列王紀上 13章11節 到 13章34節   背景資料  上一筆  下一筆
Chit段經文講述chit位神ê人ê另外一面。Tī頭前,伊面對國王耶羅波安ê邀請,勇敢地拒絕,而且當面指責mā m̄驚。M̄-koh tī chia,有假先知冒用上帝ê話邀請伊,伊卻信認為真,無真實地遵守上帝ê話而接受邀請lim食,結果是死tī非命。Chit段故事真明顯teh說明一件事:上帝ê命令,絕對服從。無論是甚麼人,á是假藉上帝ê名(第18節),lóng無法度bē記得上帝親身ê啟示。特別是對tī上帝ê奴僕,tī一個棄sak上帝誡命ê世代中,koh khah應該tio̍h隨時注意有人會利用宗教信仰ê名義,胡亂發出信息,chit點koh khah須明白謹記在心。上帝ê奴僕一定tio̍h忠實tī上帝,這是非常重要ê一點,無法度妥協。

第11到15節,chit位神ê人tī伯特利對耶羅波安所講ê話kah醫ê事,傳開à。Hō͘一位老先知ê kiáⁿ知影,tńg去kā老先知講。老先知知影神ê人tńg去ê路徑,馬上騎驢á趕去chhōe chit位神ê人,並且請伊跟tòe老先知tńg去厝裡用餐。

第16到18節,原本神ê人拒絕,m̄-koh chit位老先知講家己mā是先知,得tio̍h上帝ê天使啟示,ài神ê人跟tòe伊tńg去厝裡同齊lim食。作者真清楚說明chit位「老先知是teh講白賊」。伊m̄-nā無聽神ê人ê話,反tńg是用講白賊teh試探chit位神ê人。Mā thang án-ne講,即使是先知,若是無上帝傳達hō͘伊信息,伊mā無法度假冒上帝ê名講話,chit點tī先知耶利米時代就是一個真清楚ê例。有bē少人就是冒用上帝ê名傳話,結果害猶大滅亡。

第19到22節,上帝ê聲音傳到chit位神ê人,kā伊譴責竟然違背上帝ê話語。因為án-ne,伊會「被刣」,而且屍體無法度葬tī厝族ê墳墓內。當chit位神ê人聽tio̍h上帝chit種信息了後,伊無趕緊悔改認罪,祈求上帝ê憐憫赦免,ná親像耶羅波安請求伊代禱,懇求上帝憐憫後,半遂ê手隨時恢復。M̄-koh chit位神ê人並無án-ne做。這mā說明神ê人mā會有bē記得上帝ê命令ê時chūn。

第23到25節,chit隻獅mā是奉差遣來咬死chit位無遵守上帝命令ê神ê人,獅並m̄是因為iau餓而攻擊神ê人,卻是執行上帝ê命令,懲罰神ê人。因為án-ne,當獅咬死神ê人ê後,並無食神ê人,m̄-nā án-ne,獅iáu khiā tī屍體邊á,有護守tio̍h ê意思,hō͘神ê人ê屍體容易被看出來。

第26到28節,chit位試探神ê人老先知得tio̍h chit-ê消息,清楚知影神ê人並無完全遵守上帝ê命令chiah會有chit種結果。就án-ne伊就趕緊出門去看,果然發見驢á無被咬傷,神ê人ê屍體完好。

第29到32節,老先知就kā神ê人ê屍體帶tńg來埋葬tī家己ê墳墓內,並且交帶伊ê全家,以後mā kā伊埋葬kah chit位神ê人做伙。老先知mā告知伊ê全家,chit位神ê人所傳達ê信息一定會發生tī北國以色列。

第33到34節,耶羅波安並無因為親身體驗到上帝ê懲罰,kah聽tio̍h神ê人所警告ê話而悔改歸向上帝,伊iáu-koh繼續我行我素,家己設立祭司tī祭壇向偶像神明獻祭。這mā說明北國以色列後來滅亡ê主要原因,就是拒絕順從上帝。

重新查詢 專卷研經 列王紀上系列
錯誤回報,請聯繫comm[@]fhl.net