彼得前書 5章1節 到 5章14節   背景資料  上一筆
早期教會tī信仰上tú-tio̍h極大ê迫害,致使有bē少信徒因為án-ne喪失性命,mā有bē少信徒性命tú-tio̍h極大ê苦難,就án-ne使徒ê書信中就一再鼓勵信徒,tio̍h堅忍到底,並且kā in講:對hiah-ê到死lóng堅持無變ê信仰者,上帝必定會hō͘ in siōng美好ê獎賞—上帝beh成做in ê上帝,beh親自牧養in,並且hō͘ in享受永恆ê性命(參考啟示錄七:15—17)。詩篇第廿三篇非常清楚表達上帝就是牧者,以色列民族就是上帝ê羊群。Tī上帝chit種好牧者帶領之下,屬tī上帝ê子民之羊群,m̄免擔憂生存ê問題,mā m̄免驚惶tú-tio̍h性命ê困境,因為有上帝teh庇護、teh帶領。

Chit種以上帝親自當顧羊人來牧養chiah-ê屬tī祂ê羊群,就是以色列人民一直存在ê信仰認知:上帝是in民族ê顧羊人;in是屬tī上帝ê羊群。上帝親自牧養,等於teh說明性命無koh有苦難,mā bē有任何驚惶,因為上帝就是賞賜性命ê主,mā是siōng好ê庇護者。先知以西結就bat tī伊hit時代提出上帝就是以色列人民ê牧者chit種看法,hō͘ in bē「tī暗無天日、多災多難ê時chūn被趕散到各地」,m̄-nā án-ne,上帝iáu要領in「tńg來到以色列ê山間kah溪畔,tī青綠ê草場牧養in」,hō͘以色列人民thang安心生活。先知以西結傳出上帝對以色列民族siōng重要ê一句宣告就是:「『Lín 是我ê 羊,是我草場ê 羊;lín 是人,我mā 是lín ê 上帝。』這是至koân 上主講ê (全民版)」(以西結書三十四:31)

	耶穌基督就bat用chit種顧羊人kah羊群之ê親密關係,來形容伊kah跟隨者之間bē-tàng分離ê情景(參考約翰福音十:1—16)。伊甚至講tio̍h好ê顧羊人會為tio̍h羊群ê安全而犧牲家己ê性命。

    彼得前書作者chit-má mā用chit種顧羊人kah羊群之間ê特殊來勉勵信徒,tio̍h學習做一個好ê顧羊人來對待所有ê羊群。

第1節,chia提起「長老」chit-ê詞,就ē-tàng看出早期教會已經發展出一個真有系統ê組織,「眾長老」m̄-nā是教會中ê中流砥柱,mā同時看tio̍h「長老」tī早期教會裡已經扮演非常重要ê角色(參考使徒行傳十一:30、二十:17)。至少thang看tio̍h「長老」tī當時已經是牧養教會ê工作者。

使徒保羅tī早期開拓教會ê時,mā是用「長老」ê制度來管理教會,伊對教會tī推選「長老」ê事頂面有嚴格規定(參考提摩太前書三:2—7,另外參考提多書一:6—9)。使徒保羅每傳福音到一個所在,成立教會了後就會設立長老來牧養該教會(參考使徒行傳十四:23,提多書一:5)。因為án-ne,thang理解早期ê教會有長老並m̄是真稀奇ê事。

M̄-koh tio̍h注意ê是彼得前書ê作者特別強調家己是基督受苦ê見證人,這是非常重要ê一件事。伊並m̄是khah強調家己ê權柄,而是beh見證耶穌基督ê受苦。

彼得前書作者講beh kah大家「分享將來ê榮耀」,表示chit種榮耀是屬tī未來ê,並m̄是目睭前看會tio̍h ê。作者用chit種方式teh說明一件事:如果見證耶穌基督ê苦難而受難,則chiah-ê苦難lóng會成做將來耶穌基督koh再臨時,要領受耶穌基督koh活之榮耀ê證據。

第2節,「牧養上帝所付託lín ê羊群」,而且一定tio̍h出tī「甘心樂意」,這mā是獻身傳道ê第一要件。使徒保羅描述耶穌基督是:「祂顛倒piàⁿ 空家己,取奴僕ê 身分出世做人,成做人ê 形體出現。祂自願謙卑,順服到死,甚至死tī 十字架頂。(全民版)」(腓立比書二:7—8)這mā是為甚麼伊ài大家學習耶穌基督ê chit種心境(參考腓立比書二:5),因為án-ne ē-tàng hō͘福音成做甘甜ê果子。

Koh講,因為有甘願獻身之心,人chiah會不計較報酬jōa-chē,mā chiah會「自動自發ê事奉」,chit點是非常確實ê。只有不心甘情願之下,人就真會計較。這tùi使徒保羅ê書信中thang看出一kóa看出,就是早期教會中有kóa長老擔任tio̍h傳道ê工作並m̄是真心甘情願,á是對金錢ê問題比較致意。使徒保羅非常清楚表示:傳道者tùi教會信徒ê奉獻得tio̍h生活ê所需要ê是正確ê(參考哥林多前書九:3—14),伊甚至講:「Gâu 治理教會ê 長老,tio̍h 加倍kā伊尊敬;對hiah-ê 特別盡力teh 講道理kah 教示ê 長老,koh khah tio̍h án-ne。(全民版)」(提摩太前書五:17)m̄-koh使徒保羅卻iáu-koh保持家己工作thàn錢以維持生活所需要ê,主要原因就是伊無希望有人chhōe孔縫,講伊騙信徒ê錢,因為tī哥林多教會發生過chit種事(參考哥林多後書十一:7—9、十二:16—17)。伊會án-ne堅持ê原因,就是當時有kóa人利用教會信徒ê善心,表面上看起來是teh傳道,其實是teh欺騙信徒ê錢財。Á是雖然是做傳道者,m̄-koh卻對金錢ê事真致意,án-ne是kā傳道ê工作當做飼家庭生計ê一種方式。

第3節,好ê牧者就是羊群跟tòe ê對象。作者tī chia特別強調一個好ê傳道者應該成做信徒學習ê「模樣」。使徒保羅非常有名ê話語,就是伊bat寫phoe hō͘ kúi-nā間教會ê時,lóng bat kā讀伊書信ê人講tio̍h學伊,ná親像伊學習耶穌基督仝款(參考哥林多前書十:32—十一:1,腓立比書三:17,帖撒羅尼迦後書三:9)。

第4節,耶穌基督就是好ê牧者,chit點所有ê基督徒lóng清楚知影。作者tī chia提起chit位好牧者耶穌基督koh再臨時,是帶審判ê權柄來到世間,因為án-ne,每一個傳揚耶穌基督十字架信息ê傳道者,lóng一定tio̍h向耶穌基督交帳,chit時所有負起傳道工作ê人,就會知影家己所得tio̍h ê是甚麼款ê成績。作者tī chia用「永遠bē失去光彩ê華冠」,這就是使徒保羅siōng ài用ê屬天之獎賞(參考腓立比書三:14,提摩太後書四:7—8)。
第5節,tī第1到4節提起教會ê「長老」,這字有ê時mā teh代表年歲比較高、而且有社會地位者。當然mā是teh說明帶有傳揚福音者ê身分。緊續落來就是提起少年人應該注意ê信仰態度。

作者tī chia引用箴言第三章34節ê話語所講ê:「伊(上帝)看輕狂傲ê人,恩待謙卑ê人。」chit句話雅各書ê作者Tī該書信ê第四章6節bat引用過(另外thang參考約伯記廿二:29)。驕傲ê第一個特徵,就是拒絕別人ê意見,堅持己見,認為家己所做、所想ê lóng是正確ê。Tī教會裡,chit種態度是真oh kah別人同工ê。作者特別提醒少年人應該對年長ê人有「謙卑順服」ê態度。伊用「繫上謙卑ê圍裙」,chia ê「繫上」,意思是teh指kā索á phah成有結ê款,án-ne就bē鬆開。換句話講,如果無kā「謙卑」看做是一個人性命ê基本,ná親像穿衫仝款,如果無穿好就真oh看à。仝款ê,一個人如果m̄-bat謙卑,只有驕傲ê話,hit-ê人所顯現出來ê,lóng會是不堪入目的。奧古斯丁就講過:「驕傲乃是萬惡ê根源。」chit句話真有意思,mā值得咱注意。

第6節「大能上帝ê手下」,chit句話已經真清楚說明上帝是一個全能ê神。聖經講宇宙萬物就是tī上帝ê手下完成ê,tī上帝ê手中,無無法度成就ê事。Mā因為án-ne,只有謙卑ê人chiah會明白上帝chiah是性命ê主。做一個人驕傲ê時chūn,心中自然bē認為有上帝(參考詩篇十四:1),只有謙卑ê人,即使伊m̄-bat上帝,mā會知影有上帝存在,而且teh管理tio̍h宇宙萬物等一切受造物。

第7節,這是引用詩篇第五十五篇22節。
耶穌基督bat對跟tòe伊ê人講過,到伊hia thang hō͘性命ê負擔減輕,hō͘性命得tio̍h安息(參考馬太福音十一:28—30)。Chiah-ê「重擔」指ê就是煩惱、煩惱、操心、愁煩等等,是hō͘人性命感覺困苦ê事物。Án-ne,任何人只要是接近耶穌基督,就會得tio̍h性命ê安息,會因為耶穌基督是性命ê主,會hō͘人ê性命活得koh khah輕快、有力。

「因為祂(上帝)關心lín」,chit句話tú好講出基督教信仰siōng大ê特質,就是kā咱講:上帝是疼。充滿愛ê上帝關心所有óa靠祂救恩ê人。
第8節,tùi福音書中mā thang看tio̍h耶穌基督提醒跟隨者tio̍h時刻「警醒」,原因就是kah末日來臨,以及會tú-tio̍h ê苦oh得有關(參考馬太福音廿六:41,馬可福音十三:32—37),tī伊ê教導中mā一再提醒hiah-ê當奴僕ê,tio̍h「警醒」注意主人隨時會來到(參考路加福音十二:35—38)。

Chia ê「魔鬼」,mā是teh指hiah-ê專門製造毀謗糾紛ê人。這thang到早期社會為tio̍h beh害基督徒,就用真chē方法來陷害,甚至用錢買做假證者陷害基督徒,chiah-ê ná親像「魔鬼」ê陷害者,in tú親像iau餓ê獅,teh chhōe「吞食」ê對象。因為án-ne,作者講tio̍h小心chiah-ê「仇敵」,免得被傷害。

第9節,chia提起tio̍h用「堅定」ê「信心」來「抗拒」chiah-ê ná親像「魔鬼」ê誘惑者,即使因為án-ne而受苦,mā tio̍h堅持落去。雅各書ê作者甚至講只有chit種堅持,ē-tàng hō͘誘惑者á是陷害者知難而退。所謂「堅定」chit-ê詞,通常是用tī軍事戰爭中,kā戰場上會阻礙抵抗ê所在lóng清除掉。

Koh講,chit節mā說明為tio̍h福音ê緣故,tī基督教信仰歷史上差不多全世界各地lóng仝款,記錄了信徒受tio̍h迫害ê經歷tùi m̄-bat間斷過。作者用chit種話來安慰當時ê信徒,ài in感覺tī受tio̍h迫害中bē有孤獨感。

第10節,chit節hō͘ tī受苦中ê信徒看tio̍h,tú-tio̍h ê苦難bē是久長ê,卻是目nih-á ê。相對ê,將來ê榮耀卻是永遠ê。Chia作者特別強調,上帝乃是「賞賜一切恩典」ê上帝。所謂「一切恩典」乃是指新性命,mā就是永恆ê性命,án-ne chiah是所有恩典ê總和。因為有chit種恩典,ē-tàng抵擋會tiâu這世間一切ê苦難kah誘惑。Hō͘人ê心kah耶穌基督連結做伙,mā只有án-ne,ē-tàng kah耶穌基督同齊受苦來死,並且mā因為án-ne kah伊同齊享受koh活ê榮耀(參考羅馬書六:5、8)。

第11節,ē-sái講是chit本書信ê結尾,ná親像tī第四章11節仝款。

第12節,thang看出chit封書信真可能就是使徒彼得ê助手「西拉」寫ê,m̄-koh使徒彼得簽了名,這ná親像使徒保羅寫ê羅馬書仝款,是由德提代寫,使徒保羅簽名表示書信內容是根據伊ê意思寫做ê(參考羅馬書十六:22)。
「西拉」,伊就是耶路撒冷教會派去安提阿教會訪問ê兩人ê一,另外一位就是巴撒巴ê猶大,in兩人lóng是耶路撒冷教會信徒所敬重ê代表,in受耶路撒冷教會使徒會議ê委託,去解釋使徒會議所做成ê決議hō͘安提阿教會(參考使徒行傳十五:22—29)。後來使徒保羅第二pái去旅行傳福音,西拉接受使徒保羅ê邀請同行(參考使徒行傳十五:40)。Tùi使徒行傳中thang看tio̍h西拉真正是一位好ê福音伙伴,使徒保羅tī其它書信中lóng bat提起西拉ê名(參考哥林多後書一:19,帖撒羅尼迦前書一:1,帖撒羅尼迦後書一:1),伊m̄-nā幫助使徒保羅,mā tùi chit封書信中看tio̍h伊mā是使徒彼得好ê同工。

第13節,chia用「同蒙揀選ê巴比倫教會」chit句話,會hō͘讀者感覺奇怪,因為chia用「巴比倫教會」,而tī希臘文聖經並無「教會」chit-ê詞,而這「同蒙揀選」chit-ê詞則用陰性ê句話,因為án-ne,有人講這是teh指使徒彼得ê bó͘講ê,因為使徒彼得就是帶bó͘四界去傳福音(參考哥林多前書九:5)。M̄-koh無法度確定是m̄是真正親像án-ne?若是真正án-ne,伊為甚麼kā家己ê bó͘譬喻做「巴比倫」?確實真oh理解。

Koh講,若是「巴比倫」ná親像啟示錄作者用來譬喻tio̍h羅馬ê話(參考啟示錄十六:19、十七:5),用「巴比倫教會」chit-ê詞,mā是teh保護當時受迫害ê教會,ná親像啟示錄仝款,無想beh hō͘人一看馬上知影是寫hō͘羅馬帝國統治之下當teh受迫害ê基督教會信徒看ê書信。

Chit節mā提起「馬可」,作者並且講是「我ê kiáⁿ」,因為án-ne,有kóa聖經學者認為chit位「馬可」就是馬可福音作者,因為kah彼得關係匪淺,因為án-ne,馬可福音就是tī使徒彼得口述之下,馬可寫做ê,因為án-ne馬可福音teh記述有關耶穌基督ê事蹟上,尤其是有關使徒彼得ê事頂面,記載kah真詳細。M̄-koh另外有人認為chit-ê「馬可」真可能真正就是使徒彼得ê kiáⁿ。另外一種講法,講chit位「馬可」就是使徒行傳中ê「約翰‧馬可」,伊kah巴拿巴有遠親關係,m̄-koh tī第一pái被推薦陪同使徒保羅、巴拿巴去旅行傳道ê時,tī半途kiu-kiu tńg來耶路撒冷,為tio̍h chit件事,致使使徒保羅kah巴拿巴鬧翻了(參考使徒行傳十三:5、13、十五:37—39)。不過後來chit位馬可iáu是成做使徒保羅真好ê同工(參考歌羅西書四:10,腓利門書24節)。

第14節,chit種以聖潔ê「疼心彼此chim嘴」互相請問ê方式,mā是使徒保羅不時tī書信結尾ê時所用ê句型(參考羅馬書十六:16,哥林多前書十六:20,哥林多後書十三:12,帖撒羅尼迦前書五:26)。

重新查詢 專卷研經 彼得前書系列
錯誤回報,請聯繫comm[@]fhl.net