撒母耳記下 11章18節 到 11章27節   背景資料  上一筆  下一筆
Chit段經文描述約押完成了大衛所交帶害死烏利亞後,隨時派人向大衛報告chit-ê消息,當大衛tī知影烏利亞戰死前線ê消息了後,就kā kah伊通姦而有娠ê拔示芭娶入宮。當計謀害死人ê人認為都無人知影ê時,其實,聖經作者beh kā咱講,上帝非常清楚人tī暗中所做ê一切事(參考路加福音十二:2),上帝一定會算帳。

第18到21節,當「約押kā戰事ê經過呈報大衛」,因為這是一項害死前線kā官ê謀刣案,因為án-ne,約押真清楚大衛可能會「假做發怒」。為免通報者mā被無故遇tio̍h懲罰,約押就事先提醒通報戰況ê使者知影chit-ê tāi-chì。伊ài通報者帶tńg去戰報,而且hō͘通報者知影大衛可能會以當年「基甸ê kiáⁿ亞比米勒」往生ê經驗(參考士師記九:50—57)反問通報者,kah-ná大衛會譴責前線指揮官約押明明是就是親像一個笨蛋、愚戇到極點,約押ài chit位通報官hō͘大衛知影,如果大衛講基甸chit-ê故事,就回應一句「王ê軍官烏利亞mā死去」chit種話就有夠。因為chit句話已經teh暗示約押會án-ne做,就是為tio̍h beh完成大衛ê密令。因為án-ne,chit句「王ê軍官烏利亞mā死去」,就成做一句大衛kah約押之間ê暗語,mā同時teh表示大衛beh負起chit pái以色列軍隊被亞捫軍刣死真chē ê責任。即使án-ne,m̄-koh共謀設計殺害無辜ê約押,絕對無法度逃離上帝公義ê審判。

第22到24節,chit位前線戰況通報官當然beh照指揮官ê指示報告大衛。Chit位通報官tùi「敵軍比咱khah強」到「阮kā敵軍趕tńg去城門口」,chit中間主要就是beh hō͘烏利亞戰死。所以「敵軍比咱khah強」,真相是故意後退,誘惑敵軍出城。就tī chit時,以色列軍隊緊急撤退,hō͘烏利亞身陷前方敵陣中,tī孤獨、無奧援之下被刣。Chit時,約押chiah koh再揮軍進攻,逼亞捫軍隊tńg來防。其實,「赫人烏利亞mā死去」,án-ne chiah是kui個報告中ê重點。

第25到27節,拔示芭聽tio̍h丈夫烏利亞戰死戰場ê消息了後,照以色列人民辦理喪事ê風俗,需要舉哀長到七工ê時間(參考撒母耳記上三十一:13)。M̄-koh即使是án-ne照風俗去行舉哀ê動作,mā是為tio̍h掩蓋(khàm)伊所犯ê罪而已,並m̄是真實ê。人心ê險惡就是án-ne,m̄-koh lóng無法逃過上帝對人心內ê鑒察。Tī喪事過了ê時間,大衛就正式地娶拔示芭入王宮。大衛若無án-ni做,拔示芭有娠ê事真緊to̍h會曝光。M̄-koh chit件隱藏得非常細膩ê刣人案件,上帝是非常清楚,因為án-ne,上帝「對大衛所做chit件事十分不悅」,chit句mā ē-sái講是chit章經文siōng中心ê一句話。Kui章經文真清楚teh說明,人認為tī暗中所做ê事無人看tio̍h,mā bē有人知影。其實,chit種想法、看法lóng是錯誤 ê。

重新查詢 專卷研經 撒母耳記下系列
錯誤回報,請聯繫comm[@]fhl.net