Chit章繼續記載有關約雅敬kah約雅斤前後兩個王執政ê情景。Chit時ê猶大國並無因為臣服tī埃及而得tio̍h安寧，因為當teh壯大ê巴比倫看猶大，ná親像看待埃及仝款，lóng是伊beh討伐ê對象，結果換做巴比倫帝國入侵猶大。巴比倫王尼布甲尼撒王ê策略，就是先tùi弱小ê國家著手，伊先選擇敘利亞、摩押、亞捫，然後就是透過巴比倫聯合chiah-ê小國組成聯軍進攻猶大。

尼布甲尼撒皇帝ē-sái講是巴比倫帝國siōng強猛ê一位君王。伊是tī主前605到562年在位。主前605年，伊率軍phah敗埃及ê軍隊，致使本來ê中東政治局勢大大改觀。Ē-sái講是，tī主前601年，當伊koh一pái出兵征討埃及ê時，卻tú-tio̍h挫敗，原因是伊接tio̍h老父往生ê消息，而tī中東地區ê真chē小國，包括猶大在內，看見尼布甲尼撒王急忙tńg來國內，認為伊戰敗，就紛紛表態獨立，反抗巴比倫帝國。Chiah-ê小國包括猶大在內，約雅敬kah約雅斤等王lóng m̄聽從先知耶利米ê警告（參考耶利米書廿七：9—11節），反抗巴比倫帝國，結果反tńg帶來亡國ê災難。

Chit段經文是描寫約雅敬執政下ê猶大國。

第1到4節，果然，巴比倫王尼布甲尼撒率兵攻打猶大，伊只有ē-tàng降服。因為埃及tī主前605年ê迦基米施之役，被巴比倫軍隊phah敗。這真清楚，埃及無法度繼續成做猶大ê庇護國。主前604年，mā是尼布甲尼撒執政ê第二年，巴比倫軍隊先掃蕩了非利士，chit時約雅敬表示順服，tùi埃及附庸國變成巴比倫ê附庸國。

Tio̍h注意ê是chia提起約雅敬臣服巴比倫三年了後，就背叛了巴比倫。這可能是因為主前601年，因為埃及背叛巴比倫，巴比倫即時調兵tńg去phah埃及。Chit時，約雅敬宣佈背叛，巴比倫軍隊無法度調tńg來制裁，m̄-koh卻指hō͘敘利亞、摩押，kah亞捫ê軍隊聯合來攻打猶大。結果約雅敬被俘擄à。

歷代志下第三十六章6到7節án-ne記載講：「巴比倫王尼布甲尼撒就來kā 伊攻擊，用銅鏈kā伊縛起來，beh kā 伊帶來巴比倫。尼布甲尼撒koh kā 上主殿內ê 器具帶到巴比倫，hē tī 巴比倫伊ê 廟內。(全民版)」chit種記事tú好就是列王記tī chia第2節所講ê「消滅猶大」。因為國王已經被俘擄à。

	第5到7節，約雅敬受掠了後，巴比倫王尼布甲尼撒就立伊ê kiáⁿ約雅斤繼位。列王記作者tī chia講，埃及已經無力thang幫助伊過去所統轄ê國家、部落、族群。換句話講，已經無可能koh來幫助猶大à。