Chit段經文ē-sái講是為掃羅當以色列國王ê時所做ê大事作一個簡略ê紹介。

第47到48節，短短兩節說明掃羅一生ê戰績，伊tī執政期間，ē-sái講是不斷來teh擴張領土疆域，鞏固以色列邊界ê安全。Chia並無詳細描述出其他khah小族群ê挑釁，而只有講出幾個比較重要ê族群，包括有摩押人、亞捫人，in khiā起tī以色列ê東邊地區；以東人，tòa tī以色列ê南邊地帶；非利士人則Tī西pêng，而瑣巴人ê所在是tī北pêng。換句話講，掃羅是帶領以色列人民作全面性ê征伐，hō͘以色列人ê外患差不多lóng tī伊執政ê時代消除。第47節ê「無論伊上tó位lóng phah贏」chit句話，tī希伯來文原本是「無論伊上tó位lóng真邪惡（á是殘忍）」。意思是伊對待敵人ê手路一點mā不仁慈。

第49到51節，chit三節經文mā是一份簡單ê族譜。kā chiah-ê名對照第三十一章2節ê名單，就會發見chia少掉了「亞比拿達」（mā thang參考歷代志上十：2）。

「亦施韋」，chit-ê名ê意思是teh指「上主ê人」。Tī歷代志上第八章33節用「伊施‧巴力」，就變成「巴力ê人」，這已經說明chit-ê kiáⁿ後來tī信仰上脫離了上帝，因為án-ne，tī撒母耳記下第二章8節伊ê名成了「他施波設」，意思是「罪惡ê kiáⁿ」。

第52節，tùi chit節thang看出以色列人民siōng麻煩ê仇敵就是非利士人。Mā為tio̍h beh防禦非利士人不斷來挑釁，掃羅無停地徵召強壯ê cha-po͘人入伍做兵。Chit節mā為第十五章、第十七章ê戰事留作伏筆。