列王紀上 13章1節 到 13章10節   背景資料  上一筆  下一筆
這是一章非常奇特ê故事。值得注意ê是tī第32節提起撒馬利亞城鎮,其實,tī耶羅波安時代,撒馬利亞城iáu未建立,因為án-ne,這ē-sái講是先編排tī chia,做預言北國以色列會因領導人民ê君王棄sak上帝,而遇tio̍h滅亡,留落來一個伏筆,主要teh警告北國以色列ê領導者kah人民,一定會遵從上帝ê話,若無,國家就會滅亡。

這是一位奉差遣ê先知,去對耶羅波安警告,伊所設立ê祭壇,以及祭司lóng會遇tio̍h上帝ê懲罰。Koh講,tī第十二章33節記載耶羅波安特別延後訂定Tòa棚節ê節期,並且親自去伯特利舉行獻祭禮儀,chit章就續接耶羅波安teh獻祭ê時chūn,發生神ê人去對伊講預言chit件事。

第1節,chit節講chit位奉差遣ê先知,是tùi「猶大到伯特利」,kah-ná有意思beh表明:tī政治上ê分裂,並m̄是允准宗教信仰上ê分別。Chia並無記落來chit位神ê人ê名,m̄-koh伊真清楚講tio̍h會發生ê事。這mā說明政治上ê事,是上帝teh主導,tī宗教信仰ê事頂面,上帝絕對bē容許kah祂立約ê子民棄sak所立ê約。

第2到3節,chit位無記落來名ê先知提起「大衛ê家族會生一個gín-á,名叫約西亞」。Chit位無被記名落來ê先知,就tī耶羅波安beh獻祭ê時chūn,講出上帝beh伊講ê預言,表示:tī chit祭壇獻祭ê祭司會被殺害,而且in ê身軀會tī祭壇上火燒。然後koh對耶羅波安講該祭壇會倒塌,壇上ê灰會掖落來。Chit件事發生tī主前621年,距離耶羅波安ê時代,相差約有三百年(主前930年左右),可見chit份資料是真晚期ê作品。

第4到6節,結果耶羅波安聽了後,大怒,指神ê人命令侍衛kā伊掠,結果耶羅波安ê手股頭馬上半遂ā,無法度動。M̄-nā án-ne,tú親像chit位神ê人所傳達ê信息實現,祭壇忽然倒塌,壇上ê灰掖了落來。Chit時耶羅波安受tio̍h嚇(heⁿh)驚,請求chit位神ê人為伊向上帝祈求,醫伊ê手股頭,神ê人án-ne做,醫了伊ê手股頭。

第7到10節,耶羅波安想邀請chit位神ê人tńg去厝裡食飯,m̄-koh被chit位神ê人所拒絕。因為上帝有警告伊「甚麼lóng m̄-thang食、m̄-thang lim」,mā無法度tùi原來ê路tńg去。伊聽從上帝ê話,拒絕耶羅波安ê邀請,mā無照原來ê路tńg去厝裡。

Kui個故事ê內容真親像先知阿摩司ê經歷仝款;先知阿摩司mā是tùi猶大到伯特利去傳上帝ê信息,結果被伯特利ê大祭司亞瑪謝阻止,而且認為伊是為tio̍h beh餬口而傳上帝ê話語,並且狀告到國王耶羅波安二世hia,m̄-koh被先知阿摩司責備。Chit位無記名ê先知mā是拒絕耶羅波安ê邀宴。

重新查詢 專卷研經 列王紀上系列
錯誤回報,請聯繫comm[@]fhl.net