列王紀上 2章1節 到 2章12節   背景資料  上一筆  下一筆
Chit章ē-sái講是一幕一幕血淋淋ê宮廷鬥爭記錄,記載所羅門繼任王位後,照老父大衛所交帶,開始剷除異己,甚至,kā兄哥亞多尼雅殺害。

第二章1到12節:Chit段經文ē-sái講是大衛ê臨別遺言kah往生,m̄-koh這遺言m̄是赦免hiah-ê得罪伊ê人,而是beh繼任伊王位ê kiáⁿ所羅門去進行報復、剷除ê殺害動作。M̄-koh這並無表示伊ê雙手比較潔淨。

第1到4節,Tī chit段勉勵所羅門ê話,真清楚申命記作者ê教導,一定tio̍h嚴格遵守摩西律法冊上所有ê規定,án-ne chiah ē-tàng得tio̍h上帝ê賜福(參考申命記第八章)。

第5到6節,特別ài所羅門一定會注意約押,講伊「刣死無辜ê人」,á這責任卻hō͘大衛承擔。伊ài所羅門mài hō͘約押「善終」。其實,約押ē-sái講是大衛siōng忠心ê武官,一路上lóng是伊扶持大衛ê,m̄-koh taⁿ大衛卻ài kiáⁿ所羅門bē-tàng hō͘約押善終,理由是伊殺害無辜ê,m̄-koh大衛家己為tio̍h謀害無辜ê烏利亞,卻假借約押ê手殺害ê。

第7節,這是為tio̍h beh遵守伊答應好款待基列人巴西萊ê kiáⁿ ê諾言,chit節經文thang參考撒母耳記下第十七章27到29節。

第8到9節,是beh所羅門處理基拉ê kiáⁿ示每,chit件事ê背景thang參考撒母耳記下第十六章5到14節、18節b句到23節等等,顯然地,大衛並無照所講ê話,遵守不殺害示每,伊雖無殺害伊,卻ài所羅門「一定會想法子」去kā示每處死。Tùi chit點mā thang看出大衛是一位真會「記恨」ê人。

第10到12節,敘述大衛往生,執政四十年,伊kā以色列國交hō͘ kiáⁿ所羅門ê時,hit時以色列「國勢非常穩固」。

重新查詢 專卷研經 列王紀上系列
錯誤回報,請聯繫comm[@]fhl.net