哥林多前書 5章1節 到 5章5節   背景資料  上一筆  下一筆
Tùi chit章就thang清楚看tio̍h哥林多教會內部確實發生真大ê問題,除了有分裂ê事之外,mā發生信徒生活ê墮落,而且chit種墮落是連一般道德生活ê水平lóng 不如,he就是嚴重ê淫亂ê tāi-chì mā出現。使徒保羅特別強調tio̍h kah chit種人斷絕來往,伊用真嚴厲講,就算kah chit種人同齊食飯lóng該拒絕(參考第11節)。伊ê意思是有án-ne行為ê人,就無法度tī教會內出現,beh kā chit種人tùi教會中驅逐出去。伊之所以án-ne嚴格要求ê原因,是認為chit種人tī教會內,會ná親像酵母仝款,m̄-nā家己敗壞,iáu會影響tio̍h其他ê信徒。Tī使徒保羅ê觀點,教會是基督ê身軀(以弗所書一:23),mā是「聖神ê殿」,是屬tī上帝ê殿(參考哥林多前書六:18—19),是聖潔ê記號,是神聖ê。

使徒保羅講伊已經聽tio̍h哥林多ê教會內發生「淫亂」ê事,伊tùi chit件事直接指出該教會應該感覺慚愧、見笑chiah-tio̍h,伊雖然無tī in中間,m̄-koh伊提醒該教會信徒,伊ê心lóng kah in做伙。所以對hiah-ê犯淫亂罪ê信徒,伊ài in kā chit種人交hō͘撒旦去。意思是teh指kā它tùi教會信仰團契驅離出去。

第1到2節,注意chia所用ê「淫亂」一詞,m̄-nā是teh指iáu未結婚就有「性」行為chit方面ê事,mā是teh指違反一般道德規範ê事。換句話講,chia指ê「淫亂」,並m̄是非常特別ê案子,卻是一般人tī倫理道德上lóng真清楚,是bē-tàng發生ê事,親像:亂倫,就ná第1節所講ê「kah繼母同居」。信徒中有人會做chit種事,確實是真難得tio̍h社會大眾ê認同,會hō͘人掠做是基督徒是允准亂倫ê事。摩西律法非常清楚規定bē-tàng有亂倫ê行為,利未記第十八章8節就特別記載講:「你 ê 老父ê後 bó͘ ê 下身,你m̄-thang 露現,因為he 是你ê 老父ê 下身。(全民版)」申命記mā有這chit種規定(參考申命記廿二:30)。Mā tùi chia thang看出哥林多城是一個道德生活規矩真亂ê城市,而教會tī chia m̄-nā無顯明出信仰ê光芒,反tńg是受tio̍h影響非常大。Tùi chia看出一個重要ê訊息:如果教會內信徒ê生活án-ne墮落,hiah-ê誇耀家己是屬tī「保羅」、「亞波羅」、「彼得」、「基督」等派別,m̄-nā無法度顯示出chiah-ê人ê名號,顛倒地,是褻瀆了in所傳hō͘該教會信徒ê福音信息。所以使徒保羅強烈主張應該將chiah-ê犯淫亂罪ê信徒hō͘開除並驅離教會。

第3到5節,使徒保羅先譴責chiah-ê犯淫亂罪ê信徒,然後伊表明時刻lóng kah該教會信徒同在,雖然伊本人並無tī現場,m̄-koh伊表明伊ê心是kah in同在同齊。伊認為應該將chiah-ê犯淫亂罪ê信徒「交hō͘撒旦」,意思是tùi教會中驅離出去,伊講hō͘ chit種人ê身軀敗壞,有可能iáu有機會hō͘伊ê身軀得tio̍h拯救。

使徒保羅會有chit種看法,是當時ê教會有一個普遍ê觀念,世界分做兩個領域,其一是屬tī上帝管理ê世界(教會),其二是屬tī魔鬼、撒旦管理ê領域(社會)。使徒保羅將chit種觀念tī教會內面強化起來,希望由基督徒組成ê教會,眾信徒lóng ē-tàng成做「新造ê人」(參考哥林多後書五:17),hō͘舊ê一切lóng成做過去。換句話講,大家是帶tio̍h新ê性命tī教會內。對hiah-ê iáu繼續犯罪ê人,hō͘ in tī教會外面ê世界裡被消滅。M̄-koh問題是:如果教會是屬tī上帝管理ê所在,án-ne,chit種人若tùi教會被驅離,不就等於是離開了上帝ê管理,án-ne tio̍h怎樣辦?使徒保羅並無tī chia有明白ê表示。Á是允准以án-ne瞭解:使徒保羅認為將chit種人tùi教會信仰團契驅離出去,有可能會hō͘ chit-ê人驚醒起來而悔改認錯,án-ne就有機會拯救chit-ê人ê性命。


重新查詢 專卷研經 哥林多前書系列
錯誤回報,請聯繫comm[@]fhl.net