彼得前書 3章12節 到 3章22節   背景資料  上一筆  下一筆
Chit段經文讀起來確實真熟悉,因為tī使徒保羅ê書信中mā有chit方面真清楚ê教導(參考羅馬書十二:17—21)。Chit段經文mā ē-sái講是kā問題焦點拉tńg來到教會chit-ê信仰大家庭中來,基本上,作者khah強調ê是:如果tī一間以信仰做基礎建造起來ê教會,如果無親像一個家庭hit種,親如家庭中ê兄弟姊妹一般,chit種教會就真難得有甚麼好ê見證。

Koh講,chit段是繼續teh談有關善kah惡之間ê行為。Á tùi chit段經文hō͘咱koh khah清楚,作者用「善」teh表示對上帝有夠額ê信心,寧可為因為信耶穌基督而忍受一切ê迫害。相對ê,「惡」就是teh指hiah-ê迫害基督徒ê氣力。因為án-ne,chit段經文就koh khah清楚指出tio̍h忍受一切ê迫害,用koh khah堅定kah溫和ê態度,hō͘ hiah-ê迫害者知影見笑。Ná親像tī前一段提起對hiah-ê迫害者,tio̍h用koh khah chē ê疼心來感化in,ná親像一個嫁hō͘非基督徒ê cha-bó͘-gín-á,tio̍h用疼來感化伊ê丈夫仝款。chit-má作者進一步提起tio̍h鼓勵hiah-ê受tio̍h迫害ê基督徒有koh khah明確ê行動,來表明家己即使受tio̍h迫害,mā thang堅忍落來,因為知影chiah-ê受tio̍h迫害所帶來ê苦難,lóng有上帝ê旨意在其中。

第8節,使徒行傳記載siōng早教會團契形成ê時,大家lóng是「同心合意」ê聚集做伙tī教會裡,chit種「同心合意」ê聚集做伙是為tio̍h beh敬拜上帝,並且過完全分享ê生活,in活出親如兄弟姊妹般ê大家庭樣式(參考使徒行傳二:43—47、四:32—35)tī chia,作者tī信仰ê團契裡,大家lóng tio̍h「同心,互相同情,親如手足,以仁慈謙讓(jiōng)相待」,這會比出世tī仝一個家庭ê親人koh khah親密。

第9節,chit節thang參考羅馬書第十二章14節使徒保羅講ê話。

猶太人久長以來傳承自摩西律法ê教示,就是:「目睭賠目睭,嘴齒賠嘴齒,手賠手,腳賠腳,燒賠燒,傷賠傷,phah 賠phah。(全民版)」(出埃及記廿一:24—25)M̄-koh chit種觀念並無為in帶來和平,反tńg是帶來koh khah chē ê報復kah仇恨。這mā是為甚麼耶穌基督教導祂ê門徒是完全無仝款,伊ài眾門徒tùi「bē-tàng向欺負lín ê人報復」(參考馬太福音五:39)做起。伊甚至講:

「人若 kā 你控告,behài 你 ê 內衫,tio̍ h 連外衫 mā 放 hō͘ 伊。若有人強迫你揹伊ê 行李行一里路,tio̍h kah 伊行兩里路。 若有人對你求甚麼,tio̍ h hō͘ 伊。若有人 beh kā 你借甚麼,m̄ -thang kā 伊拒絕(全民版)」(馬太福音五:40—42)

作者tī chia強調另外一個基本概念,人被揀選出來成做基督徒,就是siōng大ê福氣。因為hō͘ 上帝揀選ê人,就是上帝ê奴僕,mā是上帝ê同工,這是一種極大ê榮耀,而被揀選是上帝hō͘基督徒siōng大ê恩典,m̄-koh chit種恩典並m̄是beh hō͘基督徒獨享ê,而是beh分享hō͘別人ê,若無,被揀選做上帝ê奴僕、同工就失去意義à。基督徒就是beh帶上帝ê祝福hō͘別人,卻m̄是beh詛咒無歡喜ê對象。Beh hō͘人因為有基督徒在身邊,而得tio̍h上帝ê福氣。

第10到12節,chit段經文是引用詩篇第三十四篇12到16節。
作者強調若是想beh過好日子,享受人生ê喜樂,就需要禁止「嘴舌講pháiⁿ話」。無錯,嘴舌若是無用來歌頌上帝,卻是用來詛咒別人ê時chūn,án-ne就kah上帝原本創造ê本意顛倒。第11節ê「行善」kah「追求和平」是對稱ê句型。這是講ē-tàng hō͘紛爭消除,就kah做善事仝款。基督徒是hō͘揀選出來ê族群,就是為tio̍h beh見證上帝揀選ê疼。Á愛chiah是帶領人接近上帝、認bat上帝siōng好ê方法。第12節講上帝會「看顧義人」並且「垂聽」祈禱ê聲音。Chit節所講ê「義人」,就是teh指kah上帝保持和好關係ê人,chit種人mā就是第11節所講促進和平ê人,因為chit種人kah上帝ê關係ná親像老父kah子女之間ê關係。

第13到14節,chit兩節thang參考以賽亞書第八章12節、第五十章9節。
作者Tī chit節提起「mài驚人ê威脅」,ná親像耶穌基督tī路加福音第十二章4到5節所講ê,m̄免驚人,因為人只有ē-tàng迫害人ê肉體。Tio̍h驚ê是當kā人ê性命奪行了後,koh thang kā人下在地獄中ê上帝。原因是人ê生kah死lóng掌握tī上帝手中,祂是咱性命ê主宰。

Chia「為義受苦」ê「義」,是teh指上帝拯救ê信息。Thang參考馬太福音第五章10到12節耶穌基督tī山上寶訓中ê教導。希伯來書ê作者mā用仝款ê話鼓勵當時tī受苦中過日子ê信徒,ài in ài有堅定ê信心。信心是得救ê基礎。Ē-tàng堅持到最後,就ná親像通過性命ê測驗仝款,thang得tio̍h上帝來自天頂ê獎賞。

第15節,chit節引用以賽亞書第八章13節,hi̍t節ê經文背景是tī猶大王亞哈斯ê時代,he是tī主前第735年左右,有強大ê亞述帝國威脅tio̍h,tī猶大ê以色列人心中惶惶不安,m̄知該怎樣辦chiah好。先知以賽亞ài亞哈斯王記tiâu只有上帝chiah是需要「驚惶」,其他來自人ê方面之迫害、威脅lóng thang m̄免驚惶。

Ná親像án-ne,chia作者認為基督徒koh khah應該清楚知影,耶穌基督chiah是咱信仰ê中心,性命中ê一切就是用伊為主,因為án-ne,真正teh beh「敬畏」ê對象是耶穌基督。

第16節,彼得前書ê作者就tī chia提起,當有人來詢問有關信仰ê內容ê時,tio̍h隨時知影用「謙恭溫和ê態度回答」對方,hō͘詢問ê人知影:基督徒並m̄是親像傳言中ê妖魔鬼怪á是猛獸一般ê驚人,beh hō͘別人有好印象,hō͘ hiah-ê專門毀謗基督徒ê人感覺慚愧。

第17節,chit節經文是古代社會流行ê一句箴言,本來ê話語是:「寧可做好事受苦,mā m̄-thang因為做pháiⁿ事被責罰。」作者tī chia加上ê一句「出tī上帝ê旨意」khǹg tī「做好事受苦」了後,表明一個基本信仰觀念:若是因為信仰而受苦難,這其中必定有上帝ê旨意在內面。

第18到22節,chit段經文thang看tio̍h作者提供給幾個重要ê信息:
一是耶穌基督ê拯救一pái就完成à。這是一個真重要ê信仰認知,因為耶穌基督就是上帝ê「獨生kiáⁿ」,是惟一ê,無其他代表。上帝就是beh用耶穌基督來進行一pái全體ê大拯救。而且所用ê方式,mā是siōng殘酷ê記號—十字架。

二是耶穌基督ê拯救,乃是beh kā罪人「帶到」上帝ê恩典面前。聖經講上帝是滿有恩典、慈悲ê上帝,tī上帝ê內面,滿有救恩(參考詩篇一○
三:8—12)。這充分說明一件事:有耶穌基督ê救恩,罪人ē-tàng面對tio̍h上帝ê審判。耶穌基督m̄-nā成做罪人ê保證者,伊mā承擔了罪tī十字架上ê懲罰。

三是耶穌基督ê拯救,是hō͘人得tio̍h永恆ê性命。Chit點mā是kui本約翰福音信息ê中心,就是tī耶穌基督內面,會得tio̍h永恆ê性命(參考約翰福音三:16),m̄是親像肉體仝款,會死去、腐pháiⁿ ê。Chit-má koh活ê性命會是永遠ê,因為無koh有敗壞,mā無koh有罪ê纏絆。因為án-ne,tī耶穌基督內面有永恆ê性命,chit點mā是基督教信仰kah其它宗教信仰之間siōng大ê差別。

四是藉tio̍h洗禮hō͘信靠耶穌基督ê人kah救主耶穌相連結。這mā是tùi第19到22節siōng中心ê思想。因為án-ne,早期教會就是kā洗禮看做是非常重要ê信仰告白。

彼得前書作者tī chia強調真當teh審判人性命ê,並m̄是chiah-ê在世間ê統治者,卻是坐tī上帝正pêng ê耶穌基督,伊已經koh活升天到上帝hia,得tio̍h審判ê權柄。Á洗禮就是一種性命ê記號,每一個受洗ê人lóng有特別ê記號。注意這記號就是teh指洗禮講ê,因為洗禮已經kah割禮有區別,割禮是身軀上ê記號,洗禮是性命ê告白,因為是奉耶穌基督ê名受洗ê(參考馬太福音廿八:19)。

重新查詢 專卷研經 彼得前書系列
錯誤回報,請聯繫comm[@]fhl.net