彼得前書 2章1節 到 2章25節   背景資料  上一筆  下一筆
Kui本聖經hō͘咱一個真清楚ê觀念,信仰是kah生活相連結ê,任何宗教信仰lóng是án-ne,無kah生活相連結做伙ê宗教信仰,hit種宗教是不實在ê,á是虛無ê,對人ê性命並無甚麼意義thang講。

Koh講,宗教信仰應該有真大ê氣力thang導正人往善ê方向前進。人本來就應該有行善ê能力,ē-sái講是人非常軟弱,受tio̍h罪ê控制,hō͘人會失去自我,跟tòe罪ê誘惑腳步行。使徒保羅就有chit種親身體驗,伊講:

「我知我ê本性內面無良善,我有做好ê 意願,m̄ -koh,無做好ê 氣力。我無去做我所意愛ê 好,顛倒tńg 去做我無意愛ê pháiⁿ。 我若做我無意愛ê pháiⁿ,m̄ 是我本身teh 做,是tiàm-tī 我內面ê 罪teh做。(全民版)」(羅馬書七:18—20)

伊tī chia真清楚講tio̍h人有行善ê意願,ē-sái講是卻常常做出kah家己意願相違背ê事。這thang tùi真chē犯罪了後,懊悔ê人身上看會出來。因為án-ne,宗教信仰就tī chit方面ē-tàng發揮真大ê作用,hō͘人藉tio̍h宗教信仰來抵抗深藏tī人心內面ê誘惑力量,hō͘人thang拒絕罪ê誘惑。這ná親像使徒保羅信了耶穌基督了後所講ê:

「感謝上帝,通過主耶穌基督來救我!Án-ne,我ê 內心是順服上帝ê 律法,m̄ -koh,我ê 肉體是順服罪ê 法則。(全民版)」(羅馬書七:25)

確實是án-ne,tio̍h感謝上帝,藉tio̍h認bat耶穌基督,hō͘咱ê性命出現一股堅強ê氣力,當人遇tio̍h試探ê時,thang透過耶穌基督ê名向上帝祈求,抵擋誘惑ê氣力就會自然tek tùi心內深處產生。

彼得前書作者一再提醒信徒tio̍h過聖潔ê信仰生活,tio̍h信徒會記得耶穌基督ê死,對每一個人ê性命付出了非常高ê贖罪之價。chit-má作者則進一步beh kā所有ê信徒講,本身是一個基督徒,就應該知影珍惜chit種用耶穌基督ê性命贖罪換來ê恩典。

第1到3節,信仰kah一個人性命ê成長是仝款ê,就是beh成長,而bē-tàng kan-taⁿ停留tī嬰á期ê中間。Á tī成長ê過程中,必定會tú-tio̍h真chē痛苦,而chiah-ê痛苦mā是成長ê一種代價。

Chia作者用「排除」chit-ê字,tī希臘文ê意思是「thǹg掉衫褲」。作者用chit-ê字,有一個真重要ê背景,就是早期教會ê洗禮lóng是用浸禮,做一個人決志beh受洗ê時,就是beh thǹg掉原來ê衫褲,換上一件潔淨ê白袍浸入水中。象徵tio̍h kā過去hiah-ê罪惡lóng棄sak,然後用潔淨ê心靈接受主耶穌贖罪恩典ê洗禮。作者真明確指出tio̍h排除ê「pháiⁿ事、講白賊,偽善,嫉妒,á是講人pháiⁿ話」等等chiah-ê無好ê事。

作者對信徒ê期待,就是tī信仰上ài有「渴慕」成長ê意念。「渴慕」chit-ê字,這是有含強烈ê慾望ê意思,就是beh有一種出tī性命飢渴ê需要,是一種tī性命中強烈要求ê心境,ná親像「新生ê嬰á,時時渴慕hit-ê純淨ê靈奶」仝款。

Chia所用「靈奶」ê希臘文是「logikos」,kah「logos」chit-ê字是同字根,意思就是teh指上帝ê話語。作者講一個真正ē-tàng幫助人ê信仰性命成長ê,就是真實上帝ê話語。

第4節,「tio̍h親近主—活ê石頭」,作者kā耶穌基督譬喻成做「活ê石頭」,這iáu是新約聖經中第一pái用chit種方式做譬喻。會用石頭來譬喻耶穌基督,kah引用詩篇第一一八篇22到23節ê詩歌講:「師傅所棄sak ê 石頭,已經成做厝角頭ê 基石。這是上主ê 作為,咱ê 目睭kā 它看做奇怪!(全民版)」原本上帝ê子民hō͘人看輕、藐視,m̄-koh卻tī上帝ê帶領保護之下而得tio̍h全面ê勝利,因chit首詩人用chit種句話歌頌上帝。chit-má彼得前書作者引用chit-ê詩歌來說明耶穌基督tī世間傳福音ê時,mā是án-ne被猶太當局藐視,甚至迫害,最後kā耶穌基督hō͘釘死tī十字架上,taⁿ耶穌基督因為上帝siōng偉大奇妙ê神跡,hō͘伊tùi死亡中koh活起來,成做人類性命ê ǹg望。

Koh講,chia用「活石」mā thang代表上帝。以賽亞書第八章14節記載講上帝是神聖thang驚畏,像一塊石頭,ē-sái真chē人絆倒。然後上帝koh講「ài tī錫安建立堅強穩固ê基礎,tī hia安放貴重ê基石(參考賽亞冊廿八:16)。這thang明白所講ê「活石」,就是teh指以上帝當做性命ê基礎。Chit種性命就會ná親像建造厝tī石磐頂一般,永遠bē搖動。

	第5節,作者講beh用chit種ná親像kah上帝之間bē-tàng分離ê關係,用來「建造屬靈ê聖殿」。Chia提起「屬靈ê聖殿」,主要目的就是beh kā它kah用人ê手所建造起來ê耶路撒冷聖殿區隔出來,因為耶路撒冷聖殿就bat被耶穌基督責備是「賊窩」、「市場」,並m̄是真正用純淨ê心teh敬拜上帝ê所在。耶穌基督mā bat公開講beh用伊ê死kah koh活來重建聖殿(參考約翰福音二:19)。Á使徒保羅mā bat講信耶穌基督ê人lóng tio̍h kā家己身軀看做是上帝ê「殿」(參考哥林多前書三:16—17)。

	第6節,chit節ê詩歌是引用以賽亞書第廿八章16節,主要teh說明有上帝同在ê所在,就是神聖ê所在,mā是性命所仰望之地。彼得前書ê作者引用chit句話,就是beh所有ê信徒明白,耶穌基督就親像上帝以前安置tī耶路撒冷聖殿ê基石仝款,hō͘進入聖殿敬拜ê民眾看tio̍h上帝ê拯救,得tio̍h上帝ê祝福。

第7節,chit節引用詩篇第一一八篇22節ê詩歌,主要teh說明上帝奇妙ê作為,就是hō͘人所棄sak ê成做siōng珍貴ê寶貝。作者tī chia mā真清楚kā信ê kah m̄信ê人做個區分;信ê人當然知影耶穌基督救贖ê疼ê珍貴,相對ê,m̄信ê人會拒絕上帝tī耶穌基督內面ê疼,因為in bē感覺耶穌基督kah伊ê性命有甚麼關係,mā bē想beh得tio̍h耶穌基督tī十字架上ê救恩。

第8節,這是引用自以賽亞書第八章14節ê經文。Chit節mā thang為「活石」做一個註解,因為是「活石」,所以thang成做óa靠ê安全基石,mā因為是「活石」,因為án-ne也ē-tàng成做審判之工具。Chia講「絆倒」,mā thang做「排斥」、「拒絕」解釋。早期教會時代真清楚一個觀念:接納耶穌基督ê人,就會得tio̍h永恆ê性命,相對ê,拒絕耶穌基督ê人,mā會hō͘上帝所拒絕,因為上帝已經kā耶穌基督差遣到世間來,就是beh hō͘人ē-tàng信靠伊而得tio̍h性命(參考約翰福音三:36)。

第9節,chia真清楚提起所有ê基督徒就是仝款ê族群,lóng是屬tī上帝所揀選ê子民。「王家ê祭司」,chit句話kah以色列人出埃及進入曠野了後,就tī西奈山盟約中,上帝透過摩西對以色列人傳出ê信息,講以色列人民是上帝ê選民,是神聖ê國民,是事奉上帝ê祭司(參考出埃及記十九:4—6)。chit-má作者用chit段話ê背景來看所有ê基督徒,就kah當年以色列人仝款。
「聖潔ê國度」,這是teh指分別出來ê一個團契。因為上帝是聖潔ê,所以,所有ê基督徒聚集做伙,應該就是一個分別為聖ê團體,kah一般ê社會團體無仝款。耶穌基督就bat án-ne kā祂ê門徒講in kah一般社會團體無相仝(參考馬可福音十:42—44)。

第10節,chit節講出基督徒應該有無仝款ê所在,就是身分ê認同有差別;以前iáu未認bat耶穌基督ê時,m̄是屬tī上帝ê子民,chit-má因為耶穌基督而成做上帝ê子民。

第11到12節,作者就koh一pái提起ài人kā家己當做kah一個「旅客」、「寄居」者仝款。Mā因為án-ne,作者ài基督徒保有良好ê信仰生活之行為,hō͘人因為án-ne看tio̍h基督徒雖然暫時移居外國之地,mā會知影透過生活見證信仰,因為一個基督徒siōng重要ê,就是時刻知影為福音作見證。

「M̄-thang放縱肉體ê情慾」,chit句話真緊to̍h會hō͘人聯想tio̍h kah「性」有關ê方面。其實,聖經ê作者並m̄是指chiah-ni̍h狹ê範圍,卻是真寬闊ê,指ê內容差不多就是涵蓋了真闊ê道德、倫理方面等lóng包含在內à。

Tī彼得前書ê作者看起來,一個人若是tī肉體上放縱,he等於是teh污染靈魂仝款。Chia ê「靈魂」,mā thang做「心」解釋。Mā就是講,一個人ê肉體kah心靈是相連接ê,m̄是分開ê,mā無法度是分開ê。早期教會因為不被統治者認同,因為án-ne,迫害ê事件chia起hia落,這mā是頭前講過,信徒為tio̍h án-ne逃到外國去避開迫害ê苦難。M̄-koh án-ne並無表示就bē有問題發生,因為hiah-ê人會用真chē不實ê傳聞來褻瀆基督徒kah in ê信仰。因為án-ne,作者認為siōng好ê方法,就是用koh khah好、koh khah實在、koh khah聖潔ê生活方式來,hō͘人看見基督徒ê好模樣而tī「主koh來ê日子」,mā就是審判ê時chūn,成做榮耀上帝ê記號。

第13到14節,chit兩節thang參考羅馬書第十三章1到2節,lóng有仝款ê意思。Á tī使徒行傳第四章18到20節,當彼得kah約翰被猶太人siōng koân議會掠去去關,並tī審問in兩人ê時,in兩人就真清楚表示:「tī上帝面前,聽從lín chiah-tio̍h,á是聽從上帝chiah-tio̍h?lín家己判斷!咱所看見所聽tio̍h ê,無法度不講出來。」彼得書信ê作者傾向ài基督徒對國家ê制度採取尊重ê態度,因為án-ne,強調tio̍h服從ê是制度。Á tī chit制度之下,一定tio̍h有人去執行。因為án-ne,執行者ài kā制度確實執行出來。當國家ê領導者(執政者)若是無確實遵行chit-ê制度ê規矩,甚至亂使用伊ê權勢ê時,人民ê好行為就等於是teh侮辱chiah-ê領導者仝款。Ná親像tī第14節chia所提起ê,chiah-ê制度之下ê掌權者,主要是為tio̍h「執行獎善罰惡」ê工作。

第15節,chit節thang看tio̍h無論是彼得前書á是使徒保羅ê時代,背景lóng是tī羅馬帝國統治之下,tī he強權統治之下ê環境中,若當面kah之發生衝突,必定損傷慘重,而且bē贏過hit種邪惡ê勢力。因為án-ne,包括耶穌基督ê教示中lóng有chit種看法:用疼贏過惡。彼得前書作者認為基督徒應該有夠額ê智慧對付「hiah-ê糊塗無知ê人」,方法並m̄是用強猛ê態度,mā m̄是用足以傷害人命ê武器,koh khah m̄是正面衝突ê舉動,卻是用「好行為」來hō͘ chiah-ê一再想beh壓迫基督徒ê人,就算beh chhōe孔縫lóng會感覺手軟,á是感覺見笑、心虛。

	第16節,「m̄-thang用自由來掩蓋任何邪惡,beh做上帝ê奴僕」,這是非常重要ê信仰認知。有人kā chit句話當做基督徒受洗ê時一定tio̍h宣告ê一句話,因為真正信耶穌基督ê人,乃是自由ê人,是性命無受罪束縛ê人。真正自由,就是疼。因為有愛,性命chiah有自由thang講。相對ê,若是kā邪惡隱瞞起來,這m̄是愛,卻是錯誤而且亂使用上帝ê疼。Chit種舉止kan-taⁿ會帶來koh khah chē ê傷害,甚至成做邪惡ê罪ê奴僕而已。Chia提起「beh做上帝ê奴僕」,chit句話thang參考耶穌基督tī馬太福音第六章24節所教導ê,beh tī錢財kah上帝之間作一個明確ê選擇,伊勸勉所有跟tòe伊ê人lóng「beh做上帝ê奴僕」。

第17節,chit節ē-sái講是作者想為信徒過聖潔生活做一個簡單ê結語,chit句結語就是疼所有ê人。作者講beh用「敬重」,是teh指誠實ê態度。換句話講,一個基督徒,若是hō͘非信徒感覺無夠誠實,就無法度見證信仰。因為基督教信仰就是tùi誠實做基礎開始ê。

Chia講beh用「愛」對待每一個信徒,這「愛」字ê希臘文「agape」,就是不計較、不懷疑、無保留、無條件ê疼,而且是完全、無私、犧牲、奉獻ê疼。

「敬畏上帝」,這「敬畏」一詞,意思就是m̄-thang隨便,tio̍h像腳踩tī薄薄冰層頂面仝款ê心情,小khóa無小心就會陷落去hit種ê驚惶、擔憂。

第18到20節,chia談及有關奴僕kah主人之間ê關係。咱thang án-ne了解,早期教會大多數信徒lóng是奴僕,這mā是為甚麼使徒保羅ê書信中mā一再提起有關奴僕kah主人之間ê關係(參考以弗所書六:5—9,歌羅西書三:22—四:1,提摩太前書六:1—2,提多書二:9—10,腓利門書8—20節)。奴隸ê背景是kah早期羅馬帝國四界去相戰勝利擄獲上千萬人tńg來國有關,siōng高峰ê時期就chē kah六千萬奴隸,chiah-ê奴隸所做ê工作包括音樂、舞蹈、教師、僕役,甚至有kóa醫師mā是奴隸ê身分。M̄-koh大多數iáu是tī勞役ê工作。而且tī he時代,奴隸就是主人ê「財產」,即使有ê主人對待奴隸就ná親像家己厝內人一般來好款待in,m̄-koh這並無表示奴隸就是自由ê,in時常會跟tòe主人ê境遇而改變。而且tī羅馬ê律法下,奴隸並m̄是屬tī「人」ê階級,卻是kah「貨物」仝款。

Kā chit種了解來看chit三節經文ê時,就會明白為甚麼作者會寫出chit種奴隸一定tio̍h以絕對順服ê態度回應主人ê觀點。Tī作者ê看法裡,tú-tio̍h hiah-ê不講理,而且態度惡質ê主人,mā tio̍h忍受,án-ne做是順服上帝ê旨意,而上帝chiah是人真正主人。

Koh講,早期教會因為耶穌基督扮演「受難ê奴僕」ê角色,mā有一種強烈ê看法,認為基督徒應該是學習耶穌基督ê精神,忍受一切ê苦難,因為相信tī苦難中,上帝進行祂奇妙ê拯救工作。特別面對hit-ê強勢有力ê壓迫者ê時,ài kā性命ê希望寄託tī上帝,而不期望有權勢ê人會改變,因為he是真困難ê。只有上帝進行審判、改造ê時,chiah有可能挽回人心墮落ê趨勢。

第21到22節,chia講「基督為lín受苦,hō͘ lín留落來模樣」,是因為耶穌基督並無犯罪,m̄-koh伊卻tī十字架上受難。使徒保羅所講ê:「上帝 hō͘ 無罪 ê基督來擔咱 ê 罪,是 beh hō͘ 咱 kah 祂結聯,來kah 上帝建立合宜ê 關係。(全民版)」(哥林多後書五:21)。早期教會信徒就有chit種信仰觀念,認為每一件事lóng有上帝ê旨意在內面,即使tī siōng無理ê境遇中,mā會有上帝美妙ê旨意在其中。因為án-ne,基督徒若是因為是一個盡責任ê奴僕,卻mā仝款tú-tio̍h到主人嚴酷ê對待,就kā它看做是為tio̍h上帝ê緣故受苦難仝款,án-ne反tńg會得tio̍h上帝ê祝福,就ná親像耶穌基督雖然無罪卻死tī十字架上,是為tio̍h beh完成上帝ê旨意,hō͘人kah上帝之間重建合宜ê關係。

第23節,chia提起「仰望公義ê審判」,這mā是基督教信仰一個真重要ê告白,相信上帝就是公義ê上帝,祂一定會替受tio̍h冤屈者伸冤。如果人間無公理存在,上帝必定會伸張公義,審判hiah-ê不疼惜上帝子民ê統治者。使徒保羅就án-ne講:「親愛ê 兄弟姊妹,m̄ -thang 為tio̍h 家己報冤仇,tio̍ h hō͘ 上帝去受氣來替你申冤,因為經典有記載:『主講:申冤在tī 我,我會報應』」(全民版)(羅馬書十二:19)

    第24到25節,chit兩節koh一pái強調耶穌基督死tī十字架上ê救贖恩典,hō͘所有信耶穌基督ê人ê罪已經得tio̍h赦免,chit種人,就是屬tī耶穌基督ê人,伊就是牧者,信徒就是伊ê羊。耶穌基督就是好牧者,伊會為tio̍h羊捨命(參考約翰福音十:11)。

重新查詢 專卷研經 彼得前書系列
錯誤回報,請聯繫comm[@]fhl.net