哥林多前書 9章15節 到 9章27節   背景資料  上一筆  下一筆
這是一段措辭非常激烈,態度堅定ê經文。伊非常清楚表明家己是用付出性命ê態度傳福音,所以伊講除了無要求有甚麼權利之外,伊將傳福音ê事,看做是性命中siōng大ê事,所以伊講:「我不傳福音就有禍了!」這是措辭真強烈句。Chit句話已經清楚說明tī哥林多教會內部已經出現有人teh講使徒保羅kah伊ê同工是óa靠in teh過生活,mā就是將傳福音當做是「謀生」ê職業。這hō͘使徒保羅非常憤怒。所以伊強調家己並無利用chit種「權利」。伊koh一pái強調:傳福音是責任,既然是責任,將它做好原本是應該ê,無做好,á是無盡力去做chiah是罪惡!伊mā強調家己本來就是自由人,m̄-koh甘願成做福音ê「奴僕」,而為tio̍h beh得tio̍h福音ê果子,伊願意放落家己ê身段,只為tio̍h beh拯救人來信耶穌,chit點是伊一生ê siōng大ê心志。 

第15到18節,伊講傳福音並無甚麼好誇口ê,因為伊講過若beh誇口,就beh誇耀認bat耶穌(參考加拉太書六:14,腓立比書三:3)。伊自認是福音ê「奴僕」,所以奴僕一定tio̍h對主人ê事忠實,就án-ne伊講了chit句有名:「我不傳福音就有禍了!」因為這是上帝託付hō͘伊ê責任,hō͘伊責無旁貸。所以伊認為siōng大ê榮幸,就是無tùi傳福音得tio̍h應該得tio̍h ê權利。因為耶穌就是伊性命中siōng大ê寶貝,伊認為án-ne就有夠(參考腓立比書三:8)。

第19到22節,tī chit段經文中,使徒保羅kā家己傳福音ê秘訣lóng顯露出來,就是hō͘家己像耶穌仝款「道成肉身」到世間來。使徒保羅講家己原本是「自由ê人」,m̄-koh願意當大家ê奴僕,chit點mā是伊描述耶穌降生tī世界上ê情景(參考腓立比書二:7)。然後伊講無論面對ê是甚麼人,伊ná親像hit-ê對象仝款,親像對猶太人,ná親像猶太人;對外邦人,ná親像外邦人;對信心軟弱ê人,伊就kah in仝款,學像軟弱ê人。伊會án-ne,只有一個目的:「無論用甚麼方法」,伊總是beh「救一kóa人」。

第23到27節,chit段經文thang參考腓立比書第三章12到14節。伊kā性命ê目標khǹg tī屬天ê獎賞,mā因為án-ne,伊並無在意世間chiah-ê人對伊講kóa甚麼,mā bē因為有人hō͘伊甚麼,伊就戀棧。伊勸勉哥林多教會信徒beh爭取ê獎賞應當是來自天頂hit-ê bē朽壞ê冠冕,其他ê已經lóng無算重要ê à。

重新查詢 專卷研經 哥林多前書系列
錯誤回報,請聯繫comm[@]fhl.net