亞哈王mā thang講是以色列分裂做南北二國了後，北pêng以色列國諸王中被詳細記載ê一位國王。Tī chit段tùi第十六章29節開始直到第廿二章記載有關亞哈王ê經文中，主要ê事蹟lóng是關係上帝ê奴僕先知以利亞kah亞哈王ê御用先知，進行真假先知之「鬥」ê事件；亞哈王怎樣圖謀侵佔拿伯ê葡萄園，以及亞哈王拒絕聽從上帝先知以利亞ê信息而戰死戰場ê事件等。Tī中間穿插tio̍h北國teh beh面臨嚴重乾旱，先知以利亞受tio̍h迫害，以及伊求死ê事件。

第十七章就是記載先知以利亞對亞哈王提出警告，會有嚴重ê乾旱臨到，上帝怎樣用人所注意bē-tio̍h ê方式，包括有烏鴉送食物，kah一位tòa tī撒勒法ê寡婦幫助先知以利亞度過飢荒ê危機，以及先知以利亞救活了這撒勒法寡婦ê獨生kiáⁿ。

先知以利亞是舊約聖經中佔有真大份量ê一位先知，mā是舊約聖經中記載兩位無「死亡」，hō͘ 上帝直接接tńg來天頂ê人物之一，另外一位是kah上帝有密切交往ê以諾（參考創世記五：24）。舊約聖經先知瑪拉基書甚至預言先知以利亞是tī上帝進行終末審判來到chìn前，會先tńg來ê先知。Mā因為án-ne，傳統上，猶太人tī正式ê聚會場合，lóng會留落來一個空位，為tio̍h是beh讓hō͘先知以利亞來到ê時chūn有一個座位thang坐。以利亞，chit-ê名ê意思是「耶和華是我ê神」。Mā thang tùi先知以利亞ê言行看出伊chit-ê名ê特色。

第1節，先知以利亞是「基列ê提斯比人」，這是設tī約旦河東北部ê所在。其實，原本希伯來文是講伊「寄居」tī「提斯比」。伊teh kí上帝ê名用chiù-chōa ê語氣對亞哈講，除非伊祈求，若無，tī「以後ê幾年內」，天bē落雨，mā bē降落甘露。這真真明顯表示北國以色列會有極大ê乾旱來臨。

第2到4節，這幾節是上帝hō͘先知以利亞ê信息，上帝ài伊離開亞哈ê所在，到約旦河東邊ê「基立溪附近藏起來」，原因是上帝知影亞哈王會對先知以利亞採取報復行動。上帝hō͘先知以利亞知影，祂會差派「烏鴉送食物」來飼伊，而且會hō͘該溪水tī極大乾旱ê時iáu thang得tio̍h水。這ē-sái講是極大ê神跡，烏鴉會聽從上帝ê命令送食物來hō͘先知以利亞，這tī人看起來是無可能ê事，m̄-koh tī上帝ê手中每件事lóng可能實現。

第5到7節，siōng重要ê，就是聽從上帝ê話。先知以利亞聽從上帝ê話。烏鴉mā仝款，聽從上帝ê命令，「每工早起kah beh暗á lóng送餅kah肉」來hō͘先知以利亞。因為無落雨ê時間siuⁿ久了，這表示先知以利亞ê誓言成（chiâⁿ）實實現了，而且長到三年半ê時間（參考路加福音四：25，雅各書五：17）。基立溪ê水乾涸，無水thang lim。