Chit段經文是記載南國猶大羅波安ê事蹟。Chit段經文記事mā同時記載tī歷代志下第十一章5到12節、15節等等。

第21節，chit節補充了第十二章有關羅波安繼承所羅門王位了後，所欠缺ê資料。Mā是tùi chia開始，記載南國猶大ê事蹟，lóng是用「猶大」chit-ê名稱，而chit-ê名稱所代表ê，只是猶大支族kah便雅憫支族而已，版圖範圍小，人口mā少了真chē。Chia真清楚講羅波安擔任猶大王統治耶路撒冷，hit年伊是四十一歲，統治時間有「十七年」。值得注意ê是，伊ê母親是亞捫人叫「拿瑪」，這表示所羅門娶外族人做bó͘。Á這簡單ê一句講羅波安ê「母親是亞捫人」，mā講出所羅門透過婚姻關係所建立ê王國霸業，並m̄是成功ê例，如果無上帝ê賜福，無上帝ê話語做基礎，即使用koh khah巧妙ê外交、政治手段，lóng無法度久長存在，所有ê努力mā會是枉然ê。

第22到24節，短短三節ê經文，就thang看出南國猶大ê問題並無比北國以色列輕。In mā是仝款敬拜偶像，而且iáu tī各地敬拜地點設有男娼，這是非常嚴重ê事，已經說明以色列人tī迦南地差不多完全被當地同化了，特別是tī宗教信仰上koh-khah是án-ne。已經分bē清楚耶和華宗教信仰kah偶像神明之間ê差別。

第25到28節，這是真重要ê一段經文，講tio̍h埃及王示撒帶兵攻打耶路撒冷，並且是進入聖殿奪取所羅門時代所鑄造ê金盾牌（參考列王記上十：16—17），而且mā進入所羅門建造起來ná奢華ê王宮搜刮所有ê寶物。有關埃及王示撒帶兵攻打耶路撒冷城以及奪取聖殿、王宮中ê財寶ê tāi-chì，thang參考歷代志下第十二章1到12節。作者講因為羅波安知影悔改認罪，上帝特別赦免伊，無kā受氣傾倒tī耶路撒冷城。換句話講，如果m̄是因為國王認罪，恐驚所講ê「聖城」、「聖殿」lóng會毀滅tī敵人ê手。當埃及kā chiah-ê金盾牌奪行了後，羅波安改用「銅盾牌」，每pái伊去耶路撒冷聖殿獻祭ê時，守衛王宮ê衛兵就the̍h-tio̍h chiah-ê銅盾牌護衛tio̍h，這已經teh暗示南國猶大ê國勢已經衰弱真chēà。無koh像所羅門王時代hit種à。

第29到31節，統治猶大十七年了後，羅波安mā往生à。然後由伊ê kiáⁿ亞比雅繼承伊做王統治耶路撒冷。Chia第30節真重要，講「羅波安kah耶羅波安之間不斷發生戰爭」，chit句話已經真清楚講出分裂後ê南北二國，彼此之間不時有戰爭ê事發生，而這mā是造成國力衰退ê主要因素之一。