面臨被掠而判處死刑ê結果。因為án-ne,伊要求大衛mài hō͘押沙龍面臨被刣ê結局。伊o-ló「王親像上帝ê天使仝款」,chit句話mā說明當時ê人看待國王ê角色,就是上帝所揀選ê使者(參考但以理書四:17,羅馬書十三:1—2)。伊所代表ê,是上帝ê使者,為tio̍h是beh帶領人民敬拜上帝。因為án-ne,chiah-ê使者必定真有智慧chiah-tio̍h。M̄-koh大衛一聽,就清楚chit位婦人是受tio̍h別人指hō͘ chiah來講這故事。

第18到20節,大衛m̄是戇子,伊一聽這婦人所講ê話,第一個感覺就是伊所講ê話,並m̄是家己想出來ê。Koh講,mā m̄是發生tī這婦人家己ê身上,卻是直指大衛講ê。因為án-ne,伊要求這婦人一定tio̍h真誠實回答是m̄是奉約押之託來ê,而這婦人真坦白地回答講「無m̄-tio̍h」。Chit位婦人mā強調約押之所以ài伊án-ne做,to̍h是teh表示約押關心大衛ê家庭,想beh替大衛「挽回」家庭ê悲劇。伊並無希望大衛因為án-ne而誤會、受氣。

第21到24節,大衛就án-ne對約押講,同意伊ê意見,thang kā「押沙龍帶tńg來」耶路撒冷。Á約押真歡喜大衛聽伊ê意見。其實,大衛應該是beh問先知拿單chiah-tio̍h,卻m̄是問不時相刣ê將軍約押。因為約押所建議ê事:hō͘押沙龍tńg來,而這必定kah國家王位ê繼承者有密切關係。大衛kah-ná bē記得家己就是hō͘先知撒母耳所膏立ê,伊無kā國家大事先請教先知,tú好teh說明,伊並m̄是kā國家大事khǹg tī上帝ê旨意中。約押照大衛ê命令去行,到基述去kā押沙龍帶tńg來耶路撒冷。不過,大衛拒絕hō͘押沙龍tòa tī王宮,卻是tòa tī家己ê厝,這表示大衛並無隨時恢復押沙龍過去所擔任ê重要官職。這有可能是大衛想beh觀察一陣子,看宮廷中有甚麼反應。Mā因為án-ne,押沙龍chiah「無見王ê面」之機會。M̄-koh mā有另外一種可能,就是這teh暗示王宮中已經有一股看bē-tio̍h ê暗潮,就是大衛ê眾kiáⁿ對押沙龍tńg來王宮任職ê事,有非常無仝款ê意見,chiah hō͘大衛對接見押沙龍ê事有所保留。

重新查詢 專卷研經 撒母耳記下系列
錯誤回報,請聯繫comm[@]fhl.net