列王紀上 3章1節 到 3章15節   背景資料  上一筆  下一筆
Tùi第三章開始teh紹介所羅門王朝ê興旺kah墮落ê原因。有關所羅門繼位,並且剷除了所有可能威脅tio̍h伊ê氣力了後,伊kah老父大衛siōng大ê無仝,就是大衛是率領以色列軍隊擴大疆土,hō͘外敵侵犯ê氣力削弱。Á所羅門是採取異國聯婚ê策略,m̄-koh這策略mā為伊帶來晚年背離上帝、拜偶像ê嚴重錯誤行為,結果致使後代分裂留落來了一個遠因。

Chit章是有關所羅門王真出名ê故事,teh講述所羅門向上帝祈求智慧ê經過。Tī第三章1到15節是講伊祈求ê經過,而tùi第16到28節是用一篇故事來形容所羅門充滿智慧ê表現。

Chit段經文mā同時記載tī歷代志下第一章3到12節。Tī chia,列王記作者先交帶所羅門tī國家政策ê態度kah大衛大無相仝。至少,chit段經文ê起頭就講,所羅門娶埃及國王ê cha-bó͘-kiáⁿ做bó͘,chit點mā講出伊用政治聯婚ê方式,擴張政治勢力,m̄-koh卻mā為伊後來棄sak上帝埋落來了一個伏筆。續落來,chia講伊對上帝真忠實不貪心,只祈求上帝賞賜hō͘伊智慧,好治理以色列國。Chit種態度hō͘上帝深受感動soah大大賜福hō͘伊。 

第1到3節,chia一開始就講「所羅門kah埃及王結盟,娶埃及王ê cha-bó͘-kiáⁿ作bó͘」。這是一種大略上ê陳述,主要teh說明所羅門ê國家政策,採取政治聯婚ê方式,建構kah鄰國ê外交關係。作者tī chia用當時只有聖幕,無聖殿,因為án-ne,以色列人民lóng會tī「丘壇上獻祭」。Chit-ê「丘壇」一詞,表示比較高ê所在。卻mā是迦南地神明siōng普遍出現ê所在。因為án-ne,用「丘壇」一詞,mā隱含tio̍h以色列人民有ê時分bē清楚敬拜上帝kah拜迦南地神明ê區別。這mā是後來申命記作者一再強調tio̍h拆毀chiah-ê祭壇ê原因(參考申命記七:5、十二:3)。不過,chia而且講所羅門「敬疼上主,遵照in父親大衛ê訓示」,可惜是伊kah-ná mā分bē清楚「丘壇獻祭」kah tī聖幕獻祭之間ê差別。

第4到5節,講所羅門到「基遍獻祭」,這是設tī耶路撒冷西北pêng大約十公里ê所在,chia有「siōng出名ê丘壇」,所羅門mā bat tī chia「獻過成千ê燒化祭」。照歷代志下作者ê觀點,所羅門會去基遍獻祭,原因是當時聖幕tī基遍,雖然約櫃是排tī耶路撒冷,m̄-koh聖幕iáu未遷徙到耶路撒冷。真可能是為tio̍h beh建造聖殿ê緣故,並無積極遷徙聖幕。Teh獻祭後ê hit暗,上帝透過「夢」向所羅門顯現,問所羅門想beh上帝祈求甚麼。

	第6到9節,chit段是所羅門siōng重要ê一段信仰告白。伊表示因為老父大衛對上帝「忠心、誠實,有純真ê心」,tùi án-ne得tio̍h上帝「大施慈愛」hō͘伊。chit-má所羅門表示家己少年,上帝就賞賜hō͘伊有chit種機會繼承老父大衛ê王位,伊懇求上帝賞賜hō͘伊「一粒真gâu識別ê心,ē-tàng判斷是非,好治理」人民。Chia所謂「一粒真gâu識別ê心」chit句話,意思是teh指「一粒遵守上帝旨意ê心」,這mā是kui本聖經ê主要信息,希望ē-tàng確實聽從上帝ê旨意。

	第10到14節,因為所羅門chit種祈求,感動上帝,認為伊無親像一般人祈求「長壽」、「財富」,kah強大ê軍事武力,只祈求「明辨ê智慧,好公正治理人民」,因為án-ne,上帝決定beh成全伊所祈求ê。而且beh賞賜hō͘伊ê智慧,是前無古人,後無來者。M̄-koh上帝mā同時提醒所羅門一定tio̍h像in父親大衛仝款,對上帝忠實。

第15節,所羅門終其尾知影這是上帝透過夢向伊講話,因為án-ne,趕緊koh獻上「燒化祭和平安祭」表示感謝上帝ê恩典,並且排設筵席款待所有跟tòe伊去基遍獻祭ê臣僕。

重新查詢 專卷研經 列王紀上系列
錯誤回報,請聯繫comm[@]fhl.net