彼得前書 4章1節 到 4章19節   背景資料  上一筆  下一筆
作者tī chit章經文中,ài所有ê信徒明白因為耶穌基督ê受苦潔淨、洗盪了所有信靠伊ê人ê罪,因為án-ne,就m̄-thang koh一pái墮落à。一定tio̍h teh生活勝有所節制、約束。好成做一個真正分別為聖ê上帝子民。

作者tùi信徒一定tio̍h tī家庭kah社會生活上有美好ê見證講起,因為tī使徒ê時代,基督徒是真少數ê,而chit種少數tī一個社會中會顯得特別搶眼,有真chē目睭注意在看tio̍h。如果小khóa不注意,真容易落入口實而褻瀆基督徒ê信仰。因為án-ne,kā信仰用tī生活kah工作上,就成做眾使徒tī早期教會生活中ê一項真重要之教導內容。Ná親像使徒保羅所講ê:「兄弟姊妹,所以, 我óa 靠上帝ê憐憫,勸lín 獻家己ê 身軀做祭,是活ê,神聖ê,上帝所歡喜ê 祭;這是lín 誠心誠意ê 服事。(全民版)」(羅馬書十二:1)

Tī chit章作者繼續提起chit本書信ê主題—為tio̍h基督ê緣故受苦難,乃是一件榮耀ê事。因為án-ne,即使是受tio̍h迫害而tú-tio̍h苦難,mā tio̍h tī各方面lóng有美好ê見證。

    第1節,節thang參考第二章24節。

    彼得前書ê作者tùi開始就鎖定「受苦」chit-ê題材,beh談有關因為信耶穌基督而受tio̍h ê chit種迫害,tī每章經文lóng有提起基督徒若是因為信耶穌基督ê緣故而受tio̍h迫害ê時,應該有ê態度。

Chia ê「苦難」,kah耶穌基督tī十字架上ê死有關係,因為耶穌基督ê死,就是kā罪帶上了十字架,hō͘罪mā被釘tī十字架上。Án-ne,信靠耶穌基督救恩ê人便bē koh再被罪纏tio̍h m̄放。Koh講,作者tī chia呼籲信徒tio̍h學習耶穌基督chit種tī十字架上苦難ê樣式,kā它看做是一種信仰ê功課來學習,這就kah-ná kā罪釘死tī十字架上仝款,因為耶穌基督就是kā人類ê罪帶到十字架ê。因為án-ne,tùi信仰ê角度來看「苦難」ê時,對一個基督徒來講,並m̄是一件pháiⁿ事,卻是幫助基督徒學習成長ê機會。

第2節,ná親像第1節所講ê,學習耶穌基督tī十字架上ê方式,kā罪隔絕出來了後,chit種人第一個轉向就是會順服tī「上帝旨意ê管束」做tāi-chì,而bē koh再跟tòe引誘人犯罪ê「慾望」行。Chia ê「慾望」是用複數,表示有真chē、算bē完ê慾望。這表示誘惑人犯罪ê方式、力量真chē mā大,m̄-koh lóng會因為學習耶穌基督用十字架chit種苦難ê方式,thang真徹底kā罪隔絕出來。

第3到4節,chit兩節就是tī講tio̍h學習耶穌基督chìn前、後ê差別;tī chit chìn前,是跟tòe誘惑人犯罪ê慾望行。chit-má因為學會曉耶穌基督十字架ê樣式,開始過著有節制ê生活。M̄-koh,卻會因為án-ne而受tio̍h過去hiah-ê生活tī淫蕩中ê同好者所侮辱,因為hiah-ê人會tùi改變後ê基督徒身上看tio̍h家己ê罪態,會發見原來自己ê醜相,m̄-koh卻無法度接受,koh m̄承認,因為án-ne就會有惱羞成怒ê反應出來。

第5節,thang參考希伯來書第四章13節。

非常清楚ê,不管是活teh ê人á是已經死去ê人,lóng仝款會tī上帝ê審判之下。約翰福音ê作者kā咱講:「天父 lóng 無kā 人審判,祂kā 審判ê 權柄lóng 交帶Kiáⁿ。(全民版)」(約翰福音五:22,另外參考提摩太後書四:1)然後koh講即使是已經tī墳墓中ê人,mā kā tùi墳墓內出來接受審判(參考約翰福音五:28—29)。這mā是使徒信經中所講,koh活了後ê耶穌基督坐tī上帝正pêng,伊kā天頂來審判活人kah死人。

第6節,thang kā chit節對照第三章19到20節。
Chia比較pháiⁿ紡ê問題,就在tī「死人」是teh指甚麼對象?有兩種講法:一是teh指hiah-ê tī肉體上確實已經死去ê人。二是teh指hiah-ê靈性上已經死去ê而肉體iáu活teh ê人。一般人lóng是tùi外表判斷;當看tio̍h一個人會動,會講這是一個「活人」,m̄-koh上帝則看人ê心靈。一個會動ê人有可能ná親像已經死去ê人仝款,俗語所講ê「心死」大概就是án-ne ê意思。親像有ê人看起來kah-ná lóng bē振動,每pái有甚麼活動,lóng bē參與。就án-ne大家會講chit-ê人kah-ná不存在仝款,大家lóng kā伊bē記得,ē-sái講是伊卻是活teh ê。基督教ê福音對每一個人lóng存希望,mā lóng寄hō͘極高ê ǹg望,就算是表面上看起來bē動ê人,tī基督教ê福音看起來,lóng存 ǹg望。即使是一個被判死刑ê囚犯,基督教ê福音mā bē放棄,因為伊ê靈魂iáu是需要拯救。換句話講,真正福音就是對任何性命lóng有「koh活」、「重生」ê ǹg望。

第7節,tùi chit節thang清楚看tio̍h末日ê思想非常chiok厚。Tī彼得前書中chit種思想一再出現,親像tī第一章13到16節。其實,chit種思想並m̄是只出現tī使徒書信中,tī耶穌基督ê言論mā出現過末日來臨教示,親像馬太福音第廿四章,馬可福音第十三章,路加福音第廿一章7到36節等等經文,lóng真真明顯講出末日來臨ê景象。

新約時代ê教會則進一步kā世界末日來臨ê時刻,kah耶穌基督koh再臨ê觀念連結做伙。使徒ê書信中類似chit種用詞一再出現,親像腓立比書第四章5節,希伯來書第十章25節,雅各書第五章8節,約翰一書第二章8節、28節,啟示錄第一章3節、第廿二章7節、12節、20節等等。

「警醒祈禱」,chit句話thang講mā是使徒保羅一再告誡所有信徒ê事(參考以弗所書六:18,歌羅西書四:2,帖撒羅尼迦前書五:17)。祈禱ē-sái講是基督徒信仰生活siōng bē-tàng欠缺ê一件事,因為祈禱是kah上帝保持美好關係siōng好ê方式,無祈禱,á是bē記得祈禱,lóng等於是bē記得有上帝tī咱性命中仝款ê嚴重。

第8節,chit節thang講是教會存在siōng大ê特色,因為一間教會若是會失去「彼此真誠相疼」ê見證,就無法度傳出上帝tī耶穌基督內面拯救kah愛ê信息。耶穌基督tī約翰福音第十三章34到35節bat講過,只有tī疼ê內面,ē-tàng hō͘人看出咱是祂ê學生。

作者tī chia講beh「真誠相疼」ê「真誠」chit-ê字,tī希臘文是用「ektenes」,意思是teh指「無停」,mā就是講相疼ê心bē-tàng停止,是繼續不斷ê teh進行。因為án-ne只要教會存在ê一工,信徒就beh繼續不斷來練習「真誠相疼」ê這門功課。

Koh講,chit節講「因為愛ē-tàng消除真chē罪過」,chit句話是引用箴言第十章12節所講ê:「憎恨引起爭端;愛ē-tàng掩蓋一切過錯。」箴言chia所講ê「掩蓋」,意思是teh指赦免ê意思(參考雅各書五:20)。

第9節,「彼此殷勤接待,m̄-thang埋怨」,chit句話是有一個重要ê背景,he就是早期教會無親像今á日有神學院teh訓練傳道者到各地去傳福音、佈道等工作。卻是有真chē tī信仰上有感動者四界去見證福音,像siōng早tī耶路撒冷教會選出來ê七位使徒ê協助者仝款。另外就是有使徒保羅ê門徒,親像提多、提摩太等類似chit種傳福音者,in tī早期教會中,並m̄是固定tī一間教會,卻是一個人同時負責真chē間教會,需要四界去傳福音ê信息,因為án-ne,每pái到一間教會去,就需要有人接待。

另外一方面,早期教會因為信徒少,彼此之間ê往來mā會koh khah親密些,因為彼此lóng是信徒,所以lóng會透過教會之間ê聯繫提供接待ê機會,án-ne有幾個好處,其一是節省了真chē不必要ê費用,其二是thang透過án-ne ê接待,大家彼此分享教會ê實況。

第10到11節,作者提供一個重要ê認bat:tī教會chit-ê信仰團契中至少有兩個基本要件,其一是每人身上所有ê恩賜lóng是tùi上帝來ê賞賜,這是為tio̍h beh彼此分享(服事),卻m̄是beh獨自擁有。其二是用上帝賞賜ê chiah-ê恩賜來服事福音ê工作,並m̄是beh展寶家己ê能力,卻是為tio̍h beh榮耀上帝ê名。Chit點mā是長老教會創會者約翰‧加爾文所講ê「kā一切榮耀歸hō͘上帝」。

「宣講上帝ê話」。聖經就是上帝ê話,這是非常清楚ê,若是傳道者無照聖經ê教示來傳揚,he就是m̄-tio̍h。教會存在ê主要使命就是beh傳揚上帝ê話,而傳道者koh khah是beh盡心、盡力地kā上帝ê話傳揚出去。
「世世無窮,阿們」chit句話,看起來ná親像一封phoe ê結尾仝款。Tùi腓立比書第四章20節,希伯來書第十三章21節,以及彼得前書第五章11節等等,lóng會看tio̍h這是用做結束句型。因為án-ne,有kóa聖經學者認為彼得前書ê第一封phoe,應該是到chit-ê地方暫有一個段落,然後tùi第四章12節開始,又koh是另外一封新ê書信。

第12到14節,作者寫chit本書信ê主軸,就是teh鼓勵因為信仰而受苦ê眾信徒,ài大家有堅定ê信心,m̄-thang失志、餒志,上帝必定會有重大ê報償teh等待。

馬太福音第五章記載耶穌基督tī山頂教導門徒ê時mā講過chit種教導, ài眾門徒明白為tio̍h傳福音而受苦難,等於tī天頂累積了真chē福氣仝款,he是上帝tùi天頂beh獎賞hō͘為福音受迫害者所準備ê。這真清楚hō͘咱看tio̍h有堅定信心ê重要性,因為有堅定ê信心,chiah bē tī受tio̍h迫害ê時就改變了本來ê信仰。使徒保羅就特別提醒當時ê信徒,ài有受迫害ê心理準備,伊講:「所有ài beh kah 基督耶穌結聯來過敬虔生活ê 人,lóng 會受迫害。(全民版)」(提摩太後書三:12)伊mā講若是因為信仰ê緣故而受tio̍h迫害,he就是等於teh「分擔基督ê苦難」仝款,mā tio̍h「分享」耶穌基督ê koh活ê「榮耀」,伊強調講chit份榮耀乃是上帝特別保留落來beh hō͘所有因為信仰而受tio̍h迫害ê人領受ê(參考羅馬書八:17)。

作者講「若因跟tòe基督而受凌辱,就實在有福氣;這表示榮耀ê聖神,就是上帝ê靈,tī lín身上」,chit句話非常重要,真可能引用自siōng早殉教ê司提反之經歷,當伊被迫害而一定tio̍h面對民眾the̍h石頭beh phah死伊ê時chūn,使徒行傳作者路加án-ne描講述:「獨獨司提反 hō͘ 聖神充滿,gia̍ h 頭看天,看tio̍h 上帝ê 榮光,mā 看tio̍h 耶穌khiātī 上帝ê 正pêng。(全民版)(使徒行傳七:55)這是「榮耀ê聖神」充滿司提反ê心,chiah hō͘伊心甘情願地接受性命ê苦難而不退卻。彼得前書作者強調基督徒受tio̍h迫害就是án-ne,信仰tú-tio̍h苦難並m̄是pháiⁿ運,顛倒tio̍h知影he乃是上帝所允准ê,因為這是teh幫助一個信徒透過受苦而hō͘信仰ê內涵ē-tàng昇華。因為án-ne,作者tī第12節就講這就ná親像「tú-tio̍h火仝款ê考驗」

第15節,作者tī chit節特別提起是因為信仰ê苦難,並無包括chiah-ê屬tī倫理道德,á是人為ê疏忽。Mā就是講,m̄-thang kā家己ê錯誤,全部lóng推到信仰ê層面,這並無正確。

第16節thang參考使徒行傳第十一章26節,該處經文提起「基督徒」chit-ê名號ê由來,就是tùi安提阿開始ê。Á安提阿chia ê基督徒就是因為tī耶路撒冷tú-tio̍h迫害逃避到chit-ê所在,m̄-koh in並m̄是因逃避而kā福音ê信息hō͘關閉、改變,顛倒,in逃到安提阿去避難(參考使徒行傳十一:19),然後kā安提阿當做廣傳福音ê基地,mā因為án-ne hō͘ in因信耶穌基督而得tio̍h「基督徒」chit-ê名稱。因為án-ne,這「基督徒」並m̄是hō͘信徒感覺見笑ê「名號」,顛倒,這是一個「榮耀上帝」ê稱呼。

第17節,「審判ê時chūn到à」,而審判beh tùi「上帝家ê kiáⁿ」開始先受審判,chit種觀念真可能kah以西結書第九章6節ê經文背景有關。該處經文提起上帝ê審判先tùi耶路撒冷ê長老開始,然後chiah是老人到嬰á等。先知阿摩司mā真清楚講,以色列人民是上帝特別揀選出來ê族群,因為án-ne,tī審判ê時chūn,上帝會特別注意tio̍h in(參考阿摩司書三:2)。
作者tī chia強調一個重點:如果一個耶穌基督ê信徒beh ài得救,lóng需要付出真大ê代價,hiah-ni̍h無信ê人想beh得救,豈m̄是需要付出koh khah chē?Thang想像會有koh khah chē ê困難。

第19節,作者勉勵所有ê信徒,tio̍h用「完全信賴」ê心,kā性命委託tī慈悲ê創造主、上帝ê手中。Chia作者提起兩件事,第一是甚麼款ê人ē-tàng kā家己ê性命完全交託tī上帝手中?就是hiah-ê因為上帝ê旨意而受苦難ê人。換句話講,是hiah-ê確實是為tio̍h信靠上帝福音、傳揚福音而受苦ê人,chit種人thang kā性命交託tī上帝手中。第二是chia所講tio̍h ê「信賴」chit-ê詞(tī《和合本》用「交與」,tī《台語漢字本》版用「交帶」),chit-ê詞tī希臘文是「paratithesthai」,這字ê意思就是kā錢財委託放siōng thang信靠ê親友保管。Á受委託保管ê人會感覺真榮幸,因為被信任。Á交託保管ê人,thang絕對放心。

一個對上帝tī耶穌基督內面ê救恩有絕對信心ê人,就是上帝所歡喜ê對象,chit種人,因為對上帝有絕對信心,mā寧可kā家己ê性命交託tī上帝手中,這是真正確ê事,因為上帝就是性命ê創造主,mā是賞賜性命ê主。
重新查詢 專卷研經 彼得前書系列
錯誤回報,請聯繫comm[@]fhl.net