列王紀上 11章1節 到 11章13節   背景資料  上一筆  下一筆
聖經一再提起,對人siōng大ê誘惑,就是財富。有財富,就一定tio̍h koh khah小心。若是無堅定ê信仰做基礎,真緊to̍h會棄sak上帝,結果就是遺禍到下一代kiáⁿ孫。耶穌bat提醒講,一定tio̍h tī上帝kah財富之間作一個明確選擇(參考馬太福音六:24),這m̄是無原因ê。因為伊看出人性ê軟弱。以色列人民會棄sak上帝,主要原因mā是因為tī迦南過富裕ê物質生活所致。

Chit章真清楚講出過去反對所羅門統治之下ê仇敵,開始利用所羅門荒廢政事ê時,起來反抗伊,造成以色列人民ê不安,而北部ê族群mā因為án-ne開始思考獨立伊去ê運動萌芽起來。

Beh解讀所羅門棄sak上帝ê原因,á是解釋所羅門死後王國分裂ê原因真chē,包括伊是大衛犯姦淫罪所生ê kiáⁿ;m̄是上帝親自差遣先知膏立ê國王等等,chiah-ê lóng thang講是所羅門雖然開創了以色列王國ê帝業,卻mā為伊死後ê分裂帶來暗伏ê遠因。Chit章ê作者提供另外一個觀點:所羅門無遵守上帝ê話,伊娶外邦ê cha-bó͘-gín-á做bó͘,致使對上帝忠實ê信仰喪失,是伊棄sak上帝ê主要因素。伊總共娶一千個cha-bó͘-gín-á做bó͘,大多數lóng是外邦ê cha-bó͘-gín-á,這lóng tī說明一個重要ê訊息:伊ê政治婚姻是為tio̍h圖謀政治利益而結婚,m̄-koh卻無kā上帝ê話khǹg tī心中。真正hō͘一個國家ē-tàng安定ê,m̄是單靠政治ê氣力,而是beh有謙卑ê心靈忠實tī上帝ê話。因為若是無上帝ê話語做基礎,就bē有上帝ê賜福,連帶ê就無安定ê日子thang期待,chit點是聖經ê作者一再khah強調ê。

第1到3節,除了娶埃及國王ê cha-bó͘-kiáⁿ做bó͘,所羅門koh娶赫人、摩押、亞捫、以東,kah西頓ê cha-bó͘-gín-á等做bó͘,這明顯違背摩西律法ê規定(參考申命記七:3—4)。而且伊m̄是只有娶幾個而已,卻是因為富裕到「娶七百個公主,此外iáu有三百個妃嬪」,這等於teh暗示伊開始過窮極奢華ê生活,甚至是荒淫無度à。當然chit種行為mā是違背摩西律法ê規定(參考申命記十七:17)。

第4到6節,結果chiah-ê妃嬪「引誘伊去拜別ê神明;伊無親像in父親大衛hit種一心忠於上主—伊ê上帝」。Á tī伊奉獻聖殿hō͘上帝ê祈禱後,上帝回應伊ê祈禱中,真清楚告誡伊,講如果伊棄sak上帝去拜偶像,上帝mā會棄sak伊kah伊ê人民,hō͘ in被鄰國ê人民譏笑,人民受掠伊去(參考列王記上九:6—9)。M̄-koh所羅門顯然已經bē記得上帝ê話,伊ê chit種行為mā為以色列人民後來敗壞留落來pháiⁿ ê模樣kah害。

第7到8節,chit兩節說明所羅門去拜偶像神明ê證據,就是伊iáu為所有ê妃嬪建造in原本tī故鄉所拜ê神明之祭壇,換句話講,所羅門m̄-nā家己對上帝無夠忠實,甚至iáu因為án-ne kā偶像神明ê祭拜行為引進以色列,hō͘以色列人民mā tòe學樣去做,án-ne chiah是siōng大ê敗筆。

第9到10節,chia真重要ê,是上帝為tio̍h beh阻止所羅門不要犯chit種siōng令上帝痛心ê事,上帝iáu特別向伊顯現「兩pái」,「命hō͘伊bē-tàng拜別ê神明,m̄-koh所羅門無聽從上主,反tńg棄sak了」上帝,這是非常可惜ê事。

第11到13節,chit段經文是上帝對所羅門chit種m̄聽苦勸所講ê話。上帝決定採取懲罰ê行動,beh「奪回」所羅門治理ê以色列國,chia ê「奪回」一詞,是teh指「撕成碎片」ê意思,意思就是分裂。M̄-koh chit件事bē tī伊有生之年出現,會tī伊死後發生。原因是上帝看tī祂忠實奴僕大衛ê緣故。作者tī chia強化第11節所講ê,所羅門是「故意」棄sak kah上帝ê約。聖經講做一個人「故意」棄sak上帝ê時,已經有含「褻瀆」ê意思。Mā就是明明知影he是bē-tàng ê事,卻偏偏去做,就等於是侮辱上帝ê神聖仝款。

重新查詢 專卷研經 列王紀上系列
錯誤回報,請聯繫comm[@]fhl.net