短短一段經文，描寫撒母耳父母lóng因為ē-tàng完成所下ê願而得tio̍h祭司以利ê祝福，特別是得tio̍h上帝加倍ê賞賜。

第18到19節，chia講撒母耳穿「麻紗ê以弗得聖服」。Chit種「以弗得」，是teh指祭司穿tī身上帶領民眾敬拜上帝ê服裝。摩西律法中有清楚規定「以弗得」服裝ê款式（參考出埃及記廿八：6—14）。而且大祭司有特殊ê「以弗得」樣式（參考出埃及記三十九：1—26）。Chit時撒母耳尚且m̄是祭司，因為án-ne伊穿ê衫褲並m̄是一般輪值祭司穿ê，卻是類似ê款式而已。

第20到21節，以利每pái lóng祝福以利加拿 kah哈娜。伊特別提起祝福內容，是祈求上帝賞賜koh khah chē ê gín-á hō͘哈娜，因為伊kah丈夫以利加拿奉獻撒母耳。果然，祭司以利ê祝福得tio̍h上帝回應，哈娜koh生三個cha-po͘-gín-á、兩個cha-bó͘-gín-á。這lóng teh表示上帝確實垂聽以利ê祈禱，賜福hō͘哈娜加出「五倍」ê福氣。作者用chit種方式teh說明：真正甘心ê奉獻，會得tio̍h上帝ê歡喜接納。另外一方面，這mā說明一個非常特別ê意義：哈娜kā撒母耳奉獻hō͘上帝成做「離俗人」，m̄-koh，上帝賞賜hō͘伊ê koh khah chē，伊並無因為獻出了撒母耳而會失去甚麼。