這是真有意思ê一章，使徒保羅tī chia強調講，人ê身軀會漸漸衰弱，m̄-koh，tī耶穌內面卻是日日更新，所tú-tio̍h ê目nih-á痛苦，是為tio̍h beh迎接khah美好ê榮耀，這榮耀是永恆ê。

Tī哥林多後書第一章，tī使徒保羅講tio̍h基督徒ê身上是帶有基督耶穌ê「印記」，伊特別強調chit-ê「印記」是用聖神烙印tī人ê心內。然後伊tī第三章繼續提起一個重要ê觀念：基督徒就是siōng好ê福音推薦者。伊講chit種推薦是寫tī人ê心內，卻m̄是用文字寫tī紙上á是石版上ê。

為甚麼使徒保羅會一再提起人ê心？原因就是伊認為一個基督徒，應該是tùi心ê革新開始，一個人如果心思意念bē改變，單有外在ê記號是無意義ê。這mā是為甚麼伊teh寫hō͘加拉太教會ê書信中，就強調講：「有受割禮kah 無受割禮lóng 無要緊，要緊ê 是咱tio̍h 成做新創造ê 人。(全民版)」（加拉太書六：15）這mā是伊寫hō͘哥林多教會所講ê，人若tī基督裡，就是一個新造ê人（參考哥林多後書五：17）。

Tī chit段經文中，使徒保羅強調福音ê本質就是耶穌，伊是性命ê救主。因為án-ne，任何傳福音者，lóng是福音ê奴僕，而奴僕ê職分就是盡力去完成主人付託ê使命。

第1到2節，使徒保羅講上帝kā chit項福音ê任務付託hō͘伊kah其他同工，伊ê職責就是beh hō͘這福音顯耀出來，用實際ê行動來說明福音ê真理。第2節是真重要ê一節經文，使徒保羅提起傳福音一定tio̍h有ê基本態度：放棄曖昧見笑ê事。Chia講「曖昧見笑ê事」，伊特別指出兩點：包括詭詐、曲解上帝ê話。所謂「詭詐」，意思是teh指無論tāi-chì好bái lóng敢做。而siōng嚴重êto̍h是「曲解上帝」，上帝原本是beh hō͘人ê性命得tio̍h滋潤，是hō͘人ê性命活起來。

第3到6節，福音事工並無一定是會順利，反tńg常受tio̍h阻礙，有人懷疑拒絕，有人接納。Chiah-ê lóng是真正常ê事，m̄-koh重要ê是beh知影福音ê中心，就是「耶穌基督是主」，m̄是用人做中心，chit點tī使徒保羅到外邦地區傳福音ê背景來看，確實是件真無容易ê事。因為tī he時chūn，羅馬帝國ê國勢非常強盛，羅馬皇帝當teh積極推行神化皇帝ê運動，所有tī羅馬帝國統治下殖民地ê人民，lóng一定tio̍h拜羅馬皇帝，kā皇帝當做神敬拜。Mā就是講羅馬皇帝就是羅馬帝國統治下屬民ê「主」。而使徒保羅卻是teh傳「耶穌基督是主」，這就kah羅馬政府ê政策相違背à。M̄-koh即使án-ne，使徒保羅iáu是仝款強調，創造萬物ê主宰會hō͘忠實tī祂ê子民看見亮光，因為會看見上帝ê榮耀藉tio̍h耶穌顯明出來。