列王紀上 10章14節 到 10章29節   背景資料  上一筆  下一筆
Chit段經文是描述所羅門ê財富之多,用一句簡單ê話,就是富thang敵國。Chit段記事mā記載tī歷代志下第九章13到28節。

第14到15節,chit兩節講出所羅門每年tùi各種無仝管道進帳ê財富就非常可觀。Chia講tio̍h每年tùi各地收tio̍h ê黃金就高達「兩萬三千公斤」,這數目teh表達並m̄是字面上ê數字,卻是象徵性ê數目,表示非常ê富裕,收入真豐富ê意思(原文是用「六百六十六伊連得」),因為古代「伊連得」表示ê是重量,這重量tī無仝ê地區á是ê時空,有無仝ê等值。Iáu有商人「繳納ê稅金」、「貿易所得ê利潤」,加上附近國家諸侯「進貢ê禮物」,kah以色列各區域「總督ê貢禮」等,chiah-ê lóng tī說明所羅門收入之多,差不多是無法度估計數算。

第16到22節,chit段經文thang看出所羅門因為太富裕,所以mā開始過奢華ê生活,而chit段經文mā為tio̍h伊後來敗壞生活ê留落來一個伏筆。Koh講,值得注意ê是tī第21節講「tī所羅門時代,銀á無算貴重」,這表明tī伊時代,黃金已經成做貴重ê金屬物件,價值已經高過銀á。M̄-koh銀á iáu是當時普遍ê貴重貨幣基礎。Tī新約時代,耶穌基督ê譬喻中,iáu是繼續用銀á ê價錢講譬喻(參考馬太福音二十:2、10,路加福音十五:8)。Á第22節回應了第九章26到28節,希蘭王替所羅門建造ê一支遠航船隊,hō͘以色列ê商業貿易興旺起來,mā thang看出當時ê船隻製造技術已經非常進步。

第23到25節,富裕ê國家、王室,即使tī今á日mā是人人羨慕,想beh攀結ê對象。

第26到27節,所羅門m̄-nā tī經濟、商業貿易上非常用心,tī國防上mā是m̄放鬆。伊知影ài有富裕ê商業經濟動力,mā一定tio̍h有堅強ê國防做基礎。古早時,國kah國之間ê關係,往往是看軍事武力強弱;強國擴展貿易真緊,相對ê,弱國往往tú-tio̍h到剝削。想保護貿易線ê暢通,就一定tio̍h有堅強ê軍事武力作後盾。

第28到29節,tùi chit兩節thang看出所羅門時代,以色列m̄-nā是一個通商大國,mā是一個貨物轉運中心,這mā表示以色列就是kui個中東地帶ê樞紐。

重新查詢 專卷研經 列王紀上系列
錯誤回報,請聯繫comm[@]fhl.net