列王紀下 8章16節 到 8章29節   背景資料  上一筆  下一筆
Chit段經文中描述兩個猶大王,其一是約沙法ê kiáⁿ約蘭繼任為王(第16到24節),另外一個是約蘭ê kiáⁿ亞哈謝繼任為王(第25到29節)。

第16到19節,chit段經文真清楚講chit-ê猶大王約蘭,是約沙法ê kiáⁿ,伊繼承老父ê王位,而老父是一個真敬畏上帝ê君王,伊無kā老父ê好hō͘繼承落來,反tńg是去娶一個m̄-nā會殺害先知,mā會養假先知ê以色列王亞哈ê cha-bó͘-kiáⁿ,就ē-tàng知影伊必定會受tio̍h bó͘ ê影響而棄sak上帝。這就是列王記作者所講ê伊「做以色列諸王所做、上主看做邪惡ê事」,只因為上帝無願意hō͘大衛ê後裔毀滅,而hō͘伊ē-tàng繼續掌權。

第20到24節,chit句「約蘭在位期間,以東背叛了猶大,成做獨立ê國家」,就ē-tàng看出來約蘭無得tio̍h上帝ê賜福,致使頂一代傳承落來ê產業失去。M̄-nā以東獨立,連立拿城mā失守。Chit座立拿城原本是約書亞分配給祭司khiā起ê城市(參考約書亞記廿一:13)。照歷代志下第廿一章18到20節ê記載,約蘭因為生一場腸病,痛苦來死。M̄-koh伊死ê時chūn,並無人為伊哀傷。

第25到27節,chit三節記載約蘭死後,伊ê kiáⁿ亞哈謝繼任王位。伊mā像in父親仝款,學習北國以色列亞哈王做上帝看做「邪惡ê事」,kan-taⁿ統治一年ê時間就往生à。

第28到29節,tī亞哈王時代,bat kah約沙法有盟約,同齊beh出兵去攻打敘利亞,想kā祖先ê城市基列ê拉末奪回來,m̄-koh亞哈失敗了,並且因為án-ne戰死戰場。chit-má換in ê後代亞哈謝也kah以色列王約何蘭聯合出兵,去phah哈薛。仝款ê,約何蘭受傷tńg去耶斯列養傷。亞哈謝去探望伊。

重新查詢 專卷研經 列王紀下系列
錯誤回報,請聯繫comm[@]fhl.net