彼得前書 3章1節 到 3章11節   背景資料  上一筆  下一筆
Tùi使徒ê書信中thang看tio̍h婚姻ê問題可能是早期教會中一再發生ê事。使徒保羅ê書信看tio̍h chit方面ê問題,親像以弗所書第五章21到33節;歌羅西書第三章18到20節等等,lóng有提起chit方面ê事。Á teh寫hō͘哥林多教會ê書信中,則用第七章kui章ê篇幅teh討論有關婚姻關係。另外,使徒保羅寫hō͘提摩太kah提多chit兩位門徒ê書信中,雖然無真清楚說明夫妻生活之道,m̄-koh thang看tio̍h伊tī提醒chit兩個門徒,tī in所牧養教會ê教會中選擇重要幹部ê時,一定tio̍h注意chiah-ê被揀選幹部ê婚姻生活上是m̄是有規律。親像伊強調chiah-ê教會幹部「ê bó͘ mā得有好品行」,mā講「教會領袖ê助手只有ē-tàng有一個bó͘」(參考提摩太前書三:11、12),koh講:「Chiah ē-tàng 教示少年ê 婦人人疼in ê 丈夫,疼in ê kiáⁿ兒。(全民版)」(提多書二:4)chiah-ê句話lóng tī說明教會中必要處理夫妻婚姻生活ê問題ê時,應該tio̍h注意ê事。

Chit-má是彼得前書mā談及chit方面ê問題,tùi經文中thang清楚看tio̍h,作者siōng關心ê一件事,就是夫妻之間有無仝信仰ê時,應該用怎樣ê態度來面對?chit種問題其實mā是今á日ê基督徒不時teh詢問ê問題。Á問題siōng chē ê,就是信了耶穌基督ê婦女,嫁hō͘一個非基督徒ê丈夫ê時,怎樣辦?比較少問題ê是當丈夫是基督徒,娶入來ê bó͘ m̄是基督徒ê時,chit種糾紛比較少,原因是東方ê社會lóng是男性中心,對女性ê要求mā比較多。因為án-ne,一般lóng有chit種現象,就是娶新婦入門了後,如果有無仝ê信仰ê時,就會要求新婦跟tòe夫家改變信仰。Mā因為chit種緣故,彼得前書ê作者講tio̍h做一個基督徒婦女嫁到一個非信徒ê家庭ê時,該怎樣扮演好做bó͘ ê角色,thang hō͘丈夫ē-tàng因為án-ne受tio̍h感化而跟tòe信耶穌基督。我相信彼得前書作者提供hō͘咱ê,對今á日基督教會ê信徒應該有真值得參考ê所在。

    Koh講,Tī chit章中作者強調行善是會得tio̍h上帝賜福ê,而且chiah-ê tùi上帝來ê賜福真緊to̍h會來臨。親像第10到12節,作者引用詩篇第三十四篇12到16節ê詩歌,主要mā是teh強調chit-ê理念:用疼贏過惡,chit種人ê祈禱必定會得tio̍h上帝垂聽。雖然基督徒行善乃是siōng基本ê信仰見證,m̄-koh作者iáu-koh bē bē記得提醒信徒,上帝會賜福hiah-ê行善ê人,因為這就是teh實踐上帝ê教示。

	彼得前書是寫tī一個迫害ê時代,tī he樣ê環境中,基督徒koh khah需要用好ê品行kah行為來kah當時社會有一個區隔,siōng主要目的就是beh hō͘當時ê人看tio̍h基督徒ê好行為,而bē被隨便加上無必要ê罪名,甚至ē-tàng塞tiâu別人悠悠之口,這mā是耶穌基督teh教導伊hit時代ê猶太人仝款,m̄-thang kah統治者羅馬帝國ê軍隊直接衝突,因為in ê手上有強大ê武器,一般人看hiah-ê強大ê軍事武器,就會驚惶。M̄-koh耶穌基督hō͘咱學會曉知影,真正武器並m̄是tī chiah-ê用人ê手打造起來ê兵器,卻是tī人ê心,而且善心。

Tńg來到聖經時代背景,就會瞭解cha-bó͘人是屬tī cha-po͘人ê「財產」,並m̄是自由ê,mā m̄是獨立ê,丈夫對bó͘有絕對ê權柄,因為án-ne,用今á日講究「兩性平權」ê時代看chit種背景當然會感覺格格不入,甚至會感覺真奇怪。M̄-koh ná親像頭前提起過ê,早期基督教會因為基督徒kah非基督徒結婚ê例bē少,必定會產生真chē紛爭,特別是tī信耶穌基督了後,夫妻之間若是無共同信仰,該怎樣彼此互相對待?類似ê問題mā會發生tī主人kah奴僕(奴隸)之間。彼得前書作者kā重點khǹg tī「順服」chit-ê信仰理念上,探討夫婦ê關係。

第1節,chit節一開始原本希臘文有「仝款」chit-ê字,chit字是介系詞,用tī第二章kah第三章之間,是beh表明tī第二章所提起ê有關奴隸kah主人之間關係ê觀點,mā thang用來看bó͘ kah丈夫之間ê關係。因為作者chia用「順從」(hypotasso)ê chit-ê字,mā仝款tī第二章13節、18節使用。所謂「順從」,是teh指「真誠」、「無欺騙」ê意思。會án-ne要求,就是因為丈夫乃是iáu「無接受真道」ê人,因為án-ne,作者認為án-ne chiah是teh見證福音siōng好ê方式,ná親像用忠實ê態度扮演好一個奴僕ê角色ê時,就是見證信仰siōng好ê途徑仝款。

Koh講,chia提起「免得加講話」,這有兩個方面ê thang供思考:
一是,猶太人一向就無歡喜cha-bó͘人kāu發表意見。

二是,當時ê cha-bó͘人無親像chit-má有所講ê職業婦女,lóng是家庭主婦。會多話,必定跟tòe tī左鄰右舍之間話sian有關。

作者希望做bó͘ ê人tio̍h學習做一個忠實ê cha-bó͘人,就是用「好ê品行」來感化丈夫,卻m̄是用加講話想beh說服別人來認bat福音。

第2節,「端莊ê品行」,這kah第1節ê「好ê品行」kah有仝款ê意思,lóng是teh指無浪蕩ê行為,意思就是做一個正經ê cha-bó͘人,不beh hō͘別人認為chit種cha-bó͘人kah-ná kah別ê cha-po͘人有不正常ê關係仝款。
第3節,chit節koh khah進一步提起tī妝扮上ài beh特別注意,m̄-thang過份。Thang kā chit節對照提摩太前書第二章9節使徒保羅所講ê:「我mā希望cha-bó͘人穿戴樸素大方ê衣飾;m̄-thang用奇異ê髮型、金飾珠寶,á是高價ê衫褲為裝飾。」其實在舊約先知文獻中,mā不時提起chit方面ê警告(參考以賽亞書三:18—24,阿摩司書六:4—6)。

作者tī chia用「妝飾」,這字tī希臘文就是「kosmos」,意思是teh指引起別人ê注意。作者用chit-ê字真有意思,已經teh說明福音m̄是商品,無需要用phah廣告ê方式來引起別人ê注意。

第4節,chit節mā是kah第3節相對照。Tī這節作者講真正美,是「內在美」,chit種美有兩個特色:其一就是久長「bē衰退」,其二mā是siōng重要ê一點,he就是chit種心內ê價值chiah是上帝所看重ê。換句話講,人看外表,上帝看ê是心內(參考撒母耳記上十六:7)。其實,作者並m̄是反對cha-bó͘人打扮、妝飾,卻是teh強調真正美乃是上帝賞賜ê,上帝賞賜hō͘人ê乃是一個純潔ê心—「溫柔嫻靜」。若是人用化妝品來遮蓋上帝創造ê心內之美,he就是本末顛倒khǹg ê做法。

第5到6節,chit兩節ê經文提起亞伯拉罕kah伊ê bó͘莎拉ê事件做例,這有兩方面ê意思,一是莎拉對亞伯拉罕lóng真順從,包括in離開家鄉哈蘭tú-tio̍h饑荒而進入埃及避難ê時,亞伯拉罕ài莎拉m̄-thang承認in是夫妻關係(參考創世記十二:10—19),chit種事件後來koh一pái發生過一pái(參考創世記二十:1—2)。二是當上帝ê天使kah莎拉講koh過一年,伊kā生一個kiáⁿ。起先莎拉並m̄相信,伊甚至kā天使講伊ê「主人」亞伯拉罕講家己已經年老ā,根本就無可能有chit種事發生(參考創世記十八:12)。M̄-koh最後伊接受chit-ê年老生kiáⁿ ê應允(參考創世記十八:1—15)。作者用chit-ê比喻ê主要目的,是beh說明對上帝beh絕對ê順從,用chit種心境來建構夫妻ê關係。

第7節,相對tī bó͘,就是當丈夫ê應該有ê態度kah責任。作者tī chia提起當丈夫ê角色kah態度ê時,是強調丈夫ê責任。

一是丈夫tio̍h kah bó͘「同齊生活」,chit句話真重要,表示丈夫ê kan-taⁿ ē-tàng kah bó͘有「性」關係,bē-tàng有其他ê性行為發生。用今á日ê語言就是bē-tàng有「婚外情」ê意思。

二是做丈夫ê tio̍h知影「體貼」bó͘ ê軟弱,會án-ne講,ná親像頭前已經提過ê,聖經時代ê女性,無法度外出工作,只有ē-tàng協助丈夫整理田園、家務之外,不許有社交生活。Mā因為án-ne,婦女對社會動脈並m̄是真清楚。

三是beh「尊重」in。Chia所講ê「尊重」,意思是teh指「保護」,因為tī頭前提起cha-bó͘人比較「軟弱」,hit字ê原意是teh指容易破碎ê「器皿」。因為án-ne,「尊重」就有兩個層面ê意思了,一是teh指容易破碎,所以tio̍h小心,就kah-ná保護容易破碎ê器具仝款,小khóa無小心就會損傷。Koh講,是teh指「貴重」ê意思。因為是「貴重」,所以koh khah需要珍惜。

四是無論是cha-po͘人á是cha-bó͘人tī上帝面前lóng仝款「領受上帝所賜ê新性命之救恩。換句話講,tī上帝面前,男女並無貴重輕賤之分,上帝對每一個人lóng仝款看重。

五是上帝會垂聽有頂面所講chiah-ê態度ê cha-po͘人ê祈禱。Ē-tàng看出作者強調一個cha-po͘人一定tio̍h有頂面所講四點做基礎,伊ê祈禱上帝chiah會垂聽。Mā就是講一個丈夫無法度kan-taⁿ會管轄bó͘,卻m̄知怎樣疼惜bó͘,一個bē疼惜bó͘ ê人,無論伊怎樣祈禱,真難得tio̍h上帝ê祝福。

不過,有kóa學者認為chit句「Lín ê祈禱」中ê「Lín」,是teh指夫妻兩人,m̄是kan-taⁿ指cha-po͘人而已。因為兩人lóng是領受仝款ê恩典,只因為性別kah角色ê差別無仝,m̄-koh lóng有各自應該盡ê責任kah義務,因為án-ne夫妻一定tio̍h同時盡到責任chiah是真當teh回應上帝救恩ê疼,án-ne祈禱ê時chiah會有意義thang講。



重新查詢 專卷研經 彼得前書系列
錯誤回報,請聯繫comm[@]fhl.net