撒母耳記上 15章10節 到 15章35節   背景資料  上一筆  下一筆
Chit段經文真清楚講出先知撒母耳明確指出掃羅ê問題所在,就是違背上帝ê旨意,這是上帝所無法度允准ê態度。因為設立君王制度,就是beh君王聽從上帝ê旨意帶領以色列子民,就親像上帝所選派ê牧者仝款。若是無聽從上帝ê命令,主人會隨時更換chiah-ê被揀選出來ê領導者。因為án-ne,thang án-ne瞭解:聽從上帝ê旨意,照上帝ê旨意去行,是kui本聖經ê教導。

第10到14節,先知撒母耳聽tio̍h上帝無歡喜掃羅ê時,感覺非常懊惱、煩惱。Tī第11節ê chit句「撒母耳真無歡喜」,tī《中文和合本》用「撒母耳便甚憂愁」,《台語版》聖經用「撒母耳真慼心」,天主教《思高聖經學會曉版本》用「撒母耳感覺不安」。因為án-ne,chit句「撒母耳真無歡喜」,指ê是先知撒母耳對掃羅違背上帝ê行為感覺非常不悅ê意思。伊特別為tio̍h án-ne事整夜向上帝祈求,為tio̍h是beh希望上帝ē-tàng赦免掃羅,究竟掃羅是第一位hō͘伊膏立ê國王。M̄-koh掃羅顯然m̄知上帝已經無歡喜伊違背命令,iáu teh「迦密」chit-ê地方「起造一座記念碑」,用來記念phah敗亞瑪力人。伊m̄是築一座祭壇獻祭hō͘上帝,以感謝上帝。卻是建造一座記念碑,記念chit場戰事。先知撒母耳為tio̍h chit件事特別去chhōe掃羅,伊對先知撒母耳表示家己已經有「遵守了伊ê命令」,m̄-koh先知撒母耳真質疑地講:「是mah?」這是一句高度懷疑ê話。因為伊聽見有cheng-seⁿ ê叫聲。

第15節,chit節經文講出掃羅所想ê,tú好違背上帝ê旨意。掃羅辯解說「留落來siōng好ê牛羊,為ê ài做牲祭獻hō͘上主」,伊顯然是想beh改變了上帝ê旨意。卻m̄是完全順從上帝ê旨意。Koh講,伊無承認是家己下命令,beh kā chiah-ê動物cheng-seⁿ留落來,卻是講「我ê軍隊」,顯然是teh推責任。

第16到19節,先知撒母耳聽tio̍h掃羅án-ne解釋了後,用真受氣ê語氣ài伊「恬去」,然後kā上帝啟示伊ê話kā掃羅講。Tī chit-ê信息中有幾個重點:

一是掃羅ê王位是上帝所選立ê,並m̄是伊平白thang得tio̍h ê,á是伊有甚麼thang被膏立為王ê條件。

二是上帝ê命令非常清楚,ài kā chit場戰爭當做一場「聖戰」。Mā就是為上帝而戰。

三是先知撒母耳清楚指出掃羅「倉倉pōng-pōng地掠奪戰利品」,chit節講出掃羅頭前所講「ài做牲祭獻hō͘上帝」ê話,根本就是欺騙、不誠實ê推託之詞。表面上看起來的確是用來獻祭,m̄-koh建造記念碑榮耀家己,án-ne,teh獻祭ê時,就真容易會家己扮演「神明」ê角色。這mā是chia所講「做上主看做邪惡ê事」ê意思。

四是chit句「上主看做邪惡ê事」,tī舊約聖經中通常lóng是teh指敬拜偶像ê行為,á是嚴重違背上帝ê旨意。當做者用「上主看做邪惡ê事」,指ê就是chit位君王無專一ê心敬畏上帝。

第20到21節,掃羅聽先知撒母耳ê話了後,伊koh一pái辯解說是伊ê軍隊無照命令做tāi-chì,換句話講,伊並強調家己lóng照上帝ê命令做tāi-chì。

第22到23節,chit兩節詩歌講出kui本聖經ê中心信息,mā是掃羅故事ê中心。「順從比祭物koh khah好;聽命贏過獻上siōng好ê羊」,chit句話thang參閱以賽亞書第一章11到17節;耶利米書第六章18到20節;何西阿書第六章6節;阿摩司書第五章21到24節;彌迦書第六章6到8節等等經文。先知ê文獻lóng teh強調聽從上帝ê話,遵行上帝ê旨意,遠比獻祭kah燒熱烈ê敬拜禮儀koh khah重要。第23節ê「背叛」,等於是kah上帝對敵仝款,這是teh指違背上帝ê旨意,chit種行為就kah「行巫術」仝款嚴重。Chit種行為tī摩西律法中是嚴厲禁止ê(參考利未記十九:31,申命記十八:10—11)。Á「傲慢kah拜偶像仝款有罪」,這是因為傲慢ê人,心中根本to̍h無上帝(參考詩篇十四:1),會家己扮演上帝ê角色。

第24到26節,掃羅聽tio̍h先知撒母耳chit種指責後,伊終其尾承認家己「犯罪了」,違背上帝ê命令kah先知撒母耳ê指示。伊koh khah坦承是因為驚人民chiah做出chit種決定。因為án-ne,伊ǹg望先知撒母耳陪伊tńg去吉甲。因為掃羅清楚知影,若是有先知撒母耳teh陪伴伊去吉甲,以色列人民對伊ê尊崇會加分;相對ê,若是人民發見先知撒母耳kah伊決裂了,一定會影響tio̍h伊tī以色列人民中間ê形象kah領袖權威。M̄-koh先知撒母耳tú開始拒絕chit項請求。並且明白hō͘伊知影上帝已經厭棄伊,boài伊koh再做以色列人民ê王。

第27到29節,當先知撒母耳決定離開掃羅ê時,伊趕緊giú-tiâu伊ê衫褲,無想tio̍h就án-ne衫褲「拆裂了」,這mā表示先知撒母耳kah掃羅之間ê關係決裂了,mā象徵tio̍h以色列王國kah掃羅ê關係有裂痕。第28節ê chit句「賜hō͘一個比你koh khah好ê人」,已經為後來大衛被膏立為王留落來一個伏筆。

「上帝不講白賊,mā bē改變主意」,chit句話thang參考民數記第廿三章19節;詩篇第一一○篇4節;耶利米書第四章28節。所謂「bē改變主意」,是teh指上帝ê計劃,必定會照時間完成。

第30到33節,掃羅koh一pái承認家己犯罪。M̄-koh伊請求先知撒母耳陪伊tńg去吉甲獻祭敬拜上帝,thang hō͘人民看見伊kah先知撒母耳之間有和諧ê關係。先知撒母耳同意掃羅ê懇求,陪伊去吉甲祭壇獻祭hō͘上帝。M̄-koh這並無表示伊同情掃羅,á是接受伊ê請求,卻是如第32到33節所記載ê,先知撒母耳是beh去執行亞瑪力王亞甲ê死刑。

第34到35節,先知撒母耳決定離開掃羅,而掃羅則清楚知影,無先知撒母耳ê支持,伊tī人民中間kā失去領導地位。Tī當時,雖然已經設立了君王制度,ē-sái講是先知ê角色tī以色列人民中照常是siōng重要。一直到第十九章24節掃羅chiah koh一pái見tio̍h先知撒母耳。

重新查詢 專卷研經 撒母耳記上系列
錯誤回報,請聯繫comm[@]fhl.net