撒母耳記上 13章1節 到 13章14節   背景資料  上一筆  下一筆
Tùi第十三章開始到第十五章,這三章經文lóng是記載掃羅當上以色列人民ê王了後,發生tī伊身上ê各種事件,特別是tī國防防衛ê事頂面,足見掃羅確實是一個真有見解、領導能力ê王。Tī這三章中,真清楚teh描述掃羅kah非利士人、亞瑪力人之間ê戰事。M̄-koh mā同時描述掃羅當上了王了後,有脫離先知撒母耳教導ê傾向,終到兩人漸行漸遠,因為掃羅m̄聽先知ê指導,這m̄是上帝喜愛ê行為。因為先知撒母耳是上帝所kah意ê奴僕,而掃羅則先知撒母耳所膏立ê王。伊拒絕先知ê教導,等於是teh拒絕上帝仝款,he是非常嚴重ê事。

Chit段經文主要teh說明上帝透過先知所膏立ê君王,並無表示這君王就ē-tàng取代先知ê角色,á是用藐視ê態度看先知工作ê重要性。因為忠實ê先知就是上帝忠實ê奴僕,聽從先知傳達上帝ê信息chiah是siōng重要ê事。Chit段經文中mā講出君王設立、擁有權柄了後,想kā上帝忠實奴僕先知角色ê重要性降低,這bē是上帝所想看tio̍h ê事。上帝有權膏立、揀選甚麼人做國王,上帝就有權廢除拒絕聽從祂ê人。Chit章mā記載先知撒母耳koh發揮了伊對公眾事務ê影響力,thang看出作者有一個明確觀點:即使是有國王領導以色列人民,m̄-koh先知ê角色kah工作,iáu-koh是teh代表上帝,負責傳達上帝ê信息,因為án-ne,tī以色列人ê社會中iáu是有無法度疏忽ê權威。

第1節,chia《現代中文》譯本無出現第1節,m̄-koh有kóa版本有第1節án-ne記載tio̍h:「掃羅登基年四十歲,作以色列王二年ê時chūn。」(參考《中文和合本》、《台語版》等二種版本lóng有chit節,而且翻譯仝款)。天主教思高聖經學會曉ê版本完全無仝ê資料:「撒母耳三十歲登基,作以色列王四十年。」思高學會曉用「四十年」,是根據使徒行傳第十三章21節:「後來,in要求有一個王,上帝就tùi便雅憫支族選出基士ê kiáⁿ掃羅,立伊作in ê王,前後四十年。」

第2到4節,chia講掃羅知影怎樣用兵ê策略抵抗非利士人ê侵犯。這mā說明chit-má ê掃羅已經無koh是一個tī田裡放牛ê作穡人,mā m̄是一個唯先知撒母耳ê話lóng順從ê領導者。chit-má ê國王掃羅是有家己ê主見,會家己調兵遣kā、運籌帷幄tī戰事ê君王。而且tī伊身邊mā有一個非常優秀ê軍事幕僚,就是kiáⁿ約拿單(參考十四:49)。因為án-ne,掃羅thang kā精選出來ê精銳部隊撥出一支hō͘伊率領指揮。Á 拿單確實mā真有能力,就tī「迦巴」chit-ê所在刣死非利人ê指揮官。掃羅聽tio̍h chit-ê消息認為是一個難得ê好機會,伊鼓勵以色列人趁機會而起,藉這phah退非利士人。有真chē以色列人響應,掃羅就án-ne號召in集合tī「吉甲」。

第5到7節,chit段經文thang看出非利士人tī當時是非常富強ê國家,絕對m̄是以色列人民thang抵擋(參考第19到22節),tùi武器就ē-tàng看出非利士人已經有真尖端ê兵器,而以色列軍隊卻只有原始ê武裝設備而已,這當然kah in遊牧生活有密切關係。加上聽tio̍h非利士人派出ê軍隊lóng是菁英,兵員之多向海灘上ê沙粒,hō͘以色列人民驚駭、不安,趕緊bih起來到所有可能藏匿ê所在,甚至逃到約旦河東岸去避難。

第8到14節,chit段經文應該thang當做一個獨立ê事件來看。Tī編輯上若是kah前段併做伙讀,會感覺有kóa混亂,因為chia插入thèng候先知撒母耳ê記事。有kóa學者認為chit段經文是為tio̍h beh說明先知撒母耳kah掃羅之間有ê裂痕,chit種裂痕產生tī掃羅被膏立為王,而且深受人民愛戴了後,便對先知撒母耳ê命令á是指示,無koh像過去hit種願意聽從。

第8到9節,chit節「人民開始棄sak掃羅」,為甚麼會án-ne?作者無進一步說明。有可能kah前述ê戰爭ê tāi-chì有關,人民驚惶,因為過去有先知撒母耳帶領in對抗非利士人獲勝。而且頂pái kah亞捫人相刣,mā是用先知撒母耳ê名呼召民眾(參考十一:7),而且有先知撒母耳在場(參考十一:12)。chit-má若是無先知撒母耳tī in中間,而且發見非利士人已經聚集龐大軍團,有做一氣beh消滅以色列人民之態,這hō͘以色列人民大大恐慌。以色列人民因為看bē-tio̍h先知撒母耳tī in中間為in祈求上帝ê幫助。加上大家看tio̍h掃羅thèng候先知撒母耳ê時間已經超過原訂ê「七工」,可能因為án-ne,hō͘以色列人民對掃羅ê權威kah信任感有giâu疑,大家因為án-ne紛紛棄sak掃羅而去。連掃羅家己lóng因為thèng候而失去信心,就án-ne家己取代了先知撒母耳當祭司ê角色,做獻祭ê工作。掃羅會án-ne做,是因為過去ê經驗kah傳統民俗信仰,軍隊beh出征chìn前必定先舉行獻祭禮儀,並且詢問神明ê意見,若無,無軍人敢出征。

第10到11節,m̄-koh就tī掃羅進行獻祭ê chit-ê時chūn,先知撒母耳來到用真嚴厲ê話質問掃羅:「你做甚麼事?」chit句話ê原意是:「你為甚麼ài做chit種事?」掃羅kā伊心中ê不安講出來,重要ê是「人民棄sak我」chit句話。伊向先知撒母耳傾訴一個重要ê理由,就是因為先知撒母耳延遲到吉甲,致使人民對掃羅ê信任度降低,紛紛棄sak伊,而伊想tio̍h 趁早得tio̍h上帝ê應允,thang知影是m̄是ē-tàng攻打非利士人。伊chit種回答,等於是承認家己扮演了祭司ê角色工作。

第13到14節,先知撒母耳非常清楚譴責掃羅是對先知ê信任不足,而且對上帝ê信心無夠。若是掃羅對上帝ê信心夠,就一定會等待先知撒母耳來到,並且透過先知來詢問上帝ê旨意。因為先知撒母耳bat真清楚kā伊講過,會hō͘伊知影應該做ê事(參考十:8)。先知撒母耳tī chia真清楚指出掃羅「無遵守上帝ê命令」,chit句話是非常嚴肅ê指控。國王若是無帶頭遵守上帝ê規律,人民就koh khah bē遵從。M̄-koh chia並無明確指出到底掃羅是toh一kóa地方「無遵守上主ê命令」,並m̄免然是kah獻祭ê事有關,可能iáu有其它ê問題。Mā tī chia先知撒母耳清楚kā掃羅講,伊ê王位會由別人來取代。上帝beh立新ê王。因為án-ne,第14節mā為後來上帝揀選大衛替接掃羅ê王位,留落來一個伏筆。

重新查詢 專卷研經 撒母耳記上系列
錯誤回報,請聯繫comm[@]fhl.net