撒母耳記上 10章1節 到 10章16節   背景資料  上一筆  下一筆
Chit章說明先知撒母耳膏立掃羅為王ê經過。Thang分做兩個部分,其一是繼續延伸第九章ê記載,先知撒母耳kā上帝ài掃羅做王ê事kā伊講了後,並且實現了chìn前先知撒母耳應允掃羅ê事,就是hō͘伊知影老父phah-m̄見ê驢á tī tó位。第二部分是kah第八章ê資料仝款,lóng是對設立君王制度表示反對ê意見。M̄-koh先知撒母耳照上帝ê指示,選出掃羅做國王。而且chit種「推選」是tī全民chìn前一步公開選ê,並m̄是隨時由上帝直接揀選。

Chit段經文主要teh說明先知撒母耳先「私下膏立」掃羅當以色列人ê王。然後為tio̍h beh hō͘掃羅確信伊所領受ê權柄是真實ê,先知撒母耳hō͘伊三個記號:一是會tú-tio̍h兩個人kā伊講beh chhōe ê驢á已經chhōe着à。二是會tú-tio̍h三個人,chit三個人lóng帶無仝ê禮物beh去獻祭。三是掃羅會因為聖神感動,而跟tòe其他被聖神充滿ê先知同齊「忘形講話」。Á眾親友lóng驚kah gāng去伊ê改變,m̄-koh無人知影伊已經被先知撒母耳膏立為王,而掃羅mā無講出伊被膏立為王ê經過。

第1節,chia講先知撒母耳用橄欖油倒tī掃羅頭殼頂,表示確定掃羅是hō͘膏立ê以色列王,並且kah伊chim嘴表示尊敬ê意思。先知撒母耳hō͘掃羅知影伊當以色列人民ê王,就是beh帶領以色列人民抵擋來侵犯ê敵人。

第2到5節,這是先知撒母耳beh hō͘掃羅相信,上帝真正已經揀選伊來帶領以色列民族,因為án-ne,beh hō͘伊三個兆頭,第一是「驢á已經chhōe-tio̍h了」,掃羅原本就是奉老父基士之命,帶奴僕去chhōe行失ê驢á,chit-má先知撒母耳hō͘ in知影驢á已經chhōe tio̍h。第二個記號是tī「伊泊ê聖樹」會tú-tio̍h三個準備去伯特利獻祭ê人。In真有可能是beh去朝聖ê旅客。因為in lóng有帶beh獻祭ê禮物,包括有「三隻小山羊」、「三個麵包」、「一皮袋酒」等。先知撒母耳kā掃羅講,當in中間有人the̍h兩個麵包hō͘伊ê時,伊一定tio̍h收下。第三個記號是tī掃羅ê故鄉基比亞會tú-tio̍h一陣先知,掃羅會同時kah chiah-ê先知充滿tio̍h聖神ê感動。

第6到8節,先知撒母耳提出chit-ê預警hō͘掃羅,講伊會kah chiah-ê tùi獻祭ê山丘上落來ê先知仝款,忘形跳舞、彈琴等。先知撒母耳真盡職ê提醒掃羅,一定tio̍h會記得「照上帝引chhōa」ê去做,chit點mā是聖經ê中心信息。先知撒母耳約好掃羅,ài掃羅tī「七工」了後,到吉甲kah伊去相會。Hit時候,伊會koh一pái kā掃羅講真chē以後該做ê事。

第9節,chit節mā是第十三章ê一個伏筆,掃羅並m̄是chit-má就成做以色列人ê君王,卻是需要聽從先知撒母耳ê指示做tāi-chì,而這mā是teh暗示:先知是君王ê指導者,為tio̍h beh hō͘君王聽從上帝ê話語。

「上帝賜hō͘掃羅一粒新ê心」,chit句話真重要,teh說明掃羅已經hō͘ 上帝膏立為王,伊是上帝親自揀選ê王,上帝親自改造伊,hō͘伊成做一個「新人」。Chit種「新ê心」,thang tùi伊加入先知「忘我」ê舉止看出來。伊甚至ē-tàng領受tùi上帝來ê啟示,mā因為án-ne有人傳說掃羅mā是「先知」中ê一位(參考第11節)。

第10到13節,先知撒母耳tī第4到6節所講ê預言tī chia實現了,mā因為án-ne,hō͘當時ê人掠做是掃羅mā是一個先知。因為有上帝ê靈tī掃羅身上,因為án-ne,掃羅mā有「受感忘形講話」ê經歷。

第14到16節,掃羅tńg到厝裡,in-tau裡ê親人一定聽tio̍h眾鄉親lóng tī討論著掃羅「kám是先知?」這問題,因為這mā牽涉tio̍h in家族ê事,因為án-ne,chiah-ê父執輩ê人lóng真關心並詢問掃羅到底發生甚麼事。M̄-koh掃羅只有講伊去見先知撒母耳,並無講伊受膏立為王ê事。

重新查詢 專卷研經 撒母耳記上系列
錯誤回報,請聯繫comm[@]fhl.net