列王紀上 4章1節 到 4章19節   背景資料  上一筆  下一筆
Chit章mā是另外一種方式teh說明所羅門kā上帝賞賜hō͘伊ê智慧,運用tī伊治國ê行政事務上,作者用伊án怎任派工作內閣人員,以及分配轄區hō͘地方首長來說明伊確實是一個有智慧ê君王。

    Chit段經文thang分做兩部分來看,一是第2到6節,chit部分是宮廷,mā就是所講ê內閣大臣名單,二是第7到19節ê地區首長,mā就是chia所講ê總督。

    第1節,「所羅門是全以色列ê王」,chit句話已經清楚說明經過宮廷鬥爭了後,所羅門確定已經穩tiâu政權,以色列人民mā確認伊就是in ê王,而且是一個有上帝賞賜ê智慧ê王,thang hō͘伊安心治理國家大政。

第2節,伊任命所有臣僕,就是tùi大祭司開始,表示伊tī宮廷中佔有siōng重要ê角色。

「大祭司:撒督ê kiáⁿ亞撒利雅」,tùi chit句話就thang明白後來ê祭司,就是「撒督」後裔,新約福音書所記載ê「撒督該派」mā是伊ê後裔。

	第3到6節,chit段經文ê名單包括:「書記」,這kah今á日ê「幕僚長」á是「秘書長」真接近。「史官」,是teh指類似國家ê總書記,官職真koân,擁有實權。「統帥」,有ná現代ê國防部長,á是參謀總長。「祭司」,是teh指掌管宗教事務,kah大祭司位階差真chē。「總督長」,就是掌管tùi第7節開始ê每一個區域有「總督」,chia ê總督長就是負責管理這十二個總督(第19節c句)。

    「王室顧問」,這是所羅門siōng重要ê幕僚長,類似現今ê行政院長。

    「宮僕監督」,有ná現今ê內政部長。

    「奴工監督」,這表示所羅門時代已經有「奴工」,指買來ê奴隸,á是俘虜ê奴隸。這mā表示伊bē記得祖先時代,in bat tī埃及當過奴隸。後來,sàn-chhiah ê人民賣身為奴工,這mā為伊死後,kiáⁿ羅波安teh處理北部支派貧困生活問題ê時,因為無辦法體會奴工生活ê困境,結果hō͘勞工部長活活被phah死(參考十二:18)。

	第7到19節,chit段經文是十二個行政區kah總督ê名單。In主要職責是「一定tio̍h tùi所管轄ê地區供應食物hō͘王kah王ê家族;各區總督每年負責一個月」。Chit種工作就是等於今á日所講ê負責稅務稽徵ê工作。Ài beh特別注意ê是,這十二個地區並m̄是根據約書亞分配給十二支族ê方式,因為十二支族ê地區各有無仝,生產力mā就有差別。如果根據約書亞ê方式,根據大細、生產力繳納稅額,án-ne就bē有siuⁿ大問題。Taⁿ是無論大細地區,每一個行政區lóng tio̍h負責一個月ê王室費用,對比較sàn-chhiah ê地區來講,就形成極大ê負擔,chit點可能就是引起後來所羅門死後,北部族群推舉耶羅波安,由伊代表去向所羅門ê kiáⁿ羅波安請求,減輕in ê稅賦ê背景(參考十二:4)。結果是要求減輕稅賦to̍h bē-sái得,最後變成王國分裂,實在可惜。

重新查詢 專卷研經 列王紀上系列
錯誤回報,請聯繫comm[@]fhl.net